މައްސަލައެއްގައި ދައުވާކޮށް ހުކުމް ކުރުމާއި ހަމައަށް އޮންނަ އިޖުރާއަތްތައް ފުރިހަމަ ނުކޮށް ޣައިރު ހާޒިރުގައި ހުކުމެއް ކުރި މައްސަލައެއްގައި ސިވިލް ކޯޓުގެ ޤާޟީ ޙަސަން ފަހީމް އިބްރާހީމަށް ޖުޑިޝަލް ސާވިސް ކޮމިޝަން (ޖޭއެސްސީ) އިން ފިޔަވަޅު އަޅައިފިއެވެ.

ޤާޞީ ފަހީމަށް ފިޔަވަޅު އަޅާފައިވަނީ ދަޢުވާކުރާ ފަރާތާއި ދަޢުވާލިބޭ ފަރާތުގެ ޣައިރު ހާޒިރުގައި މައްސަލައިގައި ޙުކުމްކޮށް މައްސަލަ ނިންމާފައިވާ މައްސަލައެކެވެ. މިމައްސަލައާއި ގުޅިގެން ޖޭއެސްސީން ކުރިއަށް ގެންދިޔަ ތަހުގީގުގައި ޤާޟީ ޙަސަން ފަހީމް އިބްރާހީމް ވަނީ އިޢުތިރާފުވެފައެވެ.

ޖޭއެސްސީން ބުނެފައިވަނީ މިއީ ފަނޑިޔާރުންގެ ޤާނޫނުގެ ދަށުން މައްސަލައާގުޅޭގޮތުން ހުށަހަޅަންޖެހޭ ހެއްކާއި ޤަރީނާ ހުށަހެޅުމާއި، މައްސަލައާގުޅޭ ވާހަކަތައްދެއްކުމަށް މައްސަލައިގެ ޚަސްމުންނަށް ނުވަތަ ޚަސްމުން ތަމްސީލުކުރާ ފަރާތްތަކަށް އިޖުރާޢަތުގައިވާގޮތުގެ މަތިން އެކަށޭނެ ފުރުޞަތު ދޭންޖެހޭނެ ކަމެއްކަމަށެވެ.

ނަމަވެސް އެފުރުސަތު ނުދެއްވައި ޤާޟީ ފަހީމް އަމަލުކުރައްވާފައިވަނީ ފަނޑިޔާރުންގެ ޤާނޫނުގެ، ފަނޑިޔާރުންގެ ސުލޫކީ މިންގަނޑާއި ޚިލާފަށް ޖޭއެސްސީން ވަނީ ވިދާޅުވެފައެވެ. މިމައްސަލާގައި ޖުޑީޝަލް ސަރވިސް ކޮމިޝަންގެ ޤާނޫނުގެ ދަށުން، ޤާޟީ ފަހީމަށް ނަޞޭޙަތް ދިނުމާއެކު ކޮމިޝަނުން ކަނޑައަޅާ ތަމްރީނު ޕްރޮގްރާމެއް ފުރިހަމަކުރުމަށް އެންގުމުގެ ފިޔަވަޅު އެޅުމަށް ޖޭއެސްސީން ވަނީ ނިންމާފައެވެ.