ހުޅުމާލޭގައި ރޮބަޓް ޓެކްނިލޮޖީއާއެކު ސްކޫލެއް ތަރައްގީ ކުރުމަށް ވިލާ އެޑިއުކޭޝަން ސާވިސަސް ޕްރައިވެޓް ލިމިޓެޑްއާއެކު އެޗްޑީސީން އެއްބަސްވުމެއްގައި ސޮއި ކޮށްފިއެވެ. މި ސްކޫލް އެޅުމަށް ހަމަޖެހިފައިވަނީ ހުޅުމާލޭ ފޭސް 1 ގައެވެ.
މި އެއްބަސްވުމުގައި ވިލާ އެޑިއުކޭޝަންގެ ފަރާތުން ސޮއިކުރެއްވީ ވިލާ ކޮލެޖްގެ ރެކްޓަރ އަހުމަދު އަންވަރެވެ. އެޗްޑީސީގެ ފަރާތުން ސޮއި ކުރެއްވީ އެ ކޯޕަރޭޝަންގެ މެނޭޖިން ޑިރެކްޓަރ އަހުމަދު އާތިފްއެވެ.
ވިލާ އެޑިއުކޭޝަންގެ ފަރާތުން ބިނާކުރާ މި ސުކޫލްގައި 6 ފަންގިފިލާއާއެކު ޖުމްލަ 20 ކްލާސްރޫމް ހުންނައިރު، ޖުމްލަ 761 ދަރިވަރުންގެ ޖާގައިގެ މި ސުކޫލުގައި ގްރޭޑް 1އިން 12 އަށް ކިޔަވައިދިނުމަށް ހަމަޖެހިފައިވެއެވެ. އޭގެ އިތުރުން ޚާއްސަ އެހީއަށް ބޭނުންވާ ކުދިންނަށް ކިޔަވައިދެވޭނެ އިންތިޒާމްގެ އިތުރުން ރޮބޮޓިކް ލެބްވެސް މި ސުކޫލުގައި ގާއިމްކުރެވިފައި ހުންނާނޭކަން އެޗްޑީސީން ހާމަ ކޮށްފައިވެއެވެ.
ވިލާ އެޑިއުކޭޝަންގެ ފަރާތުން ހުޅުމާލޭގައި މި ސްކޫލް ގާއިމްކުރުމުން، ވަޒީފާގެ ގިނަ ފުރުސަތުތަކެއްވެސް ތަނަވަސްވެގެން ދާނެކަމަށް އެޗްޑީސީން ބުނެފައި ވެއެވެ. މިގޮތުން އެކަޑަމިކް ދާއިރާއާއި އެޑްމިނިސްޓްރޭޓިވް ދާއިރާއިން 100 ވަރަކަށް ވަޒީފާގެ ފުރުސަތު ތަނަވަސް ވެގެންދާނެކަމަށް އެކުންފުނިން ބުނެފައި ވެއެވެ.
