އެކި މައްސަލަތަކުގައި ޖޫރީމަނާކުރުމަށް ޙުކުމްކޮށްފައިވާ މީހުންގެ ތެރެއިން ޖޫރިމަނާ ފައިސާ ނުދައްކާމީހުންގެ މަޢުލޫމާތު ހޯދައި އެމީހުންގެ މައްސަލަ ކޯޓަށް ހުށަހެޅުމުގެ މަސައްކަތް ކުރަމުން އަންނަކަމަށް ޕްރޮސެކިއުޓަރ ޖެނަރަލްގެ އޮފީހުން ބުނެފިއެވެ.
އެއޮފީހުގެ މައްޗަށް މިކަން ކުރުމަށް ލާޒިމްވަނީ ދިވެހިރާއްޖޭގެ ސުޕްރީމް ކޯޓުން ނެރުއްވާފައިވާ ޝަރީޢަތުން އަދަބު ކަނޑައެޅުމުގައި ޢަމަލުކުރާނެ ގޮތުގެ އުޞޫލު ގެ ދަށުންނެވެ. އެ އުސޫލުގެ 30ވަނަ މާއްދާގެ (ހ) ގައި ވާގޮތުން ޙުކުމުގައި ކަނޑައެޅިފައިވާ މުއްދަތުގައި ޖޫރިމަނާގެ ފައިސާ ނުދައްކައިފިނަމަ، އެ މުއްދަތު ފާއިތުވާތާ 30 ދުވަހުގެ ތެރޭގައި އެޓާނީޖެނަރަލްގެ އޮފީހުން ކޯޓަށް އެކަން އަންގަން ވާނެއެވެ.
އޭޖީ އޮފީހުން ބުނީ ޖޫރިމަނާ އަދަބު ކަނޑައަޅާފައިވާ މީހުންގެ މަޢުލޫމާތު މޯލްޑިވްސް އިންލޭންޑް ރެވެނިއު އޮތޯރިޓީ (މީރާ) މެދުވެރިކޮށް ހޯދައި, ޖޫރިމަނާ ފައިސާ ނުދައްކާމީހުންގެ މަޢުލޫމާތު ކޯޓަށް ހުށަހެޅުމުގެ މަސައްކަތް އެއޮފީހުން މިހާރު ކުރަމުންދާކަމަށެވެ.
އެ އޮފީހުން މިހާތަނަށް ހޯދި މަޢުލޫމާތަށް ބަލާއިރު ބައެއް މީހުންގެ މައްޗަށް ކުށުގެ އަދަބުގެ ގޮތުގައި ކަނޑައަޅާފައިވާ ޖޫރިމަނާ ފައިސާ, ޙުކުމާ އެއްގޮތަށް ދައްކަމުން ނުދާކަން ވަނީ ފާހަގަވެފައިކަމަށްވެސް އޭޖީ އޮފީހުން ވިދާޅުވެއެވެ.
އެފަދަ މީހުންގެ މައްޗަށް އަލުން ޖަލު އަދަބު, ނުވަތަ ޖޫރިމަނާ އަދަބަށްވުރެ ބުރަ އަދަބެއް، ފަނޑިޔާރަށް ކަނޑައެޅޭނެކަމަށް ޤާނޫނުގައި ބުނާކަން އޭޖީ އޮފީހުން ފާހަގަކުރެއެވެ.
