ޤާނޫނުތަކުގައި ފާހަގަވާ ކަންކަން އިސްލާހުކުރުމަށް ސަރުކާރުން ބޭނުން ވެގެން މަޖިލީހަށް ހުށަހަޅާ އިސްލާހުތައް ޤާނޫނުތަކަށް ގެނެސް އިސްލާހުތައް ފާސްކުރުމުންވެސް ފެނިގެންދަނީ އެއަށް އަމަލުނުކޮށް އަނެއްކާވެސް އިސްލާހުތައް ހުށަހަޅާ މަންޒަރުކަމަށް ރައްޔިތުންގެ މަޖިލީހުގެ ކަނޑެތީމް ދާއިރާގެ މެމްބަރު ޝަހީމް ވިދާޅުވެއްޖެއެވެ.
ބިދޭސީންނަށް މިނިމަމްވޭޖް ދިނުން، މުއްދަތެއް ނެތްގޮތަށް ފަސްކުރަން ޤާނޫނަށް ހުށަހެޅި އިސްލާހަށް ފާޑު ވިދާޅުވަމުން ޝަހީމް ވިދާޅުވީ މި އިސްލަހަކީ ތައީދު ކުރާނެ އިސްލާހެއް ނޫންކަމަށެވެ. މިއިސްލާހަކީ ރާއްޖޭގެ މަސައްކަތްތެރިންނަށް އޮތް ފުރުސަތު ހަނިކޮށް ދިވެހިންނަށް ވަޒީފާގެ ދަތިކަން އިތުރުކުރުމަށް ހުށަހެޅިގެން ދިޔަ އިސްލާހެއްކަމަށް އޭނާ ވިދާޅުވިއެވެ.
ސަރުކާރުން ފެނިގެންދަނީ ރައްޔިތުންނަށް ޚިދުމަތް ކުރުމަށް އިހުލާސްތެރި ކަމާއިއެކު ކުރަންޖެހޭ މަސައްކަތްތައް ކުރުމުގެ ބަދަލުގައި ކުރަން ނުޖެހޭ ކަންކަން ކުރާތަންކަމަށެވެ. ސަރުކާރަކުން ޤައުމުގެ ވެރިކަމާއި ހަވާލުވަނީ ރައްޔިތުންނަށް ޚިދުމަތް ކުރަން ކަމަށްވާއިރު، އެހުލާސްތެރި ނިޔަތެއްގައި އެކަން ފެނިގެން ނުދާކަމީ ހިތާމަ ކުރައްވާ ކަމެއްކަމަށް ޝަހީމް ވިދާޅުވިއެވެ.
ސަރުކާރާއި ހަވާލުވެ އެންމެ ރަނގަޅަށް މަސައްކަތް ކުރުން އެއީ އެންމެ ރަނގަޅު ގޮތް. ފެނިގެން ދަނީ ޤާނޫނަށް އިސްލާހު ގެނައުމުން އެއަށް އަމަލު ނުކޮށް އަނެއްކާ މަޖިލީހަށް ފޮނުވާލާތަން.
– ޝަހީމް ވިދާޅުވިއެވެ.
ވަޒީފާއާއިބެހޭ ޤާނޫނަށް މި އިސްލާހު ހުށަހެޅުއްވީ ރައްޔިތުންގެ މަޖިލީހުގެ ކުޅުދުއްފުށީ ދެކުނު ދާއިރާގެ މެމްބަރު ޖަމްޝީދު މުހައްމަދު އެވެ. ޖަމްޝީދު މި އިސްލާހު ހުށަހެޅުއްވީ ދުނިޔެެއަށް މިހާރު ކުރިމަތިވެފައިވާ އިޤްތިޞާދީ ހާލަތުގެ ސަބަބުން ރާއްޖޭގެ އިޤްތިޞާދަށްވެސް އޭގެ ނޭދެވޭ އަސަރު ކޮށްފައިވާތީ އެކަމަށް ރިޢާޔަތްކޮށެވެ. މިއިސްލާހްގައި ބިދޭސީ މަސައްކަތްތެރިންނާއި ގުޅޭގޮތުން ވަޒީފާދޭ ފަރާތްތަކުން އަމަލު ކުރަން ލާޒިމް ކޮށްފައިވާ ދެ އަހަރުގެ މުއްދަތަށް ބަދަލު ގެނައުމަށް ހުށަހަޅާފައިވެއެވެ.
އެކަން ކުރުމުގެ މުއްދަތެއް ޤާނޫނުގައި ބަޔާން ކުރުމުގެ ބަދަލުގައި އެކަން ކުރަން ލާޒިމް ވާނީ ރާއްޖޭގެ އިޤްތިޞާދީ ހާލަތާއި ޤައުމުގެ ފުދުން ތެރިކަމާއި އުފެއްދުންތެރިކަމަށް ރިޢާޔަތްކޮށް މިނިމަމްވޭޖް އެޑްވައިޒަރީ ބޯޑުން ދޭ ލަފަޔާއި އެއްގޮތްވާ ގޮތުގެ މަތީން މިނިސްޓަރު ކަނޑައަޅައި އާންމުކުރާ ތާރީޚެއްގައިކަމަށް ޖަމްޝީދުގެ އިސްލާހުގައި ބުނެފައިވެއެވެ.
ރާއްޖޭގައި ވަޒީފާ އަދާކުރާ ކޮންމެ ދިވެހި މުވައްޒިފަކަށް ދެވޭ އެންމެ ކުޑަ އުޖޫރައަކީ 4500 ރުފިޔާ ކަމަށް ކަނޑައަޅައި ޤާނޫނަށް އިސްލާހު ގެނައިރު، ބިދޭސީ މުވައްޒިފުންގެ ކުޑަ އުޖޫރަ ދޭނެ ތާރީޚެއްކަމަށް ކަނޑައަޅާފައިވަނީ ދެ އަހަރުގެ މުއްދަތެކެވެ.
އެންމެ ކުޑަ އުޖޫރަ ނުވަތަ މިނިމަމް ވޭޖުގެ ގޮތުގައި ކަނޑައަޅާފައިވާ 5،700 ރުފިޔާއަކީ ކުދި ވިޔާފާރިތަކުގައި ދުވާލަކު 8 ގަޑިއިރު މުވައްޒަފަކު މަސައްކަތް ކުރުމުން މަހެއްގެމައްޗަށް ދޭންޖެހޭނެ މިންވަރެވެ. މިނިމަމް ވޭޖް އެޑްވައިޒަރީ ބޯޑުން ފާސްކޮށްފައިވާ ގޮތުން މެދު ފަންތީގެ ވިޔަފާރިތަކުގައި ދުވާލަކު 8 ގަޑިއިރު މަސައްކަތްކުރުމުން މަހެއްގެ މައްޗަށް މުވައްޒަފުންނަށް 7،000 ރުފިޔާ މުސާރައިގެ ގޮތުގައި ދޭންވާނެއެވެ.
