ރާއްޖޭގެ މަސްވެރިންނަށް ވެފައިވާ ވައުދުތައް، ޚާއްޞަކޮށް އެންމެ މުހިއްމު އެއް ވައުދު ކަމުގައިވާ ބާނާ މަސްކޮޅު ގަނެވޭނެ އިންތިޒާމް ހަމަޖައްސަވައިދެއްވުމަށް އެމް.އެން.ޕީ ގެ ޕީޖީ ލިޑަރ ތިމަރަފުށީ ދާއިރާގެ މެންބަރު ރިޔާޒް ގޮވާލައްވައިފިއެވެ.
ރިޔާޒް މިކަމަށް ގޮވާލެއްވީ މަސްވެރިން ބާނާ މަސް ނުކިރުމާއި، މަސް ގަތުން ކޮންޓްރޯލް ކުރުމާ، ބާނާ މަހަށް އަގު ނުލިބި މަސްކޮޅު ބަހާލަންޖެހޭތީ މިކަންކަން ޙައްލުކޮށްދިނުމަށް ގޮވާލާ ރައްޔިތުންގެ މަޖިލީހަށް މިއަދު ހުށަހެޅުނު ކުއްލި މައްސަލައާ ގުޅިގެން މަޖިލީހުގައި ވާހަކަ ދައްކަވަމުންނެވެ.
ރިޔާޒް ވިދާޅުވީ މި ސަރުކާރުން މަސްވެރިންނަށް ވީ ވައުދު ފުއްދުނު މިންވަރު މިކަމާ ޙަވާލުވެ ހުންނެވި ވަޒީރަށް އެނގިވަޑައިގެންފައި ނުވާތީ ހިތާމަކުރައްވާ ކަމަށެވެ. ރިޔާޒްގެ ވާހަކައިގައި ކޮޅުމަޑުލަކީ މަސްވެރިކަން ފިޔަވައި އިޤްތިޞާދީ މާ ގިނަ ޞިނާޢަތްތަކެއް ނެތް ހިސާބެއް ކަމާއި، މި ސަރަޙައްދުން މިހާރު އައިސް ލިބޭނެ ގޮތް ނެތި، މިކަން ހައްލުވާނެ އިރެއް ނެނގޭކަމާއި، މީގެ އިތުރުން ތ. ފުނައްޑޫ އޮޕަރޭޝަނާ މިފްކޯއިން ޙަވާލުވިޔަސް، އެތަނުގެ މަސައްކަތް ފެށުމަށް ކުރަންޖެހޭ މަސައްކަތްތައް ކުރުމަށް ބޭނުންވާ ފައިސާ ހަމަޖެހިފައިނުވާކަން މިނިސްޓަރު ވިދާޅުވެފައިވާތީ، އެކަން ފާހަގަކުރެއްވިއެވެ.
އަދި މިއަދު މަސްވެރި އެތައް ދޯނިތަކެއް މި ކަން ހުއްޓާލައި މުދާ ސަޕްލައިކުރާ ސަޕްލައި ދޯނިތަކަށް ބަދަލުކޮށްފައިވާކަން ހިތާމައާއެކު ފާހަގަކުރެއްވިއެވެ.
