މާލޭގައި ޢާންމު ދަތުރުފަތުރުގެ ނިޒާމެއް ޤާއިމުކުރުމުގެގޮތުން ފަށާފައިވާ އާރުޓީއެލްގެ ބަސްތަކުގެ ގޮނޑިތަކުގައި ބޭއަދަބީ މަންޒަރުތައް ކުރަހައި ލެޔެ ހަދާފައި ހުންނާނީ، ބަހުގެ ޚިދުމަތް ފޯރުކޮށްދޭ ކުންފުނި އެމްޓީޓީސީން ކަންބޮޑުވުން ފާޅުކޮށް އެފަދަކަންކަން ނުކުރަން ޢާންމުންނަށް އިލްތިމާސްކޮށްފިއެވެ.
އާރުޓީއެލްގެ ބަސްތަކަކީ މާލެއާއި ހުޅުމާލޭގައި ދިރިއުޅޭ އެތައް ބަޔަކު ބޭނުންކުރަމުން އަންނަ ދަތުރުފަތުރުގެ ޚިދުމަތެކެވެ. އެޚިދުމަތް ހޯދާ މީހުންގެ ތެރޭގައި ގިނަ ޢަދަދެއްކެ ކުޑަކުދިންނާއި ސްކޫލްކުދިން ހިމެނެއެވެ. އެހެންކަމުން ބޭއަދަބީ ބަސްތައް ބަހުގެ ގޮނޑިތަކުގައި ލިޔެފައި ހުންނާތީ ބައެއް ބެލެނިވެރިންނާއި ޢާންމުންވެސްވަނީ މީގެކުރިން ކަންބޮޑުވުން ފާޅުކޮށްފައެވެ. މިކަމާ ގުޅިގެން ބަހުގެ ޚިދުމަތް ފޯރުކޮށްދޭ އެމްޓީސީން ކުރި ޢިއުލާނެއްގައި ވަނީ އެކުންފުނިން ފޯރުކޮށްދޭ ފެރީއާއި ބަހުގެ ޚިދުމަތް ބޭނުންކުރާ ބައެއް މީހުން އެތަކެތީގެ ގޮނޑިތަކުގައި ބޭއަދަބީ ބަހުން ލިޔެ ކުރަހާފައިވާކަން ފާހަގަކުރެވޭކަމަށެވެ. މިއީ އެކި ޢުމުރުގެ މީހުން ބޭނުންކުރާ ޚިދުމަތަކަށް ވެފައި ބައެއްގެ ނާތަހުޒީބު މިޢަމަލުތަކުގެ ގެއްލުން އެތައްބަޔަކަށް ކުރާކަށެވެ. އެހެންކަމުން މިފަދަ ޢަމަލުތައް ހުއްޓާލުމަށް އެމްޓީސީސީން ވަނީ އިލްތިމާސްކޮށްފައެވެ.
ކަސްޓަމަރުންގެ ސަމާލުކަމަށް! pic.twitter.com/Jhk6UwQa0a
— MTCC Plc (@MTCCPlc) November 21, 2022
އެމްޓީސީސީގެ ސީއީއޯ އާދަމް އާޒިމްވެސް ވަނީ މިކަމުގެ ކަންބޮޑުވުން ފާޅުކުރައްވާފައެވެ. މާލޭގެ ޢާންމު ޚުމަތްދޭ ތަންތަނުގެ ފާރުތަކާއި ސިޑިގޮޅިތަކާއި، ފްލެޓުތަކުގެ މިދެންނެވި ތަންތަނާއި ލިފްޓު ތަކުގައި ބޭދަބީ ބަސްބަބުން ލިޔެ ހަޑިހުތު ބަސްތަކާއި ކުރެހުންތައް ހުންނަ މަންޒަރު ފެނެއެވެ. އަދި މިސްކިތްތަކުގެ ފާޚާނާތަކުގައިވެސް ބައެއްފަހަރު މިފަދަ ލިޔުންތަކާއި ކުރެހުންތައް ހުންނާތީ ފެނެއެވެ.
މިކަން ޙައްލުކުރަން ކަމާބެހޭ ފަރާތްތަކުން ދޭތެރެދޭތެރެއިން މަސައްކަތް ފަށައެވެ. އެހެންނަމަވެސް މިއީ މުޖުތަމަޢުގެ ޢާންމުން ތަހުޒީބޔުވެ ޒިންމާދާރުވެގެން ނޫނީ ހުއްޓުވޭނެކަންކަން ނޫންކަމަށް ތަޖުރިބާކާރުން ދެކެއެވެ.
