އިނގިރޭސި ޕްރިމިއާ ލީގުގައި މިރޭ މުހައްމަދު ސަލާހުގެ ގޯލުން ލިވަޕޫލުން 1-0 އިން މެންޗެސްޓާ ސިޓީ ބަލިކޮށްފިއެވެ.
ލިވަޕޫލްގެ ހަމައެކަނި ލަނޑު 76 ވަނަ މިނެޓުގައި ވައްދާލީ މިސްރު ފޯވާޑް މުހައްމަދު ސަލާހެވެ. ހާފުގެ ކުރީކޮޅު ވެސް ސަލާހު ލީޑު ނެގުމާ ގާތަށް ދިޔައެވެ. އޭގެ ފަހުން ފިލް ފޮޑެން ސިޓީ އަށް ލަނޑެއް ޖަހައިދިން ވެސް މެއެވެ. އެކަމަކު އެ ގޯލް ޖަހަން މަގުފަހިވީ ހަމަލާގައި އާލިން ހާލަންޑް ފައުލްކޮށްފައިވާތީ ރެފްރީ އެ ގޯލް ކެންސަލްކުރީއެވެ.
ސިޓީން ވަނީ މެޗުގެ 53 ވަނަ މިނިޓްގައި ގޯލެއް ޖަހައިފައެވެ. ފިލް ފޯޑެން ޖެހި މި ގޯލު ބަަލައިނުގަންނަން ނިންމީ ވީއޭއާރް އިން ބަލައިފަ އެވެ. އެއީ އެ އެޓޭކް ފެށިއިރު، ސިޓީގެ ހާލަންޑް ލިވަޕޫލްގެ ފަބީނިއޯގެ ޖޯޒީގައި ހިފަހައްޓާފައިވާތީއެވެ. އެ ނިންމުމާ މެދު ސިޓީގެ ކޯޗު ޕެޕް ގާޑިއޯލާ ވަނީ ވަރަށް ބޮޑަށް ހިތްހަމަ ނުޖެހުން ފާޅުކޮށްފައެވެ.
މިއީ މި ފަހަރު ލީގުގައި ސިޓީ ބަލިވި ފުރަތަމަ މެޗެވެ. އަދި ޕްރިމިއާ ލީގުގައި އެންމެ ފަހުން ރަށުންބޭރުގައި ކުޅުނު 22 މެޗުން ބަލިނުވެ، ސިޓީން ދެމެހެއްޓި ރެކޯޑަށް މި ވަނީ ނިމުން އަތުވެފައެވެ.
ލިވަޕޫލް މި މޮޅާ އެކު ލީގުގެ އަށް ވަނައިގައި އޮތީ ނުވަ މެޗުން 13 ޕޮއިންޓް ހޯދައިގެންނެވެ. އާސެނަލް ވަނީ މި ނަތީޖާއާ އެކު ތާވަލުގެ އެއް ވަނައިގައި ހަތަރު ޕޮއިންޓުގެ ލީޑެއް ނަގައިފައެވެ. އެ ޓީމަށް 27 ޕޮއިންޓް ލިބިފައިވާއިރު ސިޓީ ދެ ވަނައިގައި އޮތީ 23 ޕޮއިންޓާ އެކުއެވެ. އެ އަދަދަށް ޕޮއިންޓް ހޯދި ނަމަވެސް ލަނޑުގެ ތަފާތުން ޓޮޓެންހަމް ހޮޓްސްޕާސް އޮތީ ތިން ވަނައިގައެވެ.
