އިދިކޮޅު ޕީޕީއެމްގެ މެމްބަރުންގެ ތެރެއިން އެހެން ޕާޓީއަކަށް އޮޅުވާލައިގެން ވަގަށް ގެންގޮސްފައިވާ މެމްބަރުން އަނބުރާ އެޕާޓީއަށް ރުޖޫއަށް ކޮށްދޭން އިލެކްޝަން ކޮމިޝަންގައި އެދިއްޖެއެވެ.
އޮޅުވާލައިގެން ޕާޓީތަކަށް މެމްބަރުން ބަދަލު ކުރާ މައްސަލައަކީ ވަރަށް އާންމު އަދި މިހާތަނަށް ހައްލު ނުކުރެވިފައިވާ މައްސަލައެކެވެ. ޕީޕީއެމްއިން ވަނީ އެޕާޓީގެ މެމްބަރުންގެ ތެރެއިން ބައެއް މެމްބަރުންނަށް ނޭގި އެހެން ޕާޓީތަކަށް މެމްބަރުން ބަދަލުކޮށްފައިވާ މައްސަލާގައި އެމެމްބަރުން އަލުން އަނބުރައި ޕީޕީއެމްއަށް އިޔާދަ ކޮށްދޭން އިލެކްޝަންގައި މިއަދު އެދިފައެވެ.
އިލެކްޝަން ކޮމިޝަނާއިއެކު ބޭއްވި ބައްދަލުވުމަށްފަހު ޕީއެންސީގެ ނައިބް ރައީސް މުހައްމަދު ހުސެއިން ޝަރީފް (މުންދު) ވިދާޅުވީ އެޕާޓީން ވަގަށް އޮޅުވާލައިގެން ގެންގޮސްފައިވާ މެމްބަރުންނަކީ ކޮބައިކަން ދެނެގަނެ އެމެމްބަރުންގެ މައުލޫމާތު އިލެކްޝަނަށް މިއަދު ހިއްސާ ކޮށްފައިވާކަމަށެވެ. އަދި މިމެމްބަރުން ވީހާވެސް އަވަހަކަށް ޕީޕީއެމްއަށް ވެއްދޭނެ ގޮތެއް ހަމަޖެއްސުމަށް އެދިފައިވާކަމަށެވެ.
އޮޅުވާލައިގެން ޕާޓީތަކަށް މެމްބަރުން ބަދަލު ކުރާ މައްސަލައަކީ ޕީޕީއެމްއިން ގަބޫލުކުރާ މައްސަލައެއްކަން ފާހަގަކޮށް މުންދު ވިދާޅުވީ އެޕާޓީން މެމްބަރުން މައިގަނޑު ގޮތެއްގައި ގެންގޮސްފައިވަނީ ތިން ޕާޓީއަކަށް ކަމުގައެވެ. އެޕާޓީތަކަކީ ކިރިޔަ ކިރިޔާ ޤާނޫނީ އަދަދު ހަވާ ޕާޓީތަކަށްވާއިރު، އެޕާޓީތައް ދެމި އޮތުމަށްޓަކައި ޕީޕީއެމްގެ ދަފްތަރުން މެމްބަރުން ވަގަން ނެގުމުގެ ޖާގަ ލިބިގެން ނުވާކަމަށް އޭނާ ވިދާޅުވިއެވެ.
އޮޅުވާލައިގެން ޕާޓީތަކުގެ މެމްބަރުން ބަދަލު ކުރާ މައްސަލާގައި އިލެކްޝަނުން ޕާޓީތައް ޖޫރިމަނާ ކުރުމުގެ އުސޫލެއް ތަޢާރަފް ކުރިނަމަވެސް އެކަން އަދި އޮތީ ފެށޭ ގޮތް ނުވެފައެވެ. ސައްޙަނޫން ފޯމް ހުށައަޅައިފިނަމަ އެ ސިޔާސީ ޕާޓިއެއްގެ ރަޖިސްޓްރާ ފުރަތަމަ ފަހަރު 5 ހާސް ރުފިޔާ، ދެވަނަ ފަހަރުން ފެށިގެން ދިހަ ހާސް ރުފިޔާއިން ޖޫރިމާނާ ކުރަން އިލެކްޝަންސް ކޮމިޝަނުން ނިންމަފައިވެއެވެ.
