މަސައްކަތުގެ ދާއިރާއިން ބޭރުންވެސް ވަކީލުން ކުރާ ކުށްތައް ބެލޭގޮތަށް ގާނޫނީ ފަންނުގެ ގާނޫނު އިސްލާހުކޮށް، އެބާރު ބާ ކަސުންސިލަށް ދޭން ރައްޔިތުންގެ މަޖިލީހުން ފާސް ކޮށްފިއެވެ.
ހޮޅުދޫ ދާއިރާގެ މެމްބަރު ޔޫނުސް އަލީ ހުށަހަޅުއްވާފައިވާ މި ބިލުގެ އިތުރުން، ވަކީލުންގެ ހުއްދަ އޮތް މީހުން ބާ އިންމްތިހާން ހަދަން ނުޖެހޭ ގޮތަށް ވިލިމާލޭ ދާއިރާގެ މެމްބަރު އުޝާމް ގާނޫނަށް ހުށަހެޅުއްވި އިސްލާހު ޖުޑިޝަރީ ކޮމިޓީން ދިރާސާކޮށް ފާސްކުރި ގޮތަށްވެސް މަޖިލީހުން މިއަދު ވަނީ ފާސް ކޮށްފައެވެ.
މި ދެބިލުވެސް ކޮމިޓީގެ އިސްލާހުތަކާއެކު މަޖިލީހުން ފާސް ކޮށްފައިވަނީ 58 މެމްބަރުންގެ އިއްތިފާގުންނެވެ.
ފުރަތަމަ ބާ އިމްތިހާނެއް ބޭއްވެންދެން އެހާތަނަށް ކިޔަވާ ނިމިފައި ތިބި މީހުން ތަމްރީން ޕްރޮގްރާމެއް ފުރިހަމަ ކުރުމަށްފަހު ވަކީލުކަމުގެ ޚާއްސަ ހުއްދައެއް ދިނުމަށް ނިންމާފައިވަނީ 2020 ވަނަ އަހަރުއެވެ.
ގާނޫނަށް ނެގެނެވުނު އިސްލާހު މިއަދު ފާސްވެގެން ދިއުމާއެކު، ޚާއްސަ ހުއްދަ ދޫކޮށްފައިވާ މީހުން ބާ އިމްތިހާން ހަދާކަށް ނުޖެހޭނެއެވެ. ގާނޫނީ ފަންނުގެ ގާނޫނުގައި ކުރިން އޮތް ގޮތުން ޚާއްސަ ހުއްދަ ލިބިފައިވާ ފަރާތްތަކުންވެސް ބާ އިމްތިހާން ހަދާން ޖެހޭނެއެވެ.
މިއަދު ފާސްކުރެވުނު އިސްލާހުގައިވާގޮތުން، ބާ ކައުންސިލުގެ މާލީ ހިސާބުތައް ލައިސަންސް އޮތް އޮޑިޓަރަކު މެދުވެރިކޮށް އަހަރަކު އެއްފަހަރަކު އޮޑިޓްކޮށް ރިޕޯޓު އެކުލަވާލަން ޖެހެއެވެ. އަދި އޭގެ އިތުން ކައުންސިލަށް ބޭނުންވާ ބަޖެޓް މާލިއްޔަތު ގާނޫނާ އެއްގޮތްވާ ގޮތުގެ މަތިން ތައްޔާރުކޮށް، އެކުލަވާލުމަށްފަހު ދައުލަތުގެ ކަމާގުޅޭ މުވައްސަސާއަށް ހުށަހަޅާންވެސް ޖެއެވެ.
އޭގެ އިތުރުން، މަޖިލީހުން މިއަދު ފާސްކުރި އިސްލާހުގައިވަނީ، ވަކީލުން ސުލޫކީ މިންގަޑާއި ޚިލާފް ވެއްޖެނަމަ، ނުވަތަ އެ ކުރި އަމަލަކީ އަދުލު އިންސާފުގެ ހަމަތަކާއި ޚިލާފް އަދި ގާނޫނީ ފަންނުގެ އިތުބާރު ގެއްލޭފަދަ އަމަލެއް ކަމުގައި ވެއްޖެނަމަ، މީހަކު އިސްވެ މައްސަލަ ހުށަނޭޅި ކަމުގައިވި ނަމަވެސް ބާކައުންސިލަށް އެފަދަ މައްސަލައެއް ބެލޭނެ ކަމަށެވެ.
އަދި ބާ ކައުންސިލް ހިންގުމަށްޓަކާ ވަކީލުން އަތުން ފީ ނެގުމުގެ އިތުރުން ޖޫރިމާނާ ކުރުމުގެ ބާރު ބާ ކައުންސިލަށް ދިނުމަށްވެސް ފާސްކޮށްފައި ވެއެވެ.
ގާނޫނީ ފަންނުގެ ގާނޫނަށް އިސްލާހު ގެނެސްފައިވަނީ، މަޖިލިސް ރައީސް މުހައްމަދު ނަޝީދުގެ ކޮއްކޮ ނާޒިމް ސައްތާރު އެއް ޖިންސުން ގުޅުން ހިންގި މައްސަލާގައި، ގާނޫނީ ފަންނުގެ ގާނޫނު އޮތްގޮތުން ކަމަށްބުނެ އޭނާގެ މައްޗަށް އެއްވެސް ފިޔަވަޅެއް ނޭޅުމުގެ ސަބަބުން ބާ ކައުންސިލަށް ގިނަ ބައެއްގެ ފާޑުކިއުން އަމާޒު ވެފައި ވަނިކޮށެވެ.
ބާ ކައުންސިލުން ބުނެފައިވަނީ، މިހާރު ގާނޫނު އޮތްގޮތުން، ދާއިރާއިން ބޭރުން ގާނޫނީ ވަކީލުން ކުރާ ކުށްތަކަށް އެ ކައުންސިލަށް ފިޔަވަޅު އެޅުމުގެ ފުރުސަތެއް ނެތްކަމަށެވެ.
