ޔުއެފާ ޗެމްޕިއަންސް ލީގު ގްރޫޕް އީގައި ސަލްޒްބާގް ބަލިކޮށް ޗެލްސީން ދެ ވަނަ ބުރަށް ދަތުރުކޮށްފިއެވެ.
އަންގާރަ ދުވަހުގެ ރޭ ސަލްޒްބާގްގެ ދަނޑުގައި ޗެލްސީން އެ ޓީމުގެ މައްޗަށް ކުރި ހޯދީ 2-1 އިންނެވެ. ޗެލްސީން ދެ ވަނަ ބުރަށް ދަތުރުކުރީ މި ގްރޫޕްގެ އެއް ވަނަ ޓީމުގެ ގޮތުގައެވެ. ފުރަތަމަ ހާފުގައި މަޓެއޯ ކޮވަސިޗް ޖަހައިދިން ލަނޑުން ޗެލްސީ ލީޑު ހޯދާފައި ވަނިކޮށް ދެވަނަ ހާފު ފެށިގެން ތިންވަނަ މިނިޓުގައި ޖޫނިއާ އަޑަމޫ ވަނީ ސަލްޒްބާގަށް ނަތީޖާ އެއްވަރު ކޮށްދީފައެވެ. ނަމަވެސް 64 ވަނަ މިނިޓުގައި ޗެލްސީ މޮޅުކޮށްދިން ލަނޑު ޖެހީ ކައި ހަވާޓްޒްއެވެ.
ތޯމަސް ޓުޗެލް ޗެލްސީގެ ކޯޗުކަމުން ވަކިކޮށް، އާ ކޯޗު ގްރަހަމް ޕޮޓާ ގެ އިރުޝާދުގެ ދަށުން ޗެލްސީ ފުރަތަމަ ކުޅުނީ އަމިއްލަ ދަނޑުގައި ސަލްޒްބާގާ ދެކޮޅަށެވެ. އެ މެޗު ނިމުނީ އެއްވަރު ވެގެންނެވެ. ޕޮޓާ އާއެކު ޗެލްސީ މިހާތަނަށް ކުޅުނު ނުވަ މެޗުގައި ވެސް ބަލި ވެފައެއް ނުވެއެވެ. އެއްވަރުވީ ތިން މެޗުންނެވެ.
ޗެލްސީ އާއެކު ގުރޫޕް އީ ގައި ހިމެނޭ އޭސީ މިލާން ވަނީ ރަށުން ބޭރުގައި 4-0 އިން ކްރޮއޭޝިއާގެ ޑިނަމޯ ޒެގްރެބް ބަލިކޮށް، ގުރޫޕްގެ ދެ ވަނައަށް ޖެހިލައިފައެވެ. މިލާނަށް ލަނޑުތައް ޖަހައިދިނީ މަޓެއޯ ގައްބިއާ އާއި ރަފައެލް ލެއާއޯ އަދި އޮލިވިއޭ ޖިރޫ އެވެ. ޖިރޫގެ ލަނޑަކީ ޕެނަލްޓީއަކުން ކާމިޔާބުކުރި ލަނޑެކެވެ. މިލާންގެ ފަހު ލަނޑަކީ ޒެގްރެބްގެ ކުޅުންތެރިއެއް އަތުން ބައިކޮޅަށް ވަން ލަނޑެކެވެ.
މި ނަތީޖާއާ އެކު މިލާން ގުރޫޕްގެ ދެ ވަނައިގައި އޮތީ ހަތް ޕޮއިންޓް ހޯދައިގެންނެވެ. ޗެލްސީ އެއް ވަނައިގައި އޮތީ 10 ޕޮއިންޓް ހޯދައިގެންނެވެ. ނަމަވެސް ފަހު މެޗުގައި މިލާން ބަލިކޮށްގެން ގުރޫޕްގެ ދެވަނަ ޓީމުގެ ގޮތުގައި ސަލްޒްބާގަށް ދެ ވަނަ ބުރަށް ދަތުރު ކުރުމުގެ ފުރުސަތު އެބަ އޮތެވެ. އެ މެޗު އެއްވަރުކޮށްލައިގެން ވެސް މިލާނަށް ދެ ވަނަ ބުރަށް ދެވޭނެއެވެ.
