ރައީސުލްޖުމްހޫރިއްޔާ ރައްޔިތުންނަށް ވިދާލުވާ ވާހަކަފުޅަކީ ވަޢުދުފުޅެއް ނޫންކަމަށް ރައްޔިތުންގެ މަޖިލީހުގެ ރައީސް މުޙައްމަދު ނަޝިދު ވިދާޅުވެއްޖެއެވެ.

މަޖިލީހުގެ މިއަދުގެ ޖަލްސާގައި، ކުޑަހުވަދޫ ދާއިރާގެ މެންބަރު އަޙްމަދު އާމިރު ވަނީ ދ.އަތޮޅުގައި ހައުސިންގ މަޝްރޫޢު ހިންގުމަށް ސަރުކާރުން ވެފައިވާ ވަޢުދާއި ގުޅޭގޮތުން ހައުސިން މިނިސްޓަރ މުޙައްމަދު އަސްލަމާ ސުވާލު ކުރައްވާފައެވެ. އެކަމާއި ގުޅޭގޮތުން ރިޔާސަތުގައި އިންނެވި މަޖިލީހުގެ ރައީސް މުޙައްމަދު ނަޝީދު ވިދާޅުވީ، ރައީސްގެ ވާހަކަފުޅުތަކާއި ގުޅިގެން ވަރަށް ގިނަ މެންބަރުން އެއީރައީސްގެ ރިޔާސީ ވަޢުދުކަމަށް ފާހަގަކުރައްވާކަމަށެވެ. އެއީ ވައުދެއް ނޫންކަމަށާއި، ރައީސްގެ ވައުދަށް ވާނީ މެނިފެސްޓޯގައި ފާހަގަކޮށްފައި ހުންނަ ކަންކަންކަމަށްވެސް ނަޝީދު ވިދާޅުވިއެވެ.

އިއްޒަތްތެރި މެންބަރުން ވަރަށް ގިނައިން ވިދާޅުވޭ ރައީސް ރިޔާސީ ވައުދުގެ ގޮތުގައި ވިދާޅުވެފައިވާ ވަޢުދުތައް. ޢާންމު އުސޫލެއްގައި ސިޔާސީ ޕާޓީތަކުން ވެފައިވާ ވައުދުތަކަކީ ސިޔާސީ ޕާޓިތަކުގެ މެނިފެސްޓޯތަކުގައި ލިޔެފައިވާ ވާހަކަތައް. އިއްޒަތްތެރި މެންބަރުން ވިދާލުވޭ އެވެނި ރަށެއް މިވެނި ރަށަކަށް ރައީސުލްޖުމްހޫރިއްޔ ވަޑައިގެން މިވެނި ވާހަކައެއް ވިދާޅުވުން އެއީ ވަޢުދެއްކަމަށް. ނަމަވެސް އަޅުގަނޑަށް ފެންނަ ފެނުމުގައި ވައުދެއްގެ ގޮތުގައި އަޅުގަނޑުމެން ބަލާން މިޖެހެނީ މެނިފެސްޓޯގައި ލިޔެފައިވާ ވައުދު. މީގެ ކުރީގައި އަޅުގަނޑަށް އެނގޭ ޕާޓީތަކުން ވިދާޅުވެފއި އެބަހުރިކަން އެއީ ބެނާތައް ތައްގަނޑުޖެހި ކުދިން ޖެހި އެއްޗެއްކަމަށެވެސް.

– ރައީސް ނަޝީދު ވިދާޅުވިއެވެ.

ނަޝިދު ވަނީ ރައީސްގެ ވައުދުފުޅާއި ގުޅޭގޮތުން މެންބަރުން ވާހަކަފުޅު ދެއްކުން ރަނގަޅު ނޫންކަމަށްވެސް ވިދާޅުވެފައެވެ.

ރައީސުލްޖުމްހޫރިއްޔާ އެއްޗެއް ވިދާޅުވީމާ އެއީ ވައުދެއްކަމަށް ޤާނޫނެއްކަމަށް ނުވަތަ ހުކުމެއްކަމަށް ވިދާޅުވެ ވާހަކަ ދެއްކުމަކީ އެއްގޮތަކަށްވެސް ރަނގަޅުކަމެއް ނޫން.

– ރައީސް ނަޝީދު ވިދާޅުވިއެވެ.

އާމިރުގެ ސުވާލަށް މަޖިލީހުގައި ޖަވާބުދެއްވަމުން ހައުސިން މިނިސްޓަރ އަސްލަމް ވިދާޅުވީ، ރައީސްގެ ވައުދުފުޅުގެ ލިސްތެއް އެމަނިކުފާނުގެ އަތްޕުޅުގައި ނެތްކަމަށެވެ. އަދި ރައީސް ވެވަޑައިގެންފައިވާ އެއްވެސް ވައުދެއް ނުހިނގާ އޮންނާނެކަމަށް ޤަބޫލު ނުކުރެވޭކަމަށްވެސް އަސްލަމް ވިދާޅުވިއެވެ.