އަދާލަތު ޕާޓިން ކުރިއަށް އޮތް 10 އަހަރަށް އަމާޒުކޮށް، އެޕާޓިގެ ސްޓްރެޓެޖިކް ޕްލޭން އެކުލަވާލައިފިއެވެ.
ސަރުކާރު ކޯލިޝަންގައިވެސް ހިމެނޭ އަދާލަތު ޕާޓީން މި ސްޓްރެޓެޖިކް ޕްލޭން ފާސްކުރީ ރޭ ބޭއްވި އެޕާޓިގެ މަޝްވަރާ ބައްދަލުވުމުގައި، ބައިވެރިވެވަޑައިގެންނެވި މެންބަރުންގެ އަޣްލަބިއްޔަތުންނެވެ. ހޯމް މިނިސްޓަރ އަދި އެޕާޓިގެ ރައީސް ޢިމްރާން ރިޔާސަތު ބެލެހެއްޓެވި މި ބައްދަލުވުމުގައި ޕްލޭން ފާސްކޮށްފައިވަނީ މައިގަނޑު 8 ދާއިރައަކުން އެޕާޓީގެ ހަރަކާތްތައް ކުރިއަށް ގެންދިއުމަށެވެ.
އަދާލަތު ޕާޓިގެ ސްޓްރެޓެޖިކް ޕްލޭންގައި ހިމެނޭ ދާއިރާތައް:
- އެތެރޭގެ ހިންގުން
- ގޮފި އަދި ދާއިރާތައް
- ޕަބްލިކް ރިލޭޝަންސް
- ޕާޓީގެ ސިޔާސަތު
- އިންތިހާބުތައް
- ޕާޓީގެ މާލިއްޔަތު
- ދާހިލީ އަދި ހާރިޖީ ގުޅުންތައް
- ޕާޓީގެ މެންބަޝިޕް
Mirey beyvvi Adhaalath Party ge 3 vana dhauruge Mashvaraa Majleehuge 17 vana badhdhalvumun, kuriah oiy 10 aharu dhuvahah ekulavaali Adhaalath Party ge Strategic Plan thasdheeg koffi. pic.twitter.com/3e4W0BqtJ9
— Adhaalath Party (@AdhaalathOffice) September 4, 2022
ސްޓްރެޓެޖިކް ޕްލޭން ރޭ ތަސްދީްްކޮށް އަމަލުކުރަން ފަށާފައިވާއިރު، އެޕާޓިން ވަނީ އެ ޕްލޭންގެ ޑްރާފްޓް މިއަހަރުގެ ފެބުރުއަރީގައި އެކުލަވާލާފައެވެ. އަދި ޕްލޭން ފައިނަލް ކޮށްފައިވަނީ މިދިޔަ މަހުގެ 11 އިން 13 އަށް ކިނޮޅަހުގައި ކުރިއަށް ގެންދިޔަ މަސައްކަތު ބައްދަލުވުމެއްގައެވެ.
އަދާލަތުން ވަނީ އެޕާޓިގެ މެންބަރުންގެ ޢަދަދު އިތުރުކުރުމުގެ މަސައްކަތްވެސް ފަށާފައެވެ. އެގޮތުން ޕާޓީގެ ލީޑާރޝިޕްގައި ހިމެނިވަޑައިގަންނަވާ މެންބަރުންނާއެކު އަތޮޅުތަކަށް ދަތުރުތަކެއް ކުރުމަށްވެސް ނިންމާފައިވެއެވެ. އަދާލަތަށް ސަރުކާރު ހިންގާ މައި ޕާޓީއާއި އިދިކޮޅުންވެސް އެންމެ ބޮޑު ފާޑުކިޔުމެއް އަމާޒުކުރަނީ އެޕާޓީއަށް މަޖިލިސް އިންތިޚާބުގައި އެއްވެސް ދާއިރާއެއް ކާމިޔާބު ނުކުރެވޭތީއެވެ.
