ރާއްޖޭގެ ހުރިހާ ރައްޔިތުންގެ އާންމު ސިއްޙީ ހާލަތު ދެނެގަތުމަށް ޚާއްސަ ކޮށްގެން ކުރިޔަށް ގެންދާ ޕްރޮގްރާމެއް އަންނަ އަހަރުގެ ކުރީކޮޅު ފެށުމަށް ހަމަޖެހިފައިވާކަމަ ހެލްތު މިނިސްޓަރު އަހުމަދު ނަސީމް ވިދާޅުވެއްޖެއެވެ.
އޭނާ މިކަން ހާމަ ކުރައްވާފައިވަނީ ޕީއެސްއެމް ނިއުސްއަށް މައުލުމާތު ދެއްވަމުންނެވެ. އޭނާ ވިދާޅުވި ގޮތުގައި މި ޕްރޮގްރާމް ފެށުމަށް ހަމެޖެހިފައިވަނީ އަންނަ އަހަރުގެ ޖެނުއަރީމަހުގެ ފަހުކޮޅު ނުވަތަ ފެބްރުއަރީމަހު ކުރީކޮޅު، ރާއްޖޭގެ ހުރިހާ ރައްޔިތުންނަށް އަމާޒު ކޮށްގެންނެވެ.
ޕީއެސްއެމްއަށް މައުލޫމާތު ދެއްވަމުން ނަސީމު ވިދާޅުވެފައިވަނީ، މި ޕްރޮގްރާމް ނަތީޖާއެއްގެ ގޮތުން ތަފާތު ބަލިތައް ހުރި މީހުން ދެކެނަގެވުމުގެ އިތުރުން، ކިޑްނީގެ ބަލިތަކާއި، ލޭމައްޗަށް ދިއުމާއި، ހަކުރު ބައްޔާއި އަދި ކެންސަރު ބަލިތައްފަދަ، ރާއްޖޭގައި ވަރަށް އާންމުކަމަށް ބެލެވޭ ބަލިތަކަށް އަވަހަށް ފަރުވާ ފޯރުކޮށްދިނުމުގެ ފުރުސަތު ފަހިވެގެން ދާނެއެވެ.
ނަސީމު ވިދާޅުވި ގޮތުގައި މިހާރުގެ ހާލަތަށް ބަލާއިރު، ހަކުރު ބަލިތައްފަދަ ބަލިތައް ހުންނަ މީހުންނަށް އެފަދަ ބަލިތައް ހުންނަ ކަމެއްވެސް ނެގޭކަމަށެވެ. އަދި މި ޕްރޮގްރާމްގެ ސަބަބުން މިފަދަ އާންމު ބަލިތައް ހުންނަ މީހުން ފަސޭހައިން ދެނެގަނެވޭނެކަމަށްވެސް އޭނާ ވިދާޅުވެފައި ވެއެވެ.
މިނިސްޓަރު ނަސީމު އިތުރަށް ވިދާޅުވެފައިވާ ގޮތުގައި ކުރިޔަށް އޮތްތަނުގައި ސިއްޙީ ރެކޯޑް ބެހެއްޓުމަށްޓަކާ ޑިޖިޓަލް ނިޒާމެއް ގާއިމް ކުރުމަށް މަސައްކަތްވެސް މިނިސްޓްރީން ގެންދަނީ ކުރަމުންނެވެ.
