ޔުއެފާ ނޭޝަންސް ލީގުގެ ގްރޫޕް އޭ ހަތަރެއްގައި ޕޯލަންޑާ ދެކޮޅަށް ކުޅުނު މެޗު ނެދަލަންޑްސްއިން ކާމިޔާބުކޮށްފިއެވެ.
ޕޯލަންޑްގައި ކުޅުނު މިމެޗް ނެދަލަންޑްސް ކާމިޔާބުކޮށްފައިވަނީ 2-0 ގެ ނަތީޖާއަކުންނެވެ. ދެޓީމްގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗްގައި ގިނައިރު ބޯޅަ ގެންގުޅެ ގިނަ ހަމަލާ އުފައްދާފައިވަނީ ނެދަލަންޑްސްއިންނެވެ. ވޯސޯގައި ކުޅުނު މިމެޗްގައި ނެދަލަންޑްސްގެ ފުރަތަމަ ލަނޑު މެޗްގެ 13 ވަނަ މިނެޓްގައި ޖަހާދިނީ ކޯޑީ ގަކްޕޯއެވެ. އަދި އެޓީމްގެ ދެވަނަ ލަނޑު މެޗްގެ 60 ވަނަ މިނެތްގައި ޖަހާދިނީ ސްޓީވެން ބަރގްވިންއެވެ. މިމެޗްގައި މިގެއިތުރުންވެސް ލަނޑު ޖަހާނެ ފުރުސަތު ދެޓީމަށްވެސް ލިބިގެން ގޮސްފައިވެއެވެ.
މިކާމިޔާމިޔާބީއާއެކު ނެދަލަންޑްސް މިވަގުތު އޮތީ ގްރޫޕް އޭ އޯގެ އެއްވަނައިގައެވެ. އެއީ މިހާތަނަށް ކުޅުނު ފަސް މެޗުން ލިބިފައިވާ 13 ޕޮއިންޓާއެކުއެވެ. އަދި ފަހު މެޗްގައި ބެލްޖިއަމް އަތުން ބަލިނުވެ ފަރު ޖައްސައިފި ކަމަށްވާނަމަ ނޭޝަންސް ލީގުގެ ފައިނަލުން ނެދަލަންޑްސްއަށް ޖާގަލިބިގެންދާނެއެވެ.
މިމެޗުން ބަލިވުމުން ޕޯލަންޑް އުޅެނީ 4 ޕޮއިންޓާއެކު ގްރޫޕްގެ ތިންވަނައިގައެވެ. އަދި ފަހު މެޗްގައި ވޭލްސް އާއި ބައްދަލުކޮށް ބަލިނުވެ ފަރު ޖައްސައިފި ކަމަށްވާނަމަ ޕޯލަންޑަށް ރެލިގޭޝަނުން ސަލާމަތް ވެގެންދާނެއެވެ. އަދި އެމެޗުން ބަލިވެއްޖެނަމަ ނޭޝަންސް ލީގުގެ ދެވަނަ ދަރަޖައަށް ޕޯލަންޑް ރެލިގޭޓް ވެގެންދާނެއެވެ.
