ޓުވިޓަރގެ ވެރިފައި ކޮށްފައިވާ އެކައުންޓުތަކަށް ދޫކުރަމުން އަންނަ ނޫކުލައިގެ ބެޖް، މަހަކަށް 7.99 އެމެރިކާ ޑޮލަރަށް އެކުންފުނިން ވިއްކަން ފަށައިފިއެވެ.
ނޫ ބެޖް ހިމެނޭ ގޮތަށް އެކުންފުނިން އާ ސަބްސްކުރިޕްޝަން ސާވިސްއެއް ތައާރަފް ކޮށްފައިވަނީ، 44 ބިލިއަން ޑޮލަަރަށް، ދުނިޔޭގެ އެންމެ މުއްސަދި މަހުޖަނު އެލޮން މަސްކު ޓުވިޓަރ ގަތުމަށްފަހު އެ ޕްލެޓްފޯމަށް ގެންނަމުންދާ ބަދަލުތަކުގެ ތެރެއިންނެވެ.
އެޕްލް އައިއެސްއޯ ޑިވައިސްތަކަށް މިހާރު ލިބިފައިވާ އަޕްޑޭޓްތަކުގައި ވާގޮތުން ޓުވިޓަރ އިން ބުނެފައިވަނީ އެ ޕްލެޓްފޯމަށް ސައިން-އަޕް ކުރާ ފަރާތްތަކަށް، ސަބްސް ކުރިޕްޝަން ޚިދުމަތުގެ ބޭނުން ކޮށްގެން، "އެމީހުން ފޮލޯ ކުރަމުންދާ ސެލެބްރިޓީންނާއި، ކުންފުނިތަކާއި، ސިޔާސީ މީހުންނެކޭ އެއްފަދައިން" އެމީހުންގެ ނަމުގެ ކަރީގައި މިހާރު ނޫކުލައިގެ ބެޖް ބޭންދޭނެ ކަމުގައެވެ.
މި ހަފްތާގެ ހުކުރު ދުވަހުން ފެށިގެން ޓުވިޓައިން އެކުންފުނީގެ ގިނަ އަދަދެއްގެ މުވައްޒަފުން ވަޒީފާއިން ވަކުކުރަން ފަށާފައިވާއިރު، ގިނަ ބަޔަކު ދަކޭގޮތުގައި، ކޮންޓެންޓް މޮޑެރޭޝަންއާއި ވެރިފިކޭޝަން ސިސްޓަމަށް ބަދަލު ގެނެސްފިނަމަ، ކުންފުންޏަށް މިހާރު އަންނަމުދާ ބަދަލުތަކުގެ ސަބަބުން، ފާއިތުވެދިޔަ ތަނުގައި ޕަބްލިކް އޭޖެންސީތަކުންނާއި އިލެކްޝަން ބޯރޑުތަކުންނާއި އަދި އޭގެ އިތުރުން އެތަކެއް ޕޮލިސް ޑިޕާޓްމަންޓްތަކުންވެސް މައުލޫމާތުގެ ސައްހަކަން ކަށަވަރު ކުރުމަށް ބޭނުންކުރަމުން އަންނަ މި ޕްލެޓްފޯމަކީ އެތައް ބަޔަކު ގާނޫނާއި ޚިލާފް ކަންކަމަށް ބޭނުންކުރާ ޕްލެޓްފޯމަކަށް ބަދަލުވެގެން ދިއުމުގެ ފުރުސަތު ވަރަށް ބޮޑެވެ.
ޓުވިޓަރއަށް މިހާރު ގެންނަމުންދާ ބަދަލުތަކާއެކު، 2009 ވަނަ އަހަރުން ފެށިގެން އެ ކުންފުނިން ތައާރަފްކުރި ވެރިފިކޭޝަން ސިސްޓަމަށް ނިމުން އަންނާނެއެވެ. 2009 ވަނަ އަހަރުން ފެށިގެން އެ ކުންފުނިން ކުރިޔަށް ގެންދިޔަ ވެރިފިކޭޝަން ސިސްޓަމަކީ ސެލެބްރިޓީންނާއި ހައި ޕްރޮފައިލް އެކައުންޓަކަށް ސައްހަކަން ކަށަވަރުކޮށްދީ އެއީ ކޮންބައެއްކަން ޔަގީން ކޮށްދިނުމުގެ ގޮތުން ދެމުން އައި ޚިދުމަތެކެވެ.
ޓުވިޓަރގެ ވެރިފިކޭޝަން ސިސްޓަމަށް ބަދަލު ގެނައުމުގެ ކުރިން އެ ޕްލެޓްފޯމުގައި ވެރިކޮށްފައިވާ 423,000 އެކައުންޓް ހުއްޓެވެ. މިގޮތުން ޓުވިޓަރއިންވަނީ އެކައުންޓްތައް ފޮލޯ ކުރާ މީހުންގެ ނިސްބަތަށް ބެލުމެއް ނެތި، ދުނިޔޭގެ އެކި ކަންކޮޅުތަކުން ގިނަ އަދަދެއްގެ ނޫސްވެރިންގެ އެކައުންޓްތައް ވެރިފައި ކޮށްފައެވެ.
ޓުވިޓަރގެ ވެރިފިކޭޝަން ސިސްޓަމަށް ގެނައި ބޮޑު ބަދަލާއެކު، ކޮންމެ ދުވަހަކުވެސް ޓުވިޓަރ ބޭނުންކުރަމުންދާ 238 މިލިއަން މީހުންނަށް އެމީހުން ހޯދާ މައުލޫމާތުގެ ސައްހަކަން ކަށަވަރުކުރުމަށް ބޭނުން ކުރަމުން އައި މި ވަސީލަތުން ދެން ލިބޭ މައުލޫމާތަކީ ސައްޙަ މައުލޫމާތުކަން ކަށަވަރު ނުކުރެވިދާނެތީ ތަޖުރިބާކާރުން ވަނީ ކަންބޮޑުވުން ފާޅު ކޮށްފައެވެ.
ޓުވިޓަރއިން މިހާރު ވެރިކޮށްފައިވާ ފަރާތްތަކުގެ ތެރޭގައި، ސޯޝަލް މީޑިއާގައި ނުފޫޒުގަދަ ފަރާތްތަކާއި، ސެލެބްރިޓީންނާއި، އެތުލީޓުންނާއި، ހައި ޕްރޮފައިލް މަޝްހޫރު ފަރާތްތަކާއި، ސަރުކާރުތަކުގެ އޭޖެންސީތަކާއި، ސިޔާސީ މީހުންނާއި ނޫސްވެރިންނާއި އެކްޓިވިސްޓުންނާއި ވިޔަފާރިތަކާއި މަޝްހޫރު ބްރޭންޑްތައްވެސް ހިމެނެއެވެ.
އެލޮން މަސްކު ވިދާޅުވެފައިވަނީ އޭނާ ޓުވިޓަރ ގަތުމަށްފަހު، މަޝްހޫރު ސްޕޮންސަކުން އެ ޕްލެޓްފޯމު ދޫކޮށްލުމާއެކު ކޮންމެ ދުވަހަކުވެސް 4 މިލިއަން ޑޮލަރު އެ ކުންފުންޏަށް ގެއްލުން ވަމުން ދާކަމުގައެވެ. އަދި އޭނާ ވިދާޅުވެފައިވަނީ ކުންފުންނަށް ގެންނަ ބަދަލުތަކަކީ، ސްޕޮންސަރުންނަަށް ބަރޯސާ ނުވެ ޕްލެޓްފޯމު ހިންގުމަށްޓަކާ ގެންނަމުންދާ ބަދަލުތަކެއް ކަމުގައެވެ.
ޓުވިޓަރ އަޕްޑޭޓް ބުނާ ގޮތުގައި މިހާރު ގެނެސްފައިވާ ބަދަލުތައް އެންމެ ފުރަތަމަ ތައާރަފް ކޮށްފައިވަނީ އިނގިރޭސިވިލާތާއި، އެމެރިކާއާއި، ކެނެޑާއާއި އޮސްޓްރޭލިއާ އަދި ނިއު ޒީލޭންޑްގައެވެ.
މިބަދަލުތަކާއެކު މިހާރު ވެރިކޮށްފައިވާ އެކައުންޓަތަކަށް ވެގެންދާނެ ގޮތެއް ޓުވިޓައިން ހާމަ ކޮށްފައެއް ނުވެއެވެ. މިހާރު ވެރިފައި ކޮށްފައިވާ އެކައުޓްތަކަށް ވެގެންދާނެ ގޮތަކާއި ގުޅޭގޮތުން މީހަކު ކޮށްފައިވާ ސުވާލަކަށް ޖަވާބު ދެއްވަމުން އެލޮން މަސްކު ވިދާޅުވެފައިވަނީ މިހާރު ގެންނަމުންދާ ބަދަލުތައް ތަންފީޒު ކުރުމަށް މަސްތަކެއް ނަގާނެ ކަމުގައެވެ.
