އާރަށުގައި ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު އެމްޑީޕީގެ ޤައުމީ މަޖިލިސް މެމްބަރުންނަށް ދެއްވާ ފަރިއްކޮޅުގައި ބައިވެރި ނުވާނެކަމަށް އެމްޑީޕީގެ ރައީސް މުހައްމަދު ނަޝީދު ވިދާޅުވެއްޖެއެވެ.

އިންޓަނޭޝަނަލް މަނިޓަރީ ފަންޑް (އައިއެމްއެފް)ގެ އަހަރީ ބައްދަލުވުމުގައި ބައިވެރިވެވަޑައިގަތުމަށް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު މިވަގުތު ހުންނެވީ އެމެރިކާގައެވެ. ނަޝީދު އެމެރިކާގައި ހުންނަވަނިކޮށް މާދަމާރޭ އެމްޑީޕީގެ ޤައުމީ މަޖިލިސް މެމްބަރުންނާއި ރައީސް ޞާލިހު އާރަށުގައި ބައްދަލު ކުރެއްވުމުގެ ދައުވަތެއް ވަނީ އެމްޑީޕީހެ ގައުމީ މަޖިލިސް ވަޓްސް އަޕް ގްރޫޕުގައި ދެއްވާފައެވެ.

މިމެސެޖުގައި ބުނެފައިވަނީ ރައީސުލްޖުމްހޫރިއްޔާ އެމްޑީޕީގެ ޤައުމީ މަޖިލިސް މެމްބަރުންނާ ބައްދަލު ކުރެއްވުމުގެ ގޮތުން ދެއްވާ ރޭގަނޑުގެ ފަރިކޮޅަކަށް ދައުވަތު އަރުވާކަމަށެވެ. މިމަހުގެ 17 ވަނަ ދުވަހުގެރޭ 7 ޖަހާއިރަށް 4 ނަންބަރު ފާލަމަށް ވަޑައިގަތުމަށް ވަނީ ދައުވަތު ދީފައެވެ. އަދި ވަޑައިގެންނެވޭ ބޭފުޅުން އެންގެވުމަށް ވަނީ އެދިފައެވެ.

މިމެސެޖަށް ރައްދު ދެއްވައި ރައީސް ނަޝީދު ވިދާޅުވީ މާލޭގައި ހުންނެވި ނަމަވެސް ރައީސުލްޖުމްހޫރިއްޔާގެ ޤައުމީ މަޖިލިސް ބައްދަލުވުމަށް ނުދާނެކަމަށެވެ. ރައީސް ނަޝީދު ވިދާޅުވީ ރައީސް ޞާލިހަކީ އެކީގައި މަސައްކަތް ކުރައްވަން ބޭނުންވާ ބޭފުޅަކަށް ނުވާކަމަށެވެ. އަދިކަންކަމާއި މަޝްވަރާކޮށް މަސައްކަތް ކުރައްވަން ބޭނުންފުޅުވާ ބޭފުޅަކަށް ނުވުމުން އެބައްދަލުވުމަށް ނުދާނެކަމަށެވެ.

ރައީސުލްޖުމްހޫރިއްޔާވެސް އަޅުގަނޑާއި ވާހަކަ ދައްކަވާ އެކީ ކަންކަން ކުރައްވާކަށް ބޭނުންފުޅެއް ނުވޭ. ވީމާ އަޅުގަނޑުވެސް ދެން ބޭނުމެއްނޫން.

– ރައީސް ނަޝީދު ވިދާޅުވިއެވެ.

ރައީސް ނަޝީދާއި ރައީސް ޞާލިހާއި ދެމެދު އޮތް ސިޔާސީ ގުޅުން ވަރަށް ބޮޑަށް ގޯސްވެފައިވާއިރު، ކުރިއަށް އޮތް ރިޔާސީ އިންތިޚާބުގައި އެމްޑީޕީން ރައީސް ޞާލިހު ނިކުންނަވާނަމަ ތާއީދު ނުކުރައްވާނެކަމަށްވެސް މީގެ ކުރިން ރައީސް ނަޝީދުވަނީ ވިދާޅުވެފަައެވެ.

ރައީސް ނަޝީދު ވިދާޅުވެފައިވަނީ ބަރުލަމާނީ ނިޒާމުގެ މަސައްކަތް ނުކޮށް ރާއްޖޭގައި އިތުރު އިންތިޚާބެއް ބާއްވަންޖެހޭކަމަށް ގަބޫލު ނުކުރައްވާކަމަށެވެ. އަދި ބަރުލަމާނީ ނިޒާމުގެ ވޯޓަށް ރައީސް ޞާލިހުގެ ތާއީދު ނުލިބިއްޖެނަމަ ރިޔާސީ އިންތިޚާބު އެމްޑީޕީއަށް ނުލިބޭނެކަމަށް ރައީސް ނަޝީދުވަނީ ވިދާޅުވެފައެވެ.