އަތޮޅުތެރޭގެ ރަށްރަށުން މީހުން މާލެއަށް ހިޖުރަކުރާ މައިގަނޑު ސަބަބަކީ އެ ރަށްރަށުގައި މިނިފޫހި ފިލުވޭނެ ގޮތެއް ނެތުންކަމަށް ރައްޔިތުންގެ މަޖިލީހުގެ ރައީސް މުޙައްމަދު ނަޝީދު ވިދާޅުވެއްޖެއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ތޮއްޑޫ ދާއިރާގެ މެންބަރު އަޙްމަދު ޝިޔާން ވަނީ މާލެ އާއި ރަށްރަށުގެ ކަރަންޓު ހިދުމަތް ބިލް ކުރުމުގައި ގެންގުޅޭ ތަފާތުތައް ނައްތާލުމަށް ޤަރާރެއް ހުށައަޅުއްވާފައެވެ. އެ ގަރާރާއި ގުޅިގެން ކުރެވުނު ބަހުސްގެ ތެރެއިން ރައީސް ނަޝީދު ވިދާޅުވީ، ރަށްރަށުން މާލެއަށް މިހާރު ހިޖުރާކުރާ ސަބަބުތަކުގެ ތެރޭގައި މުނިފޫހިފިލުވުމާއި ރަށްރަށުގައި ކުރާނެކަމެއް ނެތުމާއި، އާބަން ދިރިއުޅުމަށް މިހާރުގެ ޖީލުގެ މާ ބޮޑަށް ޝައުގުވެރިވާ ކަމަށް ޤަބޫލުކުރެއްވޭކަމަށެވެ.
ރައީސް ނަޝީދު ވިދާޅުވީ، ރަށްފުށުގެ ދިރިއުޅުމަށް މިހާރުގެ ޖީލުގެ ދިވެހިން ޝައުގުވެރިނުވާ ކަމަށެވެ. ރައީސް ނަޝީދު ވިދާޅުވީ، ކުޑަ އަދި ބޮޑު ރަށަކަށް ބެލުމެއް ނެތި ރަށްރަށުގައި އާންމު ޚިދުމަތްތައް ޤާއިމުކުރަން ސަރުކާރުން ވަރަށް ބޮޑަށް މަސައްކަތްކޮށްފައިވާ ކަމަށެވެ. ނަމަވެސް ހިޖުރަކުރާ މިންވަރަށް ތަފާތެއް ނައުމުން އެކަމާމެދު ގެންގުޅޭ ވިސްނުން ބަދަލުކުރަންޖެހޭކަމަށް ރައީސް ނަޝީދު ވިދާޅުވިއެވެ.
ރައީސް ނަޝިދު މިހެން ވިދާޅުވެފައިވާއިރު، މާލެއަށް އަތޮޅުތަކުން ގިނައިން ހިޖުރަކުރަނީ އަސާސީ ޚިދުމަތްތައް ހޯދުމަށެވެ. އޭގެ ތެރޭގައި ސިއްޙީ ޚިދުމަތާއި ތަޢުލީމާއި ވަޒީފާއަށްކަމަށް ތަފާސް ހިސާބުތަކުން ދައްކައެވެ. 2019 ވަނަ އަހަރުގެ ހައުސްހޯލްޑިން ސާރވޭ ދައްކާގޮތުން މާލޭގައި ދިރިއުޅޭ ރައްޔިތުންގެ ތެރެއިން 48 އިންސައްތަ މީހުންނަކީ ރަށްރަށުން މާލެއަށް ހިޖުރަކޮށްފައިވާ ފަރާތްތަކެވެ.
