ދިވެހިންނަކީ ކެއުމުގަައި އަބަދުވެސް ތަފާތު ރަހަތަށް ތަޖުރިބާކުރާ ހިތްވާ ބައެކެވެ. ދުނިޔޭގެ އެކި ސަރަހައްދުތަކުން އެކިއެކި ގައުމުތަކުގެ ރަހަތައް ރާއްޖެއަށް ތައާރަފް ކުރުމަކީވެސް މިހާރު އާންމު ކަމެކެވެ. އަދި މިފަދަ ރަހަތައް ތަޖްރިބާކޮށްލުމަކީ ދިވެހިންގެ ތެރޭގައި ވަރަށް ފޯރިއާއެކު ކޮށްއުޅޭ ކަމެއްވެސްމެއެވެ.
މިދިޔަ ބުރާސްފަތި ދުވަހު މާލޭގައި ހުޅުވި "ވިންޓޭޖް ކެފޭ އެންޑް ބިސްޓްރޯ" އަކީ މިފަދަ ތަފާތު އެއް ރެސްޓޯރެންޓެވެ. މާފަންނު މިރިޔާސް މަގު (އިހުސާން ފިހާރަ މަގު) ގައި ހުންނަ ޖާގަ ތަނަވަސް މި ރެސްޓޯރެންޓްގެ އެތެރެ ފަރުމާކޮށްފައިވަނީ އަރަބި، ހާއްސަކޮށް މިސްރުގެ އިހުސާސްތަށް ގެނެސްދޭފަދަ ގޮތަކަށެވެ.
އަރަބި ކެއުންތަކުގެ އިތުރުން ވެސްޓާން ކެއުންތައް ވެސް ލިބެންހުރި މި ރެސްޓޯރެންޓު ފަރުމާކޮށްފައިވަނީ ޒުވާނުން ވަރަށް ގަޔާވާނެ ފަދަ ގޮތަކަށެވެ. އެގޮތުން ތަނުގެ އެތެރޭގެ ޑިޒައިން ތަކާއި ސީޓިންގ އެރޭންޖްމެންޓް ވެސް ހުރީ ޒުވާނުން ގަޔާވާނެ ފަދަ ގޮތައް ވިސްނައިގެން ފަރުމާކޮށްފައެވެ.
90 މީހުނަށް އެއްފަހަރާ ހިދުމަތް ދެވޭނެ ފެންވަރަށް ތައްޔާރުކޮށްފައިވާ މި ރެސްޓޯރެންޓް އިވެންޓްތައް ބޭއްވުމަށް ވެސް ކުއްޔަށް ދޫކުރާނެ ކަމަށް މި ރެސްޓޯރެންޓްގެ މެނޭޖްމެންޓުގެ ފަރާތުން ވަނީ މައުލޫމާތު ދެއްވާފައެވެ.
ވިންޓޭޖް ސްޓައިލް ތަކަށް ޑިޒައިން ކޮށްފައިހުންނަ ކެފޭ ރެސްޓޯރެންޓް ތައް ފާހަގަ ކުރެވެނީ ފަހަކަށް އައިސް ޒުވާނުން މާ ގަޔާވާ ތަންތަނުގެ ގޮތުގައެވެ. އެގޮތުން އިންސްޓަގްރާމް ފޮޓޯތައްވެސް މިފަދަ ތަންތަނުގައި މާތަފާތުކަމަށް ގިނަ ޒުވާނުން ގަބޫލުކުރެއެވެ.
އެހެންކަމުން "ވިންޓޭޖް ކެފޭ އެންޑް ބިސްޓްރޯ" އަކީ އިންސްޓަގްރާމް ފޮޓޯތައް ނަގަން ޒުވާނުންނަށް އެންމެ ކަމުދާނެ އެއް ތަނެވެ. މި ރެސްޓޯރެންޓް ޒުވާނުންނަށް ހާއްސަ ކުރެވިފައި ވަނީ ވެސް މިފަދަ ސަބަބުތަކާއި އެކުއެވެ.
