މިމަހު މިސްރުގައި ފަށާ މޫސުމާބެހޭ އދ.ގެ ބައްދަލުވުން ކޮޕް27 ގައި ސްރީލަންކާ ތަމްސީލު ކުރައްވަން ރާއްޖޭގެ ރައްޔިތުންގެ މަޖިލީހުގެ ރައީސް, ރައީސް މުޙައްމަދު ނަޝީދު ވަޑައިގަތުމުން، ކުރީގެ ބަންޑާރަނައިބު އަދި މަޝްހޫރު ޤާނޫނީ ވަކީލް ޑރ.މުޙައްމަދު މުނައްވަރު ނުރުހުން ފާޅުކުރައްވައިފިއެވެ.
ޑރ.މުނައްވަރުވަނީ ނަޝީދަށް މުހިންމު ސުވާލުތަކެއް އަމާޒުކުރައްވާފައެވެ. ދިވެހިރާއްޖޭގެ ރައްޔިތުންގެ މަޖިލީހުގެ ޢިއްޒަތްތެރި ރައީސް ވީ ދިވެހިރައްޔިތުންގެ ފައިސާއިން މުސާރަ ނަގައިގެން އެހެން ގައުމެއްގެ ވަފުދުގައި އެ ގައުމު ތަމްޘީލުކުރައްވަން ވަޑައިގެންކަން ފާހަގަކުރައްވައި ޑރ.މުނައްވަރުވަނީ "ކޮބައިތޯ ދިވެހި ގައުމު؟ ކޮބައިތޯ ދިވެހި ދައުލަތަށް ވަފާތެރި ވުމަކީ؟" މިހެން ސުވާލުކުރައްވާފައެވެ.
سبحان الله ދިވެހިރާއްޖޭގެ ރައްޔިތުންގެ މަޖިލީހުގެ ޢިއްޒަތްތެރި ރައީސް ވީ ދިވެހިރައްޔިތުންގެ ފައިސާއިން މުސާރަ ނަގައިގެން އެހެން ގައުމެއްގެ ވަފުދުގައި އެ ގައުމު ތަމްޘީލުކުރަންގޮހޯ.ކޮބައިތޯ ދިވެހި ގައުމު؟ ކޮބައިތޯ ދިވެހި ދައުލަތަށް ވަފާތެރި ވުމަކީ؟
— Mohamed Munavvar (@MMunavvar) November 5, 2022
ރައްޔިތުންގެ މަޖިލީހުން ވިދާޅުވީ މިޞްރުގެ ޝަރްމުއްޝައިޚްގައި ބާއްވާ އ.ދ.ގެ 2022 ވަނަ އަހަރުގެ ކުލައިމެޓް ޗޭންޖް ކޮންފަރެންސް ( ކޮޕް 27) ގައި ބައިވެރިވެވަޑައިގެންނެވުމަށް މިޞްރަށް ކުރައްވާ ދަތުރުފުޅެއްގައި މަޖިލިސް ރައީސް މުހައްމަދު ނަޝީދު ފުރާވަޑައިގަތީ ހުކުރުދުވަހު ހެނދުނުއެވެ. ރައީސް ނަޝީދު ކޮޕް27 ގައި ތަމްސީލް ކުރުމަށް ހަމަޖެހިފައިވަނީ ސްރީލަންކާގެ ޤައުމީ ވަފުދު މެމްބަރެއްގެ ގޮތުގައެވެ.
ކޮޕް27 ގައި ބައިވެރިވުމަށް ނައިބް ރައީސް ފައިސަލް ނަސީމްވެސް ވަނީ ފުރާވަޑައިގެންފައެވެ. ކޮޕް 27 އިންތިޒާމު ކުރަނީ މިޞްރު ސަރުކާރުންނެވެ. މި ސަމިޓަކީ ޖައްވަށް ބޭރުކުރާ ވިހަ ގޭސްތައް މަދުކުރުމާއި، އެޑަޕްޓޭޝަން މަސައްކަތްތައް ފުޅާކުރުމާއި، އަދި އެކަށީގެންވާގޮތެއްގައި މާލީކަންކަން ފަހިކުރުންފަދަ ދުނިޔޭގެ މޫސުމަށް އަންނަ ބަދަލުތަކާއި ގުޅިގެން އަޅާ ފިޔަވަޅުތައް އެޅުން އަވަސްކުރުމަށް ކަމާގޫޅޭ ހުރިހާ ފަރާތްތައް އެއްތަންކުރުމުގެ ގޮތުން ބާއްވާ ސަމިޓެކެވެ.މި ސަމިޓްގައި ދުނިޔޭގެ އެތައް ޤައުމުތަކުގެ ލީޑަރުން ބައިވެރިވެވަޑައިގަންނަވާއިރު، އެތައް ހާސް ނެގޯޝިއޭޓަރުންނާއި، ސަރުކާރުތަކުގެ މަންދޫބުންނާއި، ވިޔަފާރިވެރިންނާއި، ޢާންމުފަރާތްތަކުން ބައިވެރިވެއެވެ.
ރައީސް ނަޝީދަކީ މޫސުމީ މައްސަލަތަކުގައި ވަކާލާތު ކުރާ ދުނިޔޭގެ ފެންވަރުގެ ލީޑަރެއް ނަމަވެސް ސަރުކާރުން މިފަހަރު ކޮޕް27 އަށް ނަޝީދަށް ފުރުސަތު ނުދެއްވީ ކީއްވެކަމެއް ނޭގެއެވެ. ނަމަވެސް ސިޔާސީ ގޮތުން ރައީސް ނަޝީދާއި، ރައީސް ޞާލިހާއި ދެމެދު ވަރަށްބޮޑަށް ޚިލާޔް ތަފާތުވެފައިވާކަން ފާހަގަކޮށްލެވެއެވެ.
ރާއްޖޭގެ ވަފުދުން ރައީސް ނަޝީދަށް ފުރުސަތު ނުލިބި, އެހެން ޤައުމެއް އެމަނިކުފާނު ތަމްސީލު ކުރައްވާއިރު ރައީސް ނަޝީދުއަކީ ކޮޕް ބައްދަލުވުމުގައި އެންމެ ގިނައިން ބައިވެރިވެވަޑައިގެން ރާއްޖޭގެ ނާޒުކުކަމާއި މޫސުމަށް އަންނަ ބަދަލުތަކުން ރާއްޖެއާއި ރާއްޖެފަދަ ކުދި ގައުމުތަކަށް ކުރިމަތިވަމުންދާ ނުރައްކާ ދުނިޔޭގެ ސަމާލުކަމަށް ގެނައުމަށް ގިނަ މަސައްކަތް ކުރައްވަމުން ގެންދަވާ ބޭފުޅެކެވެ. އަދި އެމަނިކުފާނު ވަނީ ފާއިތުވި 15 އަހަރުގައި ބޭއްވި ކޮޕްގެ ހުރިހާ ބަައްދަލުވުންތަކެއްގައި ރާއްޖެ ތަމްސީލުކޮށް, އެ ބައްދަލުވުންތަކުގެ މަޝްވަރާތަކުގައި އަމަލީ ގޮތުން ބައިވެރިވެވަޑައިގެންފައެވެ.
މިވަގުތު އެމަނިކުފާނަކީ ދިވެހި ދައުލަތުގެ 3 ބާރުގެތެރެއިން އެއް ބާރުގެ ވެރިޔާއެވެ. އެހެންކަމުން އެހެން ދައުލަތެއް ތަމްސީލްކުރުމަށް އެމަނުކުފާނު ބައިނަލްއަޤުވާމީ ފޯރަމެއްގައި ބައިވެރިވެވަޑައިގަންނަވާތީ ބައެއް ފަރާތްތަކުގެ ނުރުހުން ވަނީ އަމާޒުވެފައެވެ.
