ޔުއެފާ ޗެމްޕިއަންސް ލީގު ގްރޫޕް ސްޓޭޖުގައި އަޔެކްސް ބަލިކޮށް ލިވަޕޫލު ދެ ވަނަ ބުރުން ޖާގަ ހޯދައިފިއެވެ.
އެއްވަރުކޮށްލައިގެން ވެސް ރޭ ދެ ވަނަ ބުރުގެ ފުރުސަތު އޮތް ލިވަޕޫލުން އަޔަކްސް ބަލިކުރީ މުހައްމަދު ސަލާހާއި ޑާވިން ނޫނޭޒް އަދި ހާވީ އެލިއަޓް ޖެހި ގޯލުތަކުންނެވެ. މި މެޗުގެ ކުރީކޮޅުގައި އަޔަކްސް އަށް ލީޑުނަގައިދޭން ސްޓީވެން ބާގްހައުސް ޖެހި ބޯޅައެއް ގޯލުގެ ދަނޑިއަށް އަމާޒުވިއިރު، އަޔަކްސްގެ ކެޕްޓަން، ޑޫސާން ޓަޑިޗް ޖެހި ބޯޅަ ލިވަޕޫލްގެ އަލެކްސަންޑަ އާނޯލްޑް ވަނީ ބްލޮކްކޮށްފައެވެ.
މިއީ ލިވަޕޫލުން ޗެމްޕިއަންސް ލީގުގައި ކުޅުނު 150 ވަނަ މެޗެވެ. އެ އަދަދަށް ޗެމްޕިއަންސް ލީގުގައި 10 ކްލަބަކުން މެޗު ކުޅެފައިވާއިރު، އޭގެ ތެރެއިން ހަތަރު ޓީމަކީ އިނގިރޭސި ކްލަބްތަކެވެ. މި ގްރޫޕްގައި ނަޕޯލީން ވަނީ 0-3 އިން ރޭންޖާސް ބަލިކޮށްފައެވެ. މެޗުގައި ނަޕޯލީގެ ސިމިއޯން ދެ ލަނޑު ޖެހި އިރު، ފަހު ލަނޑު ޖެހީ ލިއޯ އޮސްޓިގާޑްއެވެ.
މި ގްރޫޕްގެ އެއް ވަނައިގައި އޮތީ ފަސް މެޗުން 15 ޕޮއިންޓާއެކު ނަޕޯލީއެވެ. ދެ ވަނައިގައި ލިވަޕޫލް އޮތީ 12 ޕޮއިންޓާއެކުއެވެ. ތިން ވަނައިގައި ތިން ޕޮއިންޓާއެކު އަޔެކްސް އޮތް އިރު، ފުލުގައި އޮތް ރޭންޖާސް އަށް ޕޮއިންޓެއް ނުލިބެއެވެ.
