ނިމިދިޔަ ހަފްތާގެ ބުރާސްފަތި ދުވަސް ވެގެން ދިޔައީ، އެދުވަހުގެ އިރު ފެނުން މައްޗަށް ތޮޅިލުމާއެކު މާލޭގެ ރައްޔިތުންނަށް ބިރުވެރިކަމާއި ސިހުން ގެނުވި ދުވަހަކަށެވެ.

ބުދަ ދުވަހުގެ ރޭގެ މެންދަމު 12:30 ހާއިރު މާފަންނު މ. ނިރުފެހި ގޭގައި ހިންގާ ގަރާޖެއްގައި އަލިފާން ރޯވެ، އެ އަލިފާން އެގަރާޖުގެ މަތީގައި މީހުން ދިރިއުޅެމުންދިޔަ ފަންގިފިލާތަކާހަމައަށް ފޯރާ، ގިނަ ބައެއްގެ ފުރާނަ ގެއްލިއްޖެ ކަމުގެ މައުލޫމާތު މާލެތެރެއަށް އާންމުވާން ފެށީ ބުރާސްފަތި ދުވަހުގެ މެންދަމުން އަލިވެ ހެދުނު ވީފަހުންނެވެ.

މާލޭގައި ފާއިތުވެދިޔަ ތަނުގައި، 2019ވަނަ އަހަރު، ކެމިކަލް ގުދަނެއްގައި ރޯވެ ހިގައިދިޔަ ވަރުގަދަ އަލިފާނުގެ ހާދިސާގައިވެސް ބައެއް މީހުންގެ ފުރާނަ ގެއްލިގެން ދިޔަނަމަވެސް، ފާއިތުވެދިޔަ ހަފްތާގައި ހިގައިދިޔަ އަލިފާނުގެ ހަދިސާ ވެގެންދިޔައީ ފަހުގެ ތާރީޙެއްގައި ރާއްޖޭގައި ހިގައިދިޔަ އެންމެ ހިތާމަވެރި ހާދިސާ ކަމުގައެވެ.

ސަބަބަކީ މިހާދިސާގައި 10 މީހެއްގެ ފުރާނަ ގެއްލިގެން ގޮސް، 2004 ވަނަ އަހަރު ރާއްޖެއަށް ދިމާވި ސުނާމީގެ ކާރިސާގެ ފަހުން، ރާއްޖޭގައި އެއްފަހަރާ ގިނަބައެއްގެ ފުރާނަ ގެއްލިގެންދިޔަ އެންމެ ހިތާމަވެރިހާ ދިސާގެ ގޮތުގައި މިހާދިސާގެ ވާހަކަ ތާރީޚުގައި ލިޔެވިގެންދާނެތީވެސްމެއެވެ.

ފާއިތުވެދިޔަ ހަފްތާގެ ބުރާސްފަތި ދުވަހުގެ ރޭ މ. ނިރުފެހިގައި ހިންގާ ގަރާޖެއްގައި އަލިފާން ރޯވެ ހިގައިދިޔަ ނުރައްކާތެރި އަލިފާނުގެ ހާދިސާގައި 10 މީގެއް ފުރާނަވަނީ ގެއްލިފައެވެ. މިމީހުންނަކީ އަލިފާން ރޯވި ގަރާޖުގެ މަތީ ފަންގި ފިލާތަކުގައި ހަދާފައިވާ އެކޮމޮޑޭޝަން ބްލޮކްތަކުގައި ދިރިއުޅެމުންދިޔަ ބިދޭސީންނެވެ.

އޭގެ ތެރޭގައ،ި ނިޔާވި 9 މީހަކު ދެނެގަނެވިފައިވާކަން ފުލުހުން މިހާރުވަނީ ހާމަ ކޮށްފައެވެ. އޭގެ ތެރޭގައި ހިމެނެނީ އިންޑިއާގެ 3 އަންހެނަކާއި، ބަންގްލަދޭޝްގެ އަންހެނަކާއި، އިންޑިއާގެ 4 ފިރިހެނަކާއި، ބަންގްލަދޭޝްގެ ފިރިހެނެކެވެ. މިހާދިސާގައި ނިޔާވި މީހުންގެ ތެރެއިން އެކެއްގެ ހަށިގަނޑު އަދިވެސް ޔަގީން ނުވާކަމަށާއި، އެހެންނަމަވެސް އެއީ ފިރިހެއްނެ ކަމަށް ފުލުހުން ވަނީ ބުނެފައެވެ.

ހާދިސާގައި ނިޔާވި މީހުންގެ ހަށިގަނޑުތައް ވަރަށް ބޮޑަށް އަނދާފައިވާތީ އެމީހުން ވަކިކުރަން ނޭނގޭ ވަރަށް ސިފަ ގެއްލިފައިވާ ކަމަށް ފުލުހުން ކުރިން ވިދާޅުވެފައިވެއެވެ. ފުލުހުން ވިދާޅުވެފައިވަނީ، އެމީހުން ދެނެގަތުމުގެ މަސައްކަތްކުރީ، އާންމުންނަށް ހުޅުވާލައިގެން ލިބުނު މަޢުލޫމާތާއި ފުލުހުން ހެދި ކްރޮސް މެޗްތަކުން ކަމުގައެވެ. އެގޮތުން ފުލުހުން އިއްޔެ ވަނީ ބުދަ ދުވަހުގެ ރެއިން ފެށިގެން ވާނުވާ ނޭނގި ގެއްލިފައިވާ ބިދޭސީންގެ މަޢުލޫމާތު ހިއްސާކޮށްދިނުމަށްވެސް އާންމުގެ ކިބައިން އެދިފައެވެ.

 

ހާދިސާ ހިގުމާއެކު ގިނަ ބަޔަކު ޝަކުވާކުރީ މާލެތެރޭގައި ގަރާޖް ހިންގާތީ!

މ. ނިރުފެހި ގޭގައި ހިންގާ ގަރާޖެއްގައި އަލިފާން ރޯވެ ހިގައިދިޔަ ފަދަ ނުރައްކާތެރި އަލިފާނުގެ ހާދިސާތައް ފާއިތުވެދިޔަ ތަނުގައިވެސް މާލޭގައި ހިގާފައި އެބަހުއްޓެވެ. އާންމު އުސޫލުން މިފަދަ ކޮންމެ ހާދިސާއަކާއެކު އާންމުގެ ޝަކުވާތަކާއި އުދާސްތައް އެކި ގޮތްގޮތުން އުތުރު އަރައިގަނެއެވެ.

2019ވަނަ އަހަރު މާލޭގައި ހިގައިދިޔަ މިފަދަ ބޮޑު އަލިފާނުގެ ހާދިސާގައި މީހުންގެ ފުރާނައަށާއި މުދަލަށް ބޮޑެތި ގެއްލުންތަކެއް ލިބިގެން ދިއުމާއެކު ގިނަބަޔަކު އޭރު ޝަކުވާ ކޮށްފައިވަނީ މާލޭގައި ހުންނަ ކެމިކަލް ގުދަންތައް މާލެއިން ބޭރަށް ނުގެންގޮސްގެންނެވެ.

އެއަށްފަހު ސަރުކާރުންވަނީ ކެމިކަލްތައް ރާއްޖެއަށް އެތެރެ ކުރުމާއި އަދި ގެންގުޅުމުގެ ގަވާއިދަށް ބަދަލު ގެނެސް، މާލޭގައި އޭރުހުރި ކެމިކަލް ގުދަންތައް ޖެހިގެން އައި 3 މަސްދުވަހުގެ ތެރޭގައި ތިލަފުއްޓަށް ބަދަލު ކޮށްފައެވެ.

އަދި އޭގެ ކުރިންވެސް، ރައީސް ޔާމިންގެ ދައުރުއްސުރެ ދެކެވެމުން އައި ވާހަކައަކީ މާލެތެރޭގައި ހިންގަމުންދާ ގަރާޖުތައް މާލޭގެ މީހުން އުޅޭ ސަރަަހައްދުން ދުރަށް ޖައްސާ، މާލޭގެ ހުޅަނގު ފަރާތުގައި އޮންނަ ސިނާއީ ސަރަހައްދަށް ބަދަލު ކުރުމުގެ ވާހަކަތަކެވެ. އެހެންނަމަވެސް މިއަދާއި ހަމައަށްވެސް، އެތައް އަހަރަކުއްސުރެ އެކުލަވާލާފައި އޮތް މި އުސޫލަށް ތަންފީޒު ކޮށްފައެއް ނުވެއެވެ. މާލޭގެ އެކި ސަރަހައްދު ތަކުގައި ހިންގަމުންދާ އެކި ބާވަތުގެ ގަރާޖުތައް މީހުން އުޅޭ ސަރަހައްދުން ދުރަށް ގެންގޮސްފައެއް ނުވެއެވެ.

މިއަދު، އަނެއްކާވެސް މާލޭގައި އަލިފާނުގެ ބޮޑު ހާދިސާއެއް ހިނގާ، އެތައް ބައެއްގެ ފުރާނަ ގެއްލިގެންދިޔަ ހިސާބުން، މިހާރު އެންމެ ބޮޑަށް ބަހުސް ކުރެވެން ފަށާފައިވާ އެއްކަމަކަށް ވެގެން ގޮސްފައިވަނީ ގަރާޖުތައް ސިނާއީ ސަރަހައްދަށް ބަދަލުކުރުމުގެ ވާހަކައެވެ. ގިނަ ބައެއްގެ ޝަކުވާއަކީ އެއީއެވެ.

އެހެންނަމަވެސް، މާލޭގައި ހިނގަމުންދާ ނުރައްކާތެރި އަލިފާނުގެ ހާދިސާތަކާއި، އަދި މިފަދަ ހާދިސާތައް ހިނގަން މެދުވެރިވާ ސަބަބުތަކާއި ދޭތެރޭ ފުންކޮށް ވިސްނާ ފިކުރު ހިންގާލާއިރު، މިފަދަ ކާރިސާތަކުން ސަލާމަތްކުރުމުގެ ވިސްނުމެއް ނުވަތަ ޕްލޭނެއް ކަމާއި ގުޅުންހުރި މުވައްސަސާތަކުގައި އަދިވެސް އެބަހުރިތޯ މިއީ ގިނަބައެއް ހިތުގައި އުފެދިގަން ހިގައިދާނެ ސުވާލެއްކަމުގައި ދަންނަވާން ޖެހެއެވެ.

ސަބަބަކީ، ފާއިތުވެދިޔަ ހަފްތާގައި މާލޭގައި ހިގައިދިޔަ އަލިފާނުގެ ހާދިސާއަކީ ގަރާޖެއްގައި ހުޅު ރޯވެގެން ހިގައިދިޔަ އަލިފާނުގެ ހާދިސާއަކަށް ވިނަމަވެސް، ފެތުރިގެންދިޔަ އަލިފާނުގެ ސަބަބުން ގިނަބަޔަކު މަރުވާން މެދުވެރިވީ ހަގީގީ ސަބަބަކީ އެ ގޭގައި ހިންގަމުންދިޔަ ގަރާޖް ކަމުގައި ބެލެވެން ނެތްކަން މިހާތަނަށް އާންމުވެފައިވާ މައުލޫމާތުތަކުން ސާފުވާން އެބަހުއްޓެވެ.

އޭގެ ބަދަލުގައި، މިހާދިސާގައި މަރުވި ގިނަ މީހުންނަކީ އިންސާނުން ދިރިއުޅުމަށް އެންމެ އެކަށީގެން ނުވާ އެކަމަޑޭޝަންތަކުގައި ދިރިއުޅެމުންދިޔަ ފަރާތްތަކަން އެގެން އެބަހުއްޓެވެ. މިގޮތުން އަލިފާނުގެ ހާދިސާއާއި ގުޅޭގޮތުން މައުލޫމާތު ދެމުން އެމްއެންޑީއެފްއިން ބުނެފައިވަނީ މިއަލިފާނުގެ ހާދިސާ ހިނގި އިމާރާތުގެ ކޮންމެ ކޮޓަރިއެއްގައި ހެން ގޭސްފުޅިއެއް ހުރި ކަމަށާއި އެތަނުގައި ހުރީ ވަރަށް ކުދިކޮށް ހަދާފައި ހުރި 28 ކޮޓަރި ކަމަށެވެ.

މިގޮތުން ބިދޭސީންތަކެއް ދިރިއުޅެމުންދިޔަ ކުދިކުދި ތަންތަންކޮޅުގެ ތެރޭގައި ގިނަ އަދަދެއްގެ ގޭސް ސިލިންޑަރުތައް ހުރިއިރު، މި ގޭސް ސިލިންޑަރުތައް އެންމެ ފަހުން ވެގެންދިޔައީ އަލިފާން ނިއްވުމަށް ކުރެވުނު މަސައްކަތްތަކަށްވެސް ކުރިމަތިވި ބޮޑު ގޮންޖެހުމަކަށެވެ. އަދި މީހުން މަރުވި ދެ ފަންގިފިލާގައިވެސް ބިދޭސީން ނިދުމަށް ހަދާފައިހުރި ކުދިކުދި ކޮޓަރިތަކުގައި ކޮންމެ ކޮޓަރިއެއްގައި ކައްކާ ގޭސް ހުރި ކަމަށްވެސް އެމްއެންޑީއެފްއިން މައުލޫމާތު ދީފައިވެއެވެ.

އެހެންނަކަމުން ގިނަ ބައެއްގެ ފުރާނަ ގެއްލިގެންދިޔަ މި އަލިފާނުގެ ހާދިސާއަކީ އިމާރާތުގައި ހުރި ގަރާޖެއްގައި ރޯވެގެން މެދުވެރިވީ ހާދިސާއެއްކަމަށް މިހާތަނަށް އާންމު ވެފައިވާ މައުލޫމާތުތަކުން އެގެން ހުރި ނަމަވެސް، މިހާދިސާގައި ގިނަބަޔަކު މަރުވާން މެދުވެރިވީ ހަގީގީ ސަބަބަކީ ބިދޭސީން ދިރިއުޅެމުންދިޔަ ތަންތަނުގެ ހާލަތު ހުރިގޮތުންކަން ވަރަށްވެސް ސާފުކޮށް އެގެންހުރިކަމީ ކަށަވަރުވެ ޔަގީންވާ ކަމެކެވެ.

ހަގީގީ މައްސަލައަކީ ދިރިއުޅުމުގެ ހާލަތާއި އިމާރާތްތަކުގެ ހާލަތު!

މާލޭ ތެރޭގައި ހުރި ކެމިކަލް ގުދަންތައް މާލެއިން ބޭރުކުރެވި، ކެމިކަލް ގެންގުޅުމުގެ އުސޫލުތަކަށް ސަރުކާރުން ގެނެސްފައިވާ ބަދަލަކީ މުހިންމު މަސައްކަތެއްގެ ގޮތުގައި ފާހަގަ ކުރާން ޖެހެއެވެ. ހަމައެއާއެކު، މާލެތެރޭގެ މީހުން އުޅޭ ސަރަހައްދުތަކުގައި ހުރި ގަރާޖްތައްވެސް މީހުން އުޅޭ ސަރަހައްދުތަކުން ދުރަށް ޖެއްސުމަކީވެސް ހަމަ އެހާމެ މުހިންމުކަމެއް ކަމުގައިވެސް ގަބޫލު ކުރާން ޖެހެއެވެ.

އެހެންނަމަވެސް އެއަށްވުރެ ބޮޑަށް، މިފަދަ ނުރައްކާތެރި ހާދިސާތައް ހިގައިގެން ދިޔަ ނުދިނުމަށާއި، އަދި ހިނގާ ހާދިސާތަކުގައި ލިބޭ ގެއްލުންތައް ކުޑަ ކުރުމަށްޓަކާ ސަމާލުކަން ދޭންޖެހޭ، ހައްލު ހޯދާންޖެހިފައިވާ އެއަށްވުރެ މާމުހިންމު މައްސަލަތައް ހުރިކަން ގަބޫލުކޮށް، އިސްލާހީ ބަދަލުތައް ގެނައުން މިއަދު މިވަނީ މާބޮޑަށްވެސް ލަސްވެގެން ގޮސްފައެވެ.

މާލޭގެ ކޮށްފައިވާ އިމާރާތްތަކާއި، އަދި ވަކީން ޚާއްސަކޮށް ބިދޭސީން ދިރުއުޅެމުންދާ ތަންތަނަކީ އިންސާނުން ދިއިރުޅުމަށް އެކަށީގެން ނުވާ ތަންތަނެވެ. މިތަންތަން މޮނިޓަރ ކުރެވެމުންނެއް ނުދެއެވެ. ބިދޭސީންނަކީ އަދިވެސް މާލޭގައި އުޅޭނެ ގޮތަކަށް އުޅެން ދޫކޮށްލެވިފައި ތިބި ބައެކެވެ. އެމީހުން ރާއްޖެ ގެންނަ ފަރާތްތަކުން އެމީހުން ގެންގުޅެމުންދަނީ އެމީހުންގެ ހައްގުތައް ކަށަވަރު ކޮށްދީގެންތޯ ބަލާނޭ ފަރާތެއް ނެތެވެ.

ހަމައެއާއެކު، މާލޭއާއި ހުޅުމާލޭއާއި އަދި ކައިރީގަ އޮތް ވިލިމާލޭގައިވެސް ހަދަމުންދާ އިމާރާތްތައް ޑިޒައިންކޮށް، ހެދުމުގައި، ސަލާމަތާއި ރައްކާތެރިކަމަށް ސަމާލުކަން ދެވިފައެއް ނުހުރެއެވެ. އެމަޖެންސީ އެގްޒިޓްތައް އެކަށީގެންވާ ގޮތެއްގައި ގާއިމް ކުރެވިފައެއް ނުހުރެއެވެ. އަލިފާން ނިއްވާ ނިޒާމުތައް އެކަށީގެންވާ ގޮތެއްގައި ގާއިމް ކުރެވިފައި ނުހުންނަ ތާގައި، ބައެއް އިމާރާތްތަކުގައި ގާއިމްކުރެވިފައިވާ މިނިޒާމްތައް އެކަށީގެންވާ ގޮތުގައި މަސައްކަތް ކުރޭތޯ މޮނިޓަރ ކުރެވެމުންނެއްވެސް ނުދެއެވެ.

މުޅިން އަލަށް ޑިޒައިން ކުރެވިގެން މީހުން އާބާދުވަމުންދާ ހުޅުމާލޭގެ ދެވަނަ ފޭހުގައި މިހާރުވެސް އެތައް ހާސް އާއިލާއެއް ދިރިއުޅެމުން ދާއިރު، ހިޔާ ފްލެޓްގައިވެސް ކުއްލި ކާރިސާއަކުން ސަލާމަތްވުމަށް އެންމެ އެކަށީގެންވާ އިންތިޒާމްތައް އެކަށައެޅިފައި ނެތްކަން މިފުރުސަތުގައި ފާހަގަކުރާން ޖެހެއެވެ.

އޭގެ އިތުރުން، ގަބޫލުރާން ޖެހިފައިވާ އަނެއް ހަގީގަތަކީ، މިބީދއަިން ކުރިމަތިވާ ކުއްލި ކާރިސާތަކުން ސަލާމަތް ވުމަކީ ހަމައެކަނި ވަސީލަތްތައް ގާއިމް ކުރެވުމުން އެކަނި ހައްލުކުރެވެން ހުރި މައްސަލަތަކެއް ނޫންކަމެވެ. މާލޭފަދަ މީހުން ބައިބޯ، އަދި ތޮއްޖެހިފައިވާ ތަނެއްގައި ދިރިއުޅެމުންދާ އާންމު ރައްޔިތުންނާއި ހަމައަށް ކުއްލި ކާރިސާތަކުން ސަލާމަތް ވާނޭ ގޮތްތަކާބެހޭ މައުލޫމާތު ފޯރުކޮށްދެވެސް ޖެހެއެވެ.

ޑްރިލްތައް ހިންގާ، މިފަދަ ހާލަތެއްގައި އަމަލުކުރާންޖެހޭ ގޮތްތަކާއި ގުޅުންހުރި ފުރިހަމަ މައުލޫމާތު އާންމު ރައްޔިތުންނާއި ހަމައަށް ފޯރުކޮށްދެވެންވެސް ޖެހޭމެއެވެ.

އެހެންކަމުން، މިފަދަ ކަންކަމަކީ ގިނަ ދުވަސްތަކަކުން ހައްލުކުރެނޭ ކަންކަމުގެ ގޮތުގައި ދެކި، އެވިސްނުމުގައި ދެމި ތިބޭހާ ހިދަކުން، މިފަދަ ކާރިސާތަކުން ލިބޭ ގެއްލުން ކުޑަކުރެވޭނެ ތަނެއް ނުފެންނާނެއެވެ. މީހުންގެ ފުރާނަތައްވެސް ދާނީ ގެއްލެމުންނެވެ. އޭގެ ބަދަލުގައި ބޭނުމީ، ވިސްނުންތެރިކަމާއި، ނަތީޖާ ނެރުމުގެ ޝައުގާއި، ތަންފީޒު ކުރުމަށްޓަކާ އެކަށައެޅިފައިވާ ހަރުދަނާ ޕްލޭނެކެވެ.