އެއާޕޯޓްގައި ޖަސޫސް ކުރަން އުޅުމުން، ސެކިއުރިޓީ ވަރުގަދަ ކުރަން ގޮވާލާ ހުށަހެޅި ކުއްލި މައްސަލަ ބޭރު ކޮށްލައިފިއެވެ.
މި ކުއްލި މައްސަލަ ރައްޔިތުންގެ މަޖިލީހަށް ހުށަހެޅީ މާވަށު ދާއިރާގެ މެމްބަރު މުހައްމަދު ސައީދުއެވެ. އެ ކުއްލި މައްސަލަ ބައިގަތުމަށް ފެންނަ ކަމަށް 6 މެމްބަރުން ވޯޓު ދެއްވިއިރު، 34 މެމްބަރުން ވޯޓު ދީފައިވަނީ އެ ކުއްލި މައްސަލަ ބަލައނުގަތުމަށެވެ.
ސިއްރު ކެމެރާތަކެއް ބޭނުންކޮށްގެން ވީއައިއޭގައި ޖާސޫސް ކުރަން އުޅެނިކޮށް އިންޑިއާގެ ދެ މީހަކު އަތުލައިގަތީ މިދިޔަ މަހުގެ 28 ވަނަ ދުވަހުއެވެ. އަދި އެކަމުގައި އުޅުނު އެހެން ބަޔަކު ވަނީ ފުރައިފައެވެ. އެ މައްސަލަ ހުށަހަޅުއްވަމުން ސައީދު ވިދާޅުވީ އިންޑިއާގެ އޮފިޝަލަކު އައިސް ހައްޔަރުކުރި މީހުން ދޫކޮށްލުމަށް އެދިފައިވާ ކަމަށާއި އަދި އެކަމާ ގުޅޭ ގޮތުން ފުލުހުން ނެރުނު ރިޕޯޓަކީވެސް އަސްލާ ނުގުޅޭ އެހެން ރިޕޯޓެއް ކަމަށެވެ. އަދި އެ މައްސަލައިގެ ކަންބޮޑުވުން އެހެން ގައުމުތަކުން ވެސް ފާޅުކޮށްފައިވާ ކަމަށް އޭނާ ވިދާޅުވިއެވެ.
ސައީދު ވިދާޅުވީ ޖާސޫސޫން ދިޔައީ ފޫނުބެއްދޭ ވަރުގެ ގައުމީ ސަލާމަތަށް ނުރައްކާވާ ވަރުގެ އަމަލެއް ހިންގުމަށް ތައްޔާރުވުމަށް ކަމަށެވެ. ހަމަ އެހެންމެ އެކަމާ ގުޅޭ ގޮތުން ފުލުހުން މައުލޫމާތު ނުދިނުމާއި އަދި ހައްޔަރުކުރި މީހުން ވީތަނެއްވެސް ނޭނގުމާއި އަދި އެއާޕޯޓްގެ ސަލާމަތީ ކަންކަން ހަރުދަނާ ކުރުމަށް ކުރި މަސައްކަތް ވެސް ނޭނގޭ ކަމަށް ބުނެފައިވެއެވެ. އަދި ނުރައްކާތެރި އަމަލެއް ހިންގައިފިނަމަ ފަތުރުވެރިކަމަށް ބަރޯސާ ވެފައިވާ ރާއްޖެއަށް އިއާދަ ނުކުރެވޭ ވަރުގެ ބޮޑު ގެއްލުމަކާ ކުރިމަތިިލާން ޖެހިދާނެ ކަމަށް ސައީދު ވިދާޅުވިއެވެ.
އެހެންކަމުން އެކަމާ ގުޅޭ ގޮތުން ދެފުށް ފެންނަ ތަހުގީގެއްކޮށްކޮށް އެ މައްސަލައާ ގުޅޭ މައުލޫމާތު މަޖިލީހަށް ހާމަކަޮށް އަދި އެއާާޕޯޓްގެ ސަލާމަތީ ކަންކަންކަން ވަރުގަދަ ކުރަން އަޅަން ޖެހޭ ފިޔަވަޅުތައް އަޅަން ސައީދު ގޮވާލެއްވިއެވެ.
