އިނގިރޭސި ޕްރިމިއާ ލީގުގައި ރޭ ޗެލްސީ އިން ވެސްޓް ހޭމް ޔުނައިޓެޑް ބަލިކޮށް ލީގުގެ ކުރިއަށް ޖެހިލައިފިއެވެ.
ޗެލްސީ އިން އަމިއްލަ ދަނޑުގައި ކުޅުނު މެޗުން ވެސްޓް ހޭމް ބަލިކުރީ ފަހަތުން އަރައި 2-1 އިންނެވެ. ޗެލްސީ ދަނޑުގައި ރޭ ވެސްޓް ހޭމް އިން ވަނީ ލީޑުނަގައިފައެވެ. ޗެލްސީގެ ކީޕަރު އެޑޮއާޑް މެންޑީ ހެދި ގޯހެއްގެ ފައިދާނަގައި ވެސްޓް ހޭމަށް ލީޑުނަގައިިދިނީ މިކޭލް އެންޓޯނިއޯއެވެ. ކޯނަރެއްގައި ޗެލްސީ އޭރިއާތެރެއިން ޑެކްލަން ރައިސް ދިން ބޯޅަ އެންޓޯނިއޯ ވަނީ ގޯލު ރޮނގުމަތިން ގޯލަށް ފޮނުވާލައިފައެވެ.
ޗެލްސީ ކޮޅަށް ނަތީޖާ އަނބުރާލުމުގައި އެންމެ ބޮޑު ކްރެޑިޓެއް ހައްގުވަނީ ބެން ޗިލްވެލްއެވެ. މެޗުގެ 72 ވަނަ މިނިޓްގައި މާކް ކުކުރޭލާގެ ބަދަލުގައި ކުޅެން އަރައި، ޗިލްވެލް ވަނީ 76 ވަނަ މިނިޓްގައި ޗެލްސީ އަށް އެއްވަރުކޮށްދީފައެވެ. އަދި މެޗުގެ 88 ވަނަ މިނިޓްގައި އޭރިއާތެރެއިން ކައި ހަވާޓްޒް ގޯލެއް ޖަހައި ޗެލްސީ އަށް ލީޑުނަގައިދިން ގޯލު ޖަހަން ބޯޅަ ދިނީ ޗިލްވެލްއެވެ.
މި ނަތީޖާއާއެކު ޗެލްސީ ވަނީ ކުޅުނު ހަ މެޗުން ހޯދި 10 ޕޮއިންޓާއެކު ޕޮއިންޓް ތާވަލުގެ ފަސްވަނައަށް ޖެހިލާފައެވެ. މެޗުން ބަލިވި ވެސްޓް ހަމް އޮތީ ކުޅުނު ހަ މެޗުން ލިބުނު ހަތަރު ޕޮއިންޓާއެކު ލަނޑުގެ ތަފާތުން 17 ވަނައިގައެވެ.
