ކުރިއަށް އޮތް ރިޔާސީ އިންތިޚާބުގައި ވެރިކަން ކުރާ މައި ޕާޓީ އެމްޑީޕީގެ ރިޔާސީ ކެންޑޭޓަށް ކަނޑައަޅާ ބޭފުޅަކު ހޮވުމަށް ބާއްވާ ރިޔާސީ ޕްރައިމަރީގައި އެޕާޓީގެ ރައީސް އަދި ރައްޔިތުންގެ މަޖިލީހުގެ ރައީސް މުޙައްމަދު ނަޝީދު ވާދަކުރައްވަން ނިންމަވައިފިއެވެ.
ރައީސް ނަޝީދުގެ އަރިސް ބޭފުޅަކުވަނީ މިކަން ޚަބަރު އޮންލައިނަށް ކަށަވަރުކޮށްދެއްވާފައެވެ. އޭނާ ވިދާޅުވިގޮތުގައި ނައީސް ނަޝީދު ޕްރައިމަރީގައި ވާދަކުރައްވައި ކާމިޔާބުވެސް ކުރައްވާނެއެވެ. އެކަން ވިޔަނުދެއްވަން ސަރުކާރަށް ތާޢީދުކުރާ އެމްޑީޕީގެ ބައެއް މީހުން ކިތަންމެ މަސައްކަތެއް ކުރިޔަސް އެކަން ވާނެކަމުގެ ޔަޤީންކަން އެބައޮތްކަމަށް އޭނާ ވިދާޅުވިއެވެ.
ރައީސް ނަޝީދުގެ ޕްރައިމަރީ ކެމްޕެއިން ފެށުމަށް ހަމަޖެހިފައިވަނީ ގދ.ތިނަދޫގައެވެ. އެމަނިކުފާނު ވަނީ މިކަމަށްޓަކައި ކިހާރު ކެމްޕެއިން ޓީމެއް ހައްދަވައި އެޓީމާއެކު ބައްދަލުވުންތައް ބާއްވަން ފައްޓަވާފައެވެ.
އެމްޑީޕީގެ ރިޔާސީ ޕްރައިމަރީ ބާއްވާނެ ތާރީޚެއް އަދި އެޕާޓީން ހާމައެއް ނުކުރެއެވެ. އެމްޓީޕީގެ ޗެއާޕާސަންއަކަށް އިކޮނޮމިކް މިނިސްޓަރ ފައްޔާޒު އިސްމާޢީލް ހޮވުމާއެކު ޕާޓީގެ ހުރިހާ ހިސާބެއްގެ ކޮންޓްރޯލް މިވަގުތު އޮތީ ރައީސް އިބްރާހީމް މުޙައްމަދު ޞާލިޙުގެ އަތްޕުޅުގައެވެ. ރައީސް އިބްރާހީމް މުޙައްމަދު ޞާލިޙާއި ރައީސް ނަޝީދުގެ މެދުގައި ޚިޔާލު ތަފާތުވެ ދެބޭފުޅުންނަށް ތާޢީދުކުރާ ޢާމުން މެމްބަރުންނާއި ރައްޔިތުންގެ މަޖިލީހުގެ މެމްބަރުން ވަނީ ދެބަޔަކަށް ބެހި ދެ ފެކްޝަން ހަދާފައެވެ.
ރައީސް އިބްރާހީމް މުޙައްމަދު ޞާލިޙް ވިދާޅުވެފައިވަނީ، ގިނަ ޕާޓީތަކާއެކު ހަދާ ކޯލިޝަނަކުން ނޫނީ އެއްވެސް ބޭފުޅަކަށް އަދި ރާއްޖޭގެ ވެރިކަމަށް ވަޑައިގަނެވޭނެ ގޮތެއް ނެތްކަމަށެވެ. އަދި މިވަގުތު ރާއްޖޭގެ ޙާލަތު އޮތްގޮތުން ގިނަ ޕާޓީތަކުން ކޯލިޝަން ހަދާނެ ހަމައެކަނި ލީޑަރަކަށް ހުންނެވީ އެމަނިކުފާނުކަމަށެވެ. އެހެންކަމުން އެމްޑީޕީން އަންނަ ރިޔާސީ އިންތިޚާބު ކާމިޔާބުކުރަން ބޭނުންވާނަމަ އޮތް ޗޮއިސްއަކީ އެމަނިކުފާނުކަމަށެވެ.
އެހެންނަމަވެސް ރައީސް ނަޝީދު ވިދާޅުވެފައިވަނީ ރައީސް ޞާލިޙަކަށް ތާޢީދު ނުކުރައްވާނެކަމަށެވެ. އަދި ސަރުކާރުގެ ތެރޭގައި ކޮރަޕްޝަނާއި ފަސާދަ އިންތިހާއަށް އެބައޮތްކަމަށާ، ސަރުކާރުގެ ހިންގުން ބޮއްސުންލާފައިވާކަމަށް ނަޝީދައި އޭނާއަށް ތާޢީދުކުރާ މެމްބަރުން ތުހުމަތުކުރެއެވެ.
ކުރިއަށް އޮތް ރިޔާސީ އިންތިޚާބުގައި އިދިކޮޅު ރިޔާސީ ކެންޑިޑޭޓެއްގެ ގޮތުގައި ހުންނެވީ ކުރީގެ ރައީސް ޔާމީނެވެ. އެމަނިކުފާނު ގެންދަވަނީ ކެމްޕެއިންވެސް ކުރައްވަމުންނެވެ. އެހެންނަމަވެސް އެމަނިކުފާނުގެ މައްޗަށް ކުރިއަށްދާ ޝަރީޢަތްތަކުގެ ސަބަބުން އިންތިޚާބުގައި ވާދަކުރުމުގެ ފުރުސަތު ގެއްލުމުގެ ބިރު އެބައޮތެވެ.
