ޔުއެފާ ޗެމްޕިއަންސް ލީގުގައި ރޭ އިންޓަ މިލާނުން 4-0 އިން ޗެކް ރިޕަބްލިކްގެ ވިކްޓޯރިއާ ޕްލެޒެން އަތުން މޮޅުވެ، މުބާރާތުގެ ދެ ވަނަ ބުރުގެ ފުރުސަތު އިންޓަރ މިލާނުން ހޯދައިފިއެވެ.
އިންޓަރ މިލާންގެ ހަތަރު ލަނޑުގެ ތެރެއިން ދެ ލަނޑު ޖެހީ ބޮސްނިޔާ ފޯވާޑް އެޑިން ޖެކޯއެވެ. ފުރަތަމަ ލަނޑު ޖަހައިދިނީ މިކިތާރްޔަންއެވެ. ފަހު ލަނޑު މެޗު ނިމެން ތިން މިނެޓަށް ވެފައިވަނިކޮށް ޖެހީ ލުކަކޫއެވެ. ލުކަކޫ ކުޅެން ނުކުތީ އަނިޔާއަށްފަހު އެނބުރި އައިސް ބަދަލު ކުޅުންތެރިއެއްގެ ގޮތުގައެވެ.
ޗެމްޕިއަންސް ލީގުގެ ގްރޫޕް ސީން ދެ ވަނަ ބުރުގެ ޖާގަ މީގެ ކުރިން ވެސް ޔަގީންވެފައި އޮތީ ފުރަތަަމަ ހަތަރު މެޗުން ވެސް މޮޅުވެ، 12 ޕޮއިންޓް ހޯދާފައިވާ ބަޔާން މިއުނިކްއެވެ. ގަދަ ދެ ޓީމުގެ ތެރެއިން އިންޓަ ޖާގަ ޔަގީންކުރީ ރޭ ވިކްޓޯރިއާ ޕްލެޒެން އަތުން މޮޅުވެ، ފަސް މެޗުން 10 ޕޮއިންޓް ހޯދައިގެންނެވެ. މި ގްރޫޕްގައި ރޭ ބަޔާން މިއުނިކް އަތުން ބަލިވެ ބާސެލޯނާ ވަނީ ގްރޫޕް ސްޓޭޖުން ކަޓާފައެވެ.
މިއީ މިދިޔަ 22 އަހަރު ތެރޭ ބާސެލޯނާ ޗެމްޕިއަންސްް ލީގުގެ ގްރޫޕް ސްޓޭޖުން ކެޓި ދެ ވަނަ ފަހަރެވެ. މިދިޔަ ސީޒަނުގައި ވެސް ބާސެލޯނާ ވަނީ ޒަވީ ހެނާންޑޭޒްގެ ކޯޗުކަމުގައި ޗެމްޕިއަންސް ލީގުގެ ގްރޫޕް ސްޓޭޖުން ކަޓައި، ޔޫރޮޕާ ލީގުގައި ކުޅެފައެވެ.
