ޔުއެފާ ނޭޝަންސް ލީގުގެ ގްރޫޕް އޭ ހަތަރެއްގައި ވޭލްސްއާ ދެކޮޅަށް ކުޅުނު މެޗު ބެލްޖިއަމުން ކާމިޔާބުކޮށްފިއެވެ.
ބްރަސެލްސްގެ ކިންގ ބައުޑުއިން ސްޓެޑިއަމްގައި ކުޅުނު މިމެޗް ބެލްޖިއަމް ކާމިޔާބުކުރީ 2-1 ގެ ނަތީޖާއަކުންނެވެ. ދެޓީމްގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗްގައި ގިނައިރު ބޯޅަ ގެންގުޅެ ގިނަ ހަމަލާ އުފައްދާފައިވަނީ ބެލްޖިއަމްއެވެ. މިމެޗްގެ ފުރަތަމަ ލަނޑު މެޗްގެ 10 ވަނަ މިނެޓްގައި ޖަހާ ލީޑު ނެގީ ބެލްޖިއަމްއިންނެވެ. މިލަނޑު އެޓީމަށް ކާމިޔާބުކޮށްދިނީ ކެވިން ޑި ބުރުއިނަރއެވެ. އަދި އެޓީމްގެ ދެވަނަ ލަނޑު މެޗްގެ 37 ވަނަ މިނެޓްގައި ޑި ބުރުއިނަރ ތަނަވަސްކޮށްދިން ފުރުސަތެއްގައި ކާމިޔާބުކޮށްދިނީ މިޗީ ބަޓްޝުވާއީއެވެ.
މިމެޗްގެ ފުރަތަމަ ހާފް ނިމުނު އިރު ދެ ލަނޑު ސުންލަނޑުން ބެލްޖިއަމް ކުރީގައި އޮތް ނަމަވެސް މިހާފްގައި އެޓީމްގެ ލީޑު ފުޅާކުރާނެ ގިނަ ފުރުސަތު ތަކެއް ބެލްޖިއަމްއަށް ލިބިގެންދިޔައެވެ. މިމެޗްގެ ފުރަތަމަ ހާފާއި ހިލާފަށް ދެވަނަ ހާފްގައި ވޭލްސްއިން ވަނީ ހިތްވަރު އާކޮށް އެޓީމްގެ ކުޅުން ރަނގަޅުކޮށްފައެވެ. އަދި މެޗްގެ 50 ވަނަ މިނެޓްގައި ކީފަރ މޯ ޖަހާދިން ލަނޑުން އެޓީމަށް އިތުރު ހިތްވަރު ލިބިގެންދިޔައެވެ. އަދި މިލަނޑާއެކު މިމެޗްގެ ނިމުން ދިޔައީ ވަރަށް ވާދަވެރިކޮށެވެ. މިގޮތުން ވޭލްސްއަށް މެޗްގެ ނަތީޖާ ހަމަހަމަ ކުރާނެ ފުރުސަތުވެސް ލިބިގެން ގޮސްފައިވެއެވެ.
މިކާމިޔާބީއާއެކު ބެލްޖިއަމްއަށް ފަސް މެޗުން 10 ޕޮއިންޓް ލިބިފައިވާއިރު ނޭޝަންސް ލީގުގެ ފައިނަލަށް ދިއުމަށް ކުރާ އުންމިދު ކުޅިން ނުގެއްލެއެވެ. ބެލްޖިއަމް އާއި ހިލާފަށް ވޭލްސްއަށް މިނާކާމިޔާބީއާއެކު ނޭޝަންސް ލީގުގެ ދެވަނަ ދަރަޖައަށް ރެލިގޭޓް ވުމުގެ ބިރު މިހާރު އެބައޮތެވެ. އެޓީމަށް މިކަމުން ސަލާމަތް ވެވެން އަންނަނީ މިއަންނަ އާދީއްތަ ދުވަހުގެ ރޭ ޕޯލަންޑާއި ބައްދަލުކުރާ މެޗުން މޮޅުވެގެންނެވެ.
