އިނގިރޭސި ޕްރިމިއަރ ލީގުގައި ޗެލްސީއާއި އެސްޓަން ވިލާ ބައްދަލުކުރި މެޗުގައި މޭސަން މައުންޓް ޖެހި ދެލަނޑުން ޗެލްސީ މޮޅުވެއްޖެއެވެ.
އެސްޓަން ވިލާގެ އަމިއްލަ ދަނޑުގައި ރޭ ކުޅުނު މެޗުގައި މެޗު ފަށައިގެން ފުރަތަމަ ހަ މިނެޓު ތެރޭ ޗެލްސީން ލީޑު ނެގިއެވެ. މިއީ ވިލާގެ ޓައިރޮން މިންގްސް ހެދި ގޯހެއްގެ ފައިދާ ނަގާ މޭސަން މައުންޓް ޖެހި ރީތި ގޯލެކެވެ. ފުރަތަމަ ހާފު ނިމެން އުޅެނިކޮށް ރަހީމް ސްޓާލިން އުފެއްދި ހަމަލާ އަމާޒުވީ ގޯލުގެ މަތީ ދަނޑިއަށެވެ. މިއީ ކައި ހަވާޒްގެ އެހީތެރިކަމާއެކު ސްޓާލިން ފޮނުވާލި ހަމަލާއެކެވެ.
ފުރަތަމަ ހާފު 1-0 ގެ ނަތީޖާއިން ނިމުނު އިރު ޗެލްސީއަށް ލީޑު ފުޅާކޮށްދިނީ މި މެޗުގައި މޮޅު ކުޅުމެއް ދެއްކި މައުންޓެވެ. މިއީ ޓަރިރޮން ކުރި ފައުލަކާ ގުޅިގެން ޗެލްސީ އަށް ލިބުނު ހިލޭ ޖެހުމަކުން މައުންޓް ގޯލަށް ފޮނުވާލި ރީތި ބޯޅައެކެވެ. ދެވަނަ ހާފުގައި އެސްޓަން ވިލާގެ ކުޅުން ރަނގަޅުކޮށް އެޓޭކް ކުރި ނަމަވެސް ތިއާގޯ ސިލްވާ އާއި ބެން ޗިލްވެލް ވަނީ ޗެލްސީގެ ގޯލު ހިމާޔަތް ކޮށް މޮޅަށް ޑިފެންސް ކޮށްފައެވެ.
ރޭގެ މެޗުން ޗެލްސީ މޮޅުވުމުގެ ކްރެޑިޓް ހައްގުވާ އެއް ކުޅުންތެރިއަކީ ގޯލްކީޕަރު ކެޕާ އަރިއްޒަބަލާގާ އެެވެ. އެސްޓަން ވިލާ އިން ފޮނުވާލި ގިނަ ބޯޅަތަކެއް ހުއްޓުވުމުގައި ކެޕާގެ ހުށިޔާރުކަން ފެނިގެންދިޔަ އެވެ.
މި ނަތީޖާއާއެކު ޗެލްސީ އޮތީ ތާވަލުގެ ހަތަރުވަނަ މަގާމުގައެވެ. އެއީ 19 ޕޮއިންޓު ހޯދައިގެންނެވެ.
