މިއަހަރުގެ އޮގަސްޓު މަހުގެ 7 ވަނަ ދުވަހުގެރޭ އަނިޔާވެރިގޮތަކަށް މަރާލާފައި އޮއްވާ ފެނުނު ޝިއާއު މުހައްމަދު ސައީދު މަރުވި ފަހުންވެސް ބޮޑެތި އަނިޔާތަކެއް ދީފައިވާކަމަށް ފުލުހުން ވިދާޅުވެއްޖެއެވެ.
ފުލުހުން ތަހުގީގް ކުރަމުންދާ މަރުގެ ތިން މައްސަލައަކާއި ގުޅޭގޮތުން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ޗީފް ސްޕްރިންޓެންޑެންޓް އޮފް ޕޮލިސް މުހައްމަދު ބަޝީރު ވިދާޅުވީ ޝިއާއު މަރުވިފަހުންވެސް ބޮޑެތި އަނިޔާތަކެއް ދީފައިވާކަން ޕޯސްޓް މޯޓަމް ރިޕޯޓުން ހާމަވާކަމަށެވެ.
މިމަރާއި ގުޅިގެން ފުލުހުން ތަހުގީގަށް ދިޔައިރުވެސް ޝިއާއުގެ މަރުގެ ތުހުމަތު ކުރެވޭ މީހާ އަލީ ޝާހިލް އެތަނުގައި ހުރިކަމަށެވެ. އަދި އޭނާ އެރޭ ހައްޔަރުކުރިކަމަށެވެ. ޕޯސްޓްމޯޓަމް ރިޕޯޓުން ބޮޑެތި އަނިޔާތަކެއް ޝިއާއަށް ދީދައިވާކަން ހާމަވާކަމަށް ބަޝީރު ވިދާޅުވިއެވެ.
އޭނާ ވިދާޅުވީ މިމައްސަލާގައި މިހާތަނަށް 45 މީހަކާއި ސުވާލު ކުރެވިފައިވާކަމަށެވެ. އަދި ޝާހިލްގެ ފޯނު ފުލުހުންގެ ބެލުމުގެ ދަށަށް ގެނެސް ފޯނުގައި ހުރި މައުލޫމާތުވެސް އެއްކުރަމުންދާކަމަށެވެ. އަދި މިމަރުގައި ތުހުމަތު ކުރެވޭ ޝާހިލްއަށް ކުށް ސާބިތު ކުރެވޭނެ ކަމާއިމެދު ޔަގީންކަން އެބައޮތްކަމަށް ބަޝީރު ވިދާޅުވިއެވެ.
ޝާހިލްގެ ފަރާތުން މިމަރާއި ގުޅިގެން ކުރިއަށް ގެންދާ ތަހުގީގުގައި މާބޮޑު އެއްބާރުލުމެއް ލިބެމުން ނުދާކަމަށްވެސް ފުލުހުން ވިދާޅުވިއެވެ. އަދިއޭނާ ޝިއާއު މަރާލަންޖެހޭ ސަބަބު އަދި ސާފުނުވި ނަމަވެސް އޭނާގެ ފޯނުލިބި ފޯނުންވެސް މައުލޫމާތު ލިބިފައިވާކަމަށް ފުލުހުން ވިދާޅުވިއެވެ. ފޯނު ފުރަތަމަ ލިބުމުން ޝާހިލް އެއްބާރުލުން ނުދިން ކަމަށް ފުލުހުން ވިދާޅުވިއެވެ. އަދި ޕާސްވޯޑުވެސް ދީފައި ނުވާކަމަށާއި، ނަމަވެސް ފުލުހުން ފޯނުގެ ޕާސްވޯޑް ބްރޭކް ކުރުމަށް ކުރި މަސައްކަތުން ބޭރުގެ ފަރާތްތަކުގެ އެހީއާއިވެސްއެކު ފޯނަށް އެކްސެސްވެވިފައިވާކަމަށެވެ.
ފުލުހުން ވިދާޅުވީ މިމަރާއި ގުޅިގެން މިހާރުވެސް ތަހުގީގް ހިނގަމުންދާއިރު، ތަހުގީގަށް ބޮޑެތި ކުރިއެރުން ލިބިފައިވާކަމަށެވެ. އަދި މިމައްސަލާގައި ކުރިއަށް އޮތް ދެ ހަފްތާގެ ތެރޭގައި ދައުވާ ކުރުމަށް ފޮނުވޭނެކަމަށް ފުލުހު ވަނީ ވިދާޅުވެފައެވެ.
