ހުޅަނގު މޫސުމުގެ ބާރުގަވެ، ކުރިއަށް އޮތް 4 ދުވަހު މޫސުމަށް ސަމާލުވުމަށް އިލްތިމާސްކޮށްފިއެވެ.
މޫސުމާއި ބެހޭ ޤައުމީ އިދާރާއިން ބުނެފައިވަނީ ރާއްޖޭގެ ސަރަހައްދުގައި ހުޅަނގު މޫސުމުގެ ބާރުގަވެ، ކުރިއަށް އޮތް 4 ދުވަހު، ޚާއްސަކޮށް އުތުރާއި، މެދުރާއްޖެތެރޭގައި ވައިބާރުވެ ކަނޑުތައްވެސް ގަދަވެގެންދާނެކަމަށް ލަފާކުރެވޭކަމަށެވެ. މީގެ އިތުރުން ބައެއް ރަށްތަކަށް ބޯކޮށް ވާރޭވެހުމަކީވެސް އެކަށީގެންވާ ކަމެއްކަމަށް މޫސުމާއިބެހޭ ޤައުމީ އިދާރާއިން ވިދާޅުވެއެވެ.
ރާއްޖެއަށް މިހާރު ކުރަމުން އަންނަ ހުޅަނގު މޫސުމުގެ ވިއްސާރާގައި އެކި ސަރަހައްދުތަކަށް އަންނަނީ ވައިގަދަވެ ގުގުރުމާއެކު ވާރޭވެހެމުންނެވެ. މޫސުމާ ބެހޭ ޤައުމީ އިދާރާއިން ވިދާޅުވީ އަންނަ ހަފްތާގެ އާދިއްތަ ދުވަހާ ހަމަޔަށް ރާއްޖޭގެ އެކި ހިސާބުތަކަށް މޫސުން ގޯސްވާނެކަމަށް ލަފާކުރެވޭކަމަށެވެ. އަދި ކުރިއަށް އޮތް 24 ގަޑިއުރުވެސް ރާއްޖޭގެ އެކި ހިސާބަށް ގުގުރުމާއެކު ބޯކޮށް ވާރޭވެހޭނެކަމަށް ލަފާކުރެއެވެ.
Active monsoon over Maldives area. pic.twitter.com/NoVdPacDfh
— Maldives Meteorology (@MetMaldives) October 12, 2022
މޫސުމާ ބެހޭ ޤައުމީ އިދާރާއިން ވިދާޅުވީ ހުޅަނގާއި ހުޅަނގުއުތުރުން ގަޑިއަކު 13 މޭލާއި 23 މޭލާ ދެމެދުގެ ބާރުމިނުގައި ވައިޖެހޭނެ ކަމަށާއި ވިލާގަނޑުގައި ގަޑިއަކު 45 މޭލު ބާރުމިނުގައި ވައި ގަދަވުން އެކަށިގެންވާކަމަށެވެ. އަދި ކަނޑުތައް ގަދަވެ، ރާޅުގެ އުސްމިނުގައި 4 ފޫޓައި 7 ފޫޓު ހުންނާނެކަމަށްވެސް މޫސުމާ ބެހޭ ޤައުމީ އަދާރާއިން ލާފާކުރެއެވެ.
މޫސުމާ ބެހޭ ޤައުމީ އިދާރާއިން އާއްމުކޮށްފައިވާ މަޢުލޫމާތަށް ބަލާއިރު ވޭތުވެ ދިޔަ 24 ގަޑިއިރު އައްޑޫ ސިޓީ ހުޅުމީދޫއަށް 58.9 މިލިމީޓަރުގެ ވަނީ ވާރޭވެހިފައެވެ. ދެން އެންމެ ގިނައިން ވާރޭވެހުނު ލ.ކައްދޫއަށެވެ. އެއީ 51.4 މިލިމީޓަރުގެ ވާރޭއެވެ.
މިދުވަސްވަރަކީ މޫސުން ގޮސް ދުވަސްވަރެއްކަމުން ހުރިހާ ފަރާތްތަކުންވެސް ޚާއްސަކޮށް ކަނޑުދަތުރުކުރާ ފަރާތްތަކުން މޫސުމަށް ސަމާލުވުމަށް ކަމާބެހޭ ފަރާތްތަކުން އިލްތިމާސްކުރެއެވެ. މިގޮތުން ދަތުރަށް ފުރާއިރު މޫސުމަށް ބެލުމަށާއި މޫސުން ގޯސްނަމަ ދަތުރުތައް މަޑުޖައްސާލުމަށް ކަމާބެހޭ ފާރާތްތަކުން އިލްތިމާސްކުރެއެވެ.
