ވެލިދޫ ކޯޓުގެ އިސް މެޖިސްޓްރޭޓް އަހުމަދު ސައީދުގެ މައްޗަށް ތުހުމަތު ކުރެވޭ މައްސަލައެއް ޖުޑީޝަލް ސާވިސް ކޮމިޝަނުން ބަލަން ފެށުމުން އޭނާ އިސްތިއުފާ ދެއްވައިފިއެވެ.
ޖުޑީޝިއަލް ސާވިސް ކޮމިޝަން (ޖޭއެސްސީ)ން ބުނީ، އިސްމެޖިސްޓްރޭޓް އަހްމަދު ސައީދު ފަނޑިޔާރުކަމުގެ މަގާމުން އިސްތިއުފާ ދެއްވީ މިއަދު ކަމަށެވެ. އަދި އެ ކޮމިޝަނަށް އިސްތިއުފާގެ ސިޓީ މިއަދު ލިބިފައިވާކަމަށްވެސް ބުނެފައި ވެއެވެ.
އޭނާ އިސްތިއުފާ ދެއްވިއިރު، ޖޭއެސްސީން ވަނީ އޭނާގެ ސުލޫކީ މައްސަލައެއް ބަލަން ފަށައިފައެވެ. އެއީ ވެލިދޫ ކޯޓުގެ މައްސަލަތައް ނިންމުމުގައި ރިޝްވަތު ނަގާކަމަށް ބުނެ ހުށަހެޅުނު މައްސަލައެކެވެ.
ޖޭއެސްސީން މީގެ ކުރިން ވަނީ އިސްމެޖިސްޓްރޭޓް އަހްމަދު ސައީދުގެ ސުލޫކީ މައްސަލައެއް ބެލިއެވެ. ނަމަވެސް އެ މައްސަލަ ސާބިތު ނުވާ ކަމަށް މި އަހަރުގެ މާރިޗް މަހު ވަނީ އަންގާފައެވެ.
