އެމްޑީޕީގައި ޕީޕީއެމް ފެކްޝަނެއް އެބައޮތް ކަމުގައި ރައްޔިތުންގެ މަޖިލީހުގެ އައްޑޫ މީދޫ ދާއިރާގެ މެމްބަރު ރޮޒޭނާ އާދަމް ވިދާޅުވެއްޖެއެވެ.

އޭނާ މިހެން ވިދާޅުވީ މިފަހުން އެމްޑީޕީގެ ރައީސް މުހައްމަދު ނަޝީދު މަޖިލިސް ހިންގެވުމުގައި ސަރުކާރުން ހުށަހަޅާ ކަންކަމަށް ދެކޮޅު ހެދުމާއި، މަޖިލީހުގައި ތިއްބެވި ރައީސް ނަޝީދަށް ތާއީދުކުރާ މެމްބަރުން ޕީޕީއެމްގެ މެމްބަރުންގެ ނިންމުންތަކަށް ތާއީދު ކުރަމުންދާތީ އެކަމާއި ގުޅިގެން ކުރެއްވި ޓުވީޓެއްގައެވެ.

ރޮޒޭނާ ވިދާޅުވީ އެމްޑީޕީގެ ތެރޭގައި އޮތް ޕީޕީއެމް ފެކްޝަނުން ދަނީ މަޖިލިސް ތެރޭގައި ވަރަށް ރަނގަޅަށް ގުޅިގެން މަސައްކަތް ކުރަމުން ކަމަށެވެ. މަޖިލިސްގައި އިއްޔެ ކުރިއަށް ދިޔަ ޓެކްސް ބޮޑުކުރުމަށް ސަރުކާރުން ހުށަހެޅި ބިލަށް އިދިކޮޅު ޕީޕީއެމްއާއި، އެމްޑީޕީގެ ރައީސް ނަޝީދަށް ތާއީދުކުރާ މެމްބަރުން ހުށަގެޅި އިސްލާހުތައް މަޖިލީހުން ވަނީ ބޭރުކޮށްލާފައެވެ. ނަމަވެސް މި އިސްލާހުތަކަށް ޕީޕީއެމްގެ މެމްބަރުންނާއި، ރައީސް ނަޝީދަށް ތާއީދުކުރާ މެމްބަރުން ވަނީ ވޯޓު ދެއްވާފައެވެ.

އެމްޑީޕީގައި ޕީޕީއެމް ފެކްޝަނެއް އެބައޮތްކަމާ އެފެކްޝަނުން މަޖިލިސްތެރޭ ޕީޕީއެމް އާއެކު މަސައްކަތް ކުރާކަން މީ މިހާރު ފޮރުވެން އޮތް ކަމެއްނޫން. ޕީޕީއެމް މެމްބަރުންލައްވާ ސަރުކާރާ ދެކޮޅަށް އިސްލާހުތަށް ހުށައަޅުއްވަނީ ކޮންބޭފުޅެއްކަން އިއްޔެގެ މަޖިލިސް ބަލާލިމީހަކަށްވެސް ސާފުވާނެ.

– ރޮޒޭނާ ވިދާޅުވިއެވެ.

ރޮޒޭނާ މިހެން ވިދާޅުވެފައިވާއިރު، ރައްޔިތުންގެ މަޖިލީހުގެ މަސައްކަތްތައް ހިނގާނީ ސަރުކާރު ނުވަތަ ވަކި ސިޔާސީ ޕާޓީއެއް ބޭނުންވާ ގޮތަކަށް ނޫން ކަމަށް ކުރީގެ ރައީސް އަދި މަޖިލީހުގެ ރައީސް މުހައްމަދު ނަޝީދު ވަނީ އިއްޔެ ވިދާޅުވެފައެވެ.

އެމްޑީޕީ ތެރޭގައި ނަޝީދާއި ރައީސް އިބްރާހިމް މުހައްމަދު ސޯލިހުގެ ފެކްޝަނެއް އުފެދިފައި އޮތް އިރު ޕާލިމެންޓަރީ ގްރޫޕްގެ މެޖޯރިޓީ ލިބިފައި ވަނީ ރައީސްގެ ފެކްޝަނަށެވެ. ރައީސް ޞާލިހުގެ ފެކްޝަނަށް ތާއީދު އޮތްނަމަވެސް މަޖިލީހުގައި ކުރެވޭ ބަހުސްތަކުގައި އެންމެ ބޮޑަށް ވާހަކަ ދައްކައި ސަރުކާރަށް ފާޑު ކިޔަމުންދަނީ ރައީސް ނަޝީދަށް ތާއީދު ކުރައްވާ މެމްބަރުންނެވެ.