ގުރޫފަކުން، ތޫނު އެއްޗަކުން ހަމަލާދީ މަރާލި ރ. މީދޫ، ފެންފިޔާޒުގެ މުހައްމަދު އަނަސްގެ މަރުގެ މައްސަލާގައި ބައިވެރިވިކަމަށް ކުރި ދައުވާ ސާބިތުވާކަމަށް ނިންމާ، ކުޑަ ކުއްޖާ 18 އަހަރަށް ޖަލަށްލާން ހައި ކޯޓުން ހުކުމް ކޮށްފިއެވެ.
ސައިކަލުތަކެއްގައި އައި ބަޔަކު ތޫނު އެއްޗަކުން ހަމަލާދީ މުހައްމަދު އަނަސް މަރާލީ 2017 ވަނަ އަހަރުގެ ޖުލައިމަހުގެ 31 ވަނަދުވަހުގެ ރެއެވެ. އަނަސް އަށް މި ގްރޫޕުން ހަމަލާދީފައި ވަނީ އޭނާ ފިލަން އެމަގުގައި ހުރި ލިޓަސް ގަރާޖަށް ވަނުމުން ބިންމައްޗަށް ވައްޓާލުމަށް ފަހުއެވެ. މި މާރާމާރީގައި އަނަސްގެ ހަށިގަނޑުގެ 25 ތަނަކަށް ހަމަލާދީފައިވާއިރު، އޭނާއަށް ފަރުވާދިނުމަށް ހޮސްޕިޓަލަށް ގެންދިޔައިރުވެސް މަރުވެފައިވާކަމަށް ފުލުހުން ވަނީ ބުނެފައެވެ.
މި ހާދިސާގައި ބައިވެރިވި 18 އަަހަރުން ދަށުގެ ކުޑަކުއްޖާގެ މައްޗަށް ކުރެވުނު ތުހުމަތުތައް ސާބިތު ނުވާކަމަށް އެންމެ ފުރަތަމަ ކުރިމިނަލް ކޯޓުން ހުކުމް ކޮށްފައި ވެއެވެ. އެހެންނަމަވެސް ހައިކޯޓުން ވަނީ އަނަސް މަރާލުމުގައި އޭނާ ބައިވެރިވާކަން ސާބިތު ވާކަމަށް ހުކުމް ކޮށްފައެވެ.
ހައި ކޯޓުން 18 އަހަރާއި 9 މަސްދުވަހަށް އެ ކުއްޖާ ޖަލަށް ލާން، ތިން ފަނޑިޔާރުންގެ އިއްތިފާގުން ހުކުމް ކުރިއިރު އޭނާގެ އުމުރުން މިހާރުވަނީ 18 އަހަރު ފުރިފައެވެ. އެހެންނަމަވެސް މި ހާދިސާގައި އޭނާ ބައިވެރިވިއިރު އޭނާގެ އުމުރު 18 އަހަރު ފުރިފައި ނުވާތީ އަދިވެސް ދައުލަތުގެ މުވައްސަސާތަކުން އޭނާގެ ވަނަވަރު ހާމަ ކޮށްފައެއް ނުވެއެވެ.
ހައިކޯޓުގެ ތިން ފަނޑިޔާރުންގެ އިންތިފާގުން ކުޑަކުއްޖާ 18 އަހަރަށް ޖަލަށްލާން ހުކުމް ކުރިއިރު، އަނަސްގެ ވާރިސުން އެދިފައިވަނީ މަރަށް މަރު ހިފުމަށެވެ. އެހެންނަމަވެސް ކުޑަކުދިންގެ ގާނޫނު އޮންނަ ގޮތުން ކުޑަކުދިންގެ މައްޗަށް މަރުގެ ހުކުމެއް ނީއްވެއެވެ.
މި މައްސަލާގައި ޅ.ކުރެންދޫ އަސުރުމާގެ އަހުމަދު ޒަޔާނާއި މ.ދިމިޝްގު އުސްމާން ޝަރީފާއި ސ.ފޭދޫ ވެސްޓަންވިލާ ހަސަން މަހްފޫޒާއި ލ.ގަން ތުނޑި ރަންނާރި ޖުނައިހު އަބްދުﷲއާއި ދަފްތަރު ނަމްބަރު 1746 ސިމާހްގެ މުސާ އާއި މ. ލޮނުމިދިލިގެ އަފްރާހު އަބްދުލްރަހްމާން ގެ އިތުރުން ތ. ކިނބިދޫ ގުލްފާމްގެ މުހައްމަދު ސާޒްގެ މައްޗަށްވެސް ދައުލަތުން ވަނީ ދައުވާކޮށްފައެވެ.
