ދަރުސް ދެއްވުމަށް މުފްތީ މެންކް ރާއްޖޭގެ އެންމެ ދެކުނަށް ކުރައްވަމުންދާ ދަތުރުފުޅުގައި އައްޑޫ ސިޓީއަށް ވަޑައިގެންފިއެވެ.
މުފްތީގެ 4 ދަރުހެއް ބޭއްވުމަށް ނިންމާފައިވާއިރު، ފުރަތަމަ ދަރުސް ބާއްވާފައިވަނީ މާލޭގައެވެ. އަދި ރޭ ދެވަނަ ދަރުސް ފުވައްމުލައް ސިޓީގައި ބާއްވާފައިވާއިރު، އައްޑޫގައި ބާއްވާ ދަރުހަކީ މުފްތީގެ 3 ވަނަ ދަރހެވެ. އަދި 4 ވަނަ ދަރުސް އޮންނާނީ ހުޅުމާލޭގައެވެ. އައްޑޫގައި ދެއްވާ ތަޤުރީރުގެ މަޢުޞޫއަކީ "ޕްރޮޑަކްޓިވް މުސްލިމް" ނުވަތަ ހަރުދަނާ މުސްލިމުންނެވެ.
ދަރުސް ދެއްވުމަށް މުފްތީ މެންކް ރާއްޖޭގެ އެންމެ ދެކުނަށް ކުރައްވަމުންދާ ދަތުރުފުޅުގައި އައްޑޫ ސިޓީއަށް ވަޑައިގަތުން.
މިރޭ އައްޑޫ ސިޓީގައި މުފްތީ މެންކްގެ ދަރުސް އޮންނާނެ. ދަރުސް އޮންނާނީ އައްޑޫ ހައި ސްކޫލުގައި ރޭގަނޑު 8:45 ގައި pic.twitter.com/9njtIcX1ob— Ministry of Islamic Affairs (@MVIaffairs) October 30, 2022
މުފްތީގެ ދަރުސްތަކަށް ދަނީ ބޮޑު ތަރުހީބެއް ލިބެމުންނެވެ. މާލޭގައި ބޭއްވި ދަރުގައިވެސް ގިނަ ޢަދަދެއްގެ ބަޔަކު ބައިވެރިވިއެވެ. އެ ދަރުސްގައި ބޮޑަށް އަލިއަޅުއްވާލެއްވީ މާޔޫސްވުމާއި ނަފްސާނީ މައްސަލަތަކަށެވެ.
މުފްތީ މެންކް ވަނީ މި ދަރުސްގައި، ކީރިތި ޤުރުއާނާއި ރަސޫލާގެ ހަދީސްފުޅުތަކުން މިސާލު ނަންގަވައި ހާސްވުމާއި ކަންބޮޑުވުމަށް ކުރެވޭނެކަންކަމަށް ބައްލަވާލައްވާފައެވެ.
ކަންބޮޑުވެ، ހާސްވެ ދެރަވާ ވަގުތު ކިޔުމަށް ވާރިދުވެފައިވާ ދުޢާތައްވާކަން ފާހަގަކުރައްވާ އެ ދުޢާތަކާއި އެ ދުޢާތަކުގެ މާނަ ތަފްސީލީ ގޮތެއްގައި ކިޔައިދެއްވިއެވެ.
ވަރަށް ގިނަ ބަޔަކަށް ދިމާވާ ކަމެއްގެ ގޮތުގައި، ހެނދުނު ތެދުވަން އުނދަގޫ ހާލަތްތައް ދިމާވުމުން، ގަދަކަމުން ނަމަވެސް ތެދުވުމުގެ މުހިންމުކަމާއި އެންމެ ފުރަތަމަވެސް ފަތިސް ނަމާދުން މުސްލިމުންގެ ދުވަސް ފަށަނީ ކީއްވެގެންކަން އަދި އެކަމުގައިވާ ފައިދާތަކަށް ބައްލަވައިލެއްވިއެވެ. ހެނދުނު ހޭލައިގެން އެ ކަންނެތްކަމުން ގަދަކަމުންނަމަވެސް ތެދުވާން މަސައްކަތްކުރުމަށް މުފްތީ މެންކް މި ދަރުސްގައި ނަސޭހަތްތެރިވެ ވަޑައިގެންނެވިއެވެ. އެގޮތަށް މަސައްކަތްކުރަން ފެށުމުން މާތްﷲ އެކަމަށް ހިދާޔަތްދެއްވާކަމަށްވެސް ވިދާޅުވިއެވެ. ހަމައެއާއިއެކު މާތްﷲ ގެ ކިބައިން ކަންނެތްކަމުން ދުރުކުރެއްވުމަށް އެދި ގިނަގިނައިން ދުޢާކުރުމަށްވެސް ނަސޭހަތްތެރިވެވަޑައިގެންނެވިއެވެ.
މުޖުތަމަޢުއަށް މުފްތީ ދެއްވި މެސެޖަކީ މިފަދައިން ދިރިއުޅުން ވޭތުކުރާ މީހުންނަށް ވެވުނު މިންވަރަކުން އެހީތެރިވުމުގެ މެސެޖެވެ. އަދި އެހީއަށް ބޭނުންވާ މީހުން އެހީއަށް އެދުމުގެ މުހިންމުކަމެވެ.
މުފްތީ މެންކްގެ މި ދަރުސްގައި ބެލެނިވެރިންނަށްވެސް ވަނީ ވަރަށް ފުރިހަމަ މެސެޖެއް ދެއްވާފައެވެ. އާންމުކޮށް ދަރިންގެ ކަންކަމުގައި ފިކުރުބޮޑުވެ، މާޔޫސްވާ ދަނޑިވަޅުތަކުގައި ބެލެނިވެރިން ކުރަންޖެހޭ ކަމެއްގެ ގޮތުގައި މުފްތީ މެންކް ދެއްވީ ނަސޭހަތަކީ ދަރިން ދައްކާވާހަކަ ކެތްތެރިކަމާއިއެކު ކަނުލައި އަޑުއެހުމެވެ. ހަމަ އެހެންމެ ދަރިންގެ ކަންކަމުގައި ގޮތްހުސްވާ ހިސާބަށް ދިއުމުން، އެހީތެރިކަން ލިބިގަތުމަށެވެ. އެވާހަކަތައް ގާތް މީހަކާއި ހިއްސާކޮށް އެކަމަށް ރަނގަޅު ނިންމުންތައް ނިންމުމަށެވެ. މިފަދައިން ދިރިއުޅުމުގެ ކަންކަމުގައިވެސް ލަފައާއި މަޝްވަރާހޯދުމަށް އެދިވަޑައިގެންނެވިއެވެ.
