ކޯވިޑް-19 ފެނުމާ އެކު ހުއްޓާލާފައިވާ ރާއްޖެ އާއި ޗައިނާއާ ދެމެދު ބާއްވާ ފްލައިޓުތައް އަންނަ މަހު އަލުން ފެށުމަށް މަސައްކަތް ކުރައްވަމުން ގެންދަވާ ކަމަށް ޗައިނާއިން ރާއްޖެއަށް ކަނޑައަޅާފައި ހުންނަވާ ސަފީރު ވާން ލިޖިން ވިދާޅުވެއްޖެއެވެ.
ކޯވިޑް-19ގެ ކުރިން ރާއްޖޭގެ ފަތުރުވެރިކަމުގެ އެންމެ މުހިންމު އެއް މާކެޓަކީ ޗައިނާއެވެ. ނަމަވެސް ކޯވިޑާއެކު އެ ޤައުމުގައި އެޅި ރައްކާތެރިކަމުގެ ފިޔަވަޅުތަކާއެކު ދަތުރުފަތުރުގެ ދަތިކަން ކުރިމަތިވެ، މިވީ 2 އަހަރެއްހައި ދުވަހުގެ ތެރޭގައި ޗައިނާގެ ފަތުރުވެރިން ރާއްޖެ އައިސްފައެއްނުވެއެވެ.
ދައުލަތުގެ މީޑިއާގެ ޕްރޮގްރާމްގައި ވާހަކަދައްކަވަމުން ޗައިނާއިން ރާއްޖެއަށް ކަނޑައަޅާފައި ހުންނަވާ ސަފީރު ވާންގް ލިޖިން ވިދާޅުވީ، ޗައިނާގެ ފަތުރުވެރިން ތިބީ ރާއްޖެއައުމަށް ވަރަށްބޮޑަށް ބޭނުންވެފައިކަމަށެވެ. ޗައިނާގެ ކޯވިޑްގެ ޙާލަތު ރަނގަޅުވަމުން އަންނައިރު ވަރަށްއަވަހަށް ޗައިނާއާއި ރާއްޖެއާ ދެމެދު ދަތުރު ފެށިގެންދާނެކަމަށް އުންމީދުކުރައްވާކަމަށްވެސް ސަފީރު ވިދާޅުވިއެވެ.
ސަފީރު ވިދާޅުވީ، އޮން އެރައިވަލް ވިސާ ލިބޭނެ އިންތިޒާމް ރާއްޖެއާއި ޗައިނާއާ 2 ޤައުމުގެ ދެމެދުގައި ހަމަޖައްސާފައި އޮތުމަކީ ދެޤައުމުގެ ދެމެދުގައި އަލުން ދަތުރުތައް ފެށުމުން ރާއްޖެއަށް އަންނަ ޗައިނާ ފަތުރުވެރިންގެ އަދަދު އިތުރުވެގެންދާނެ މުހިންމު ސަބަބެއްކަމަށެވެ.
ޗައިނާގައި މިހާރު ވެސް އަމަލުކުރަމުން އަންނަނީ ޒީރޯ ކޮވިޑްގެ ސިޔާސަތަށެވެ. އެއް ކޭސް ފެނިއްޖެނަމަ ވެސް ސިޓީތަކާއި ޓައުންތައް ލޮކްޑައުންކޮށް މާސް ޓެސްޓިން ކުރިއަށްގެންދެއެވެ. އަދި، އެ ގައުމަށް އެތެރެވުމާއި ބޭރުވުމުގައި ވެސް ހަރުކަށި ޕްރޮޓޮކޯލްތަކެއް ވަނީ އެކުލަވާލަފައެވެ.
ކޯވިޑާއެކު ރާއްޖެއަށް ޗައިނާއިން ފަތުރުވެރިން އައުން ހުއްޓިފައި އޮތްނަމަވެސް ކޯވިޑްގެ ކުރިން 2019ވަނަ އަހަރު ރާއްޖެއަށް އެންމެ ގިނައިން ފަތުރުވެރިން އައި ޤައުމަކީ ޗައިނާއެވެ. ތަފާސްހިސާބުތައް ދައްކާގޮތުން 2019ވަނަ އަހަރު ޗައިނާއިން ރާއްޖެއަށް 284،029 ފަތުރުވެރިން ވަނީ އައިސްފައެވެ.
