އިދިކޮޅު ޕީޕީއެމްއިން ފާއިތުވި ދެ އަހަރެއްހާ ދުވަސް ވަންދެން ކުރިޔަށް ގެންދަމުން އައި އިންޑިއާ އައުޓު ހަރަކާތް ފުޅާވެ، އެއީ ރައީސް ސާލިހުގެ ސަރުކާރަށް އޮތް ބޮލުގެ ރިހުމަކަށް ވެގެން ދިޔަހިސާބުން، މި ހަރަކާތާއި ދެކޮޅަށް ސަރުކާރުން ފިޔަވަޅު އަޅުއްވާން ފެއްޓެވީ މީގެ 5 މަހެއްހާ ދުވަސްކުރިން، މިއަހަރުގެ އެޕްރިލް މަހުއެވެ.

މިގޮތުން، އިދިކޮޅު ފަރާތްތަކުން ހިންގާ "އިންޑިއާ އައުޓް" ހަރަކާތަކީ ގައުމީ ސަލާމަތަށް ހުރި ނުރައްކަލެއް ކަމަށް ގައުމީ ސަލާމަތާ ބެހޭ މަޖިލީހުން ކަނޑައަޅާ އެކަން ތަންފީޒްކުރުމަށް ދައުލަތުގެ އިދާރާތަކަށް ރައީސުލްޖުމްހޫރިއްޔާ އަންގަވާފައިވަނީ، ފާއިތުވި އެޕްރިލްމަހުގެ 21 ވަނަ ދުވަހުއެވެ.

ރައީސުލްޖުމްހޫރިއްޔާގެ ގަރާރަކުން އެހަރަކާތް މަނާކޮށް ނެރުނު ޤަރާރުގައި ވަނީ އިންޑިއާއާ މެދު ނަފްރަތު އުފެއްދުމަށް ހިންގާ އެ ހަރަކާތަކީ ގައުމީ ސަލާމަތަށް ނުރައްކާވާ ހިސާބަށް ގޮސްފައިވާ ހަރަކާތެއްކަން ސާފުކޮށް އެނގޭ ކަމަށެވެ. އަދި އެ ހަރަކާތުގެ ސަބަބުން ރާއްޖޭގެ އެކި ސަރަހައްދުތަކުގައި އޮތް އަމާންކަމާއި ދާހިލީ ހަމަޖެހުން ނަގާލައި، ސަރަހައްދީ ސަލާމަތާއި ރައްކާތެރިކަންވެސް ގެއްލުވައިލާ ކަމަށެވެ. ގައުމީ ސަލާމަތަށް ނުރައްކާވާ ފަދަ ކޮންމެ ހަރަކާތަކީ ދިވެހި ސަރުކާރުން އެ ކަމެއް ހުއްޓުވަން ޖެހޭނެ ކަމެއްކަމަށް ރައީސްގެ ޤަރާރުގައި ވިދާޅުވެފައި ވެއެވެ.

މި ގަރާރު ނެރުނު ދުވަހު، ގައުމީ ޓީވީގައި ވާހަކަ ދައްކަވަމުން، ރައީސް އޮފީހުގެ ޗީފް އޮފް ސްޓާފް އަލީ ޒާހިރު ވިދާޅުވެފައިވަނީ، އިދިކޮޅު ފަރާތްތަކުން ރާއްޖޭގައި ހިންގަމުންދާ އިންޑިއާ އައުޓް ހަރަކާތް ދެން ކުރިއަށް ނުގެންދެވޭނެ ކަމުގައެވެ.

ވަކި ޝިއާރެއްގައި ވަކި ބެނާއެއްގެ ދަށުން ވަކި މަޤުސަދެއްގައި، ވަކި އެޖެންޑާއެއްގައި، ވަކި ކަމެއް ހާސިލް ކުރުމަށް އެކަން ރޭވިގެން ފެށި ހިސާބުން އެކަމަށް ހުއްޓުމެއް މިގެނައީ. އެއީ އަޅުގަނޑުމެން ބައިވެރިވެފައިވާ ބައިނަލް އަގުވާމީ މުއާހަދާތަކުގައިވާ ހަމަތަކާއި އުސޫލުތަކުގެ ތެރެއިން. މިކަން ބައިނަލް އަގުވާމީ މުޖުތަމައުން ބަލައި ގަންނާނެ. މީގެ ކުރިން މިކަމަށް ދޫދެވިފައިވާ މިންވަރަށް މިހިސާބުން ނިމުމަކަށް މިއައީ.

އިންޑިއާ އައުޓު ހަރަކާތް އެއަށްފަހު ކުރިޔަށް ނުދާނޭކަމަށް ވިދާޅުވަމުން، އަލި ޒާހިރު ވިދާޅުވެފައި ވެއެވެ.

އެހެންނަމަވަސް، އެއީ ޢައިރު ގާނޫނީ ގަރާރެއްކަމަށް އިދިކޮޅު ޕީޕީއެމްއަށް ތާއީދުކުރާ ފަރާތްތަކުން ސިފަ ކުރަމުން އައި ނަމަވެސް، އޭގެ 5 މަސްދުވަސް ފަހުން، މި ހަފަތާގެ ހުކުރު ދުވަހުގެ ރޭ ސަންގު ޓީވީގައި ވާހަކަ ދައްކަވަމުން އިދިކޮޅު ޕީޕީއެމްގެ ރައީސް ޔާމިން އަބުދުލް ގައްޔޫމު ވިދާޅުވެފައިވަނީ، އިންޑިއާ އައުޓު ހަރަކާތް ހުއްޓުވުމަށް ރައީސް ސާލިހު ނެރުއްވި ގަރާރަކީ ޢައިރު ގާނޫނީ ގަރާރަަކަށްވި ނަމަވެސް، ގާނޫނާއި ޚިލާފް ވެވަޑައިގަތުމަށް ބޭނުންފުޅު ނުވާތީ ދެން އެ ހަރަކާތައް ނުނިކުންނަވާނޭ ކަމުގައެވެ.

އެހާތަނުން ޔަގީންވެގެން ދިޔަ އެއްކަމަކީ، ފާއިތުވެދިޔަ ތަނުގައި ބޭރު ދުނިޔޭގެ ސަމާލުކަންވެސް ލިބިގެން ގޮސްފައިވާ އިންޑިއާ އައުޓު ހަރަކާތް ފަހަކަށް އައިސް ނުބާއްވާފައިވަނީ، އެހަރަކާތް ކުރިޔަށް ގެންދިއުން އެކީ ހުއްޓާލާފައި އޮތުމުގެ ސަބަބުން ކަމެވެ.

ޔާމިން ވިދާޅުވަނީ އިންޑިއާ އައުޓު ހަރަކާތް ހިންގައިގެން ގާނޫނާ ޚިލާފްވާން ބޭނުންފުޅު ނުވާކަމަށް!

ޕީޕީއެމްއިން މީގެ ދެއަހަރުކުރިން އިންޑިއާ އައުޓު ހަރަކާތް ފަށާފައިވަނީ، ރާއްޖެ އޮތީ އިންޑިއާގެ އަޅުވެތިކަމުގައި ކަމަށް ބުނެއެވެ. އޭގެ މައިގަޑު އެއް އަސާސަކަށް ވެގެން ދިޔައީ، ރައީސް އިބުރާހިމް މުހައްމަދު ސާލިހުގެ ސަރުކާރުން އިންޑިއާ ސަރުކާރާއެކީ ކޮށްފައި އޮތް، ސިއްރު އެއްބަސްވުންތަކެއް އާންމު ނުކުރުމުވެ.

އަދި އޭގެ އިތުރުން، އުތުރު ތިޅަފަޅުގައި އިންޑިއާ ސިފައިން ގާއިމްވެ ތިބުމުމުގެ ނަތީޖާއެއްގެ ގޮތުން ރާއްޖޭގެ މިނިވަންކަން ގެއްލިގެން ގޮސްފައިވާކަމަށް ބުނެ، އިދިކޮޅު ޕާޓީން ކުރިޔަށް ގެންދިޔަ މުޒާހިރާތަކުގައި ގޮވަމުން ދިޔައީ، އިންޑިއާ ސިފައިން ރާއްޖެއިން ފައިބައިގެން ދިއުމަށެވެ. އަދި އިންޑިއާ ސިފައިންގެ "އެންމެ ފަހު ބޫޓު" ރާއްޖެ ދޫކޮށް ދިއުމަށްދާންދެން މި ހަރަކާތް ކުރިށް ގެންދާނޭ ކަމަށެވެ.

މި އިހުތިޖާޖުތަކުގެ އެންމެ ކުރިއަށް ނިކުމެވަޑައިގެން، ރާއްޖޭގެ އެކި ކޮންކޮޅުތަކަށް ޔާމިން ދަތުރުވެސް ކުރައްވާފައިވެއެވެ. މި ދަތުރުތަކުގައި އިންޑިއާ އައުޓު ހަރަކާތަށް ރާއްޖޭގެ ބައެއް ރަށްތަކުން ބޮޑު ތަރުހީބެއް ލިބި، އިންޑިއާ އައުޓު ހަރަކާތް ރާއްޖޭގެ އެކިކަންކޮޅުތަކަށް ފުޅާވެ، މި ހަރަކާތުގެ ކަވަރޭޖް ބޭރުގެ ބައެއް މީޑިއާތަކުން ގެނެސް ދީފައިވާކަންވެސް މިފުރުސަތުގައި ފާހަގަ ކޮށްލާން ޖެހެއެވެ.

އެހެންނަމަވެސް، މި ހަރަކާތް ހުއްޓުވުމަށް، ފާއިތުވި އެޕްރިލްމަހު ރައީސް ސާލިހު ނެރުއްވި ގަރާރާއި ހަމައިން ފެނިގެންދިޔައީ، ގައުމު އަޅުވެތިކަމުން ސަލާމަތް ކުރުމަށް އިދިކޮޅު ޕީޕީއެމްއިން ކުރިޔަށް ގެންދިޔަ "ގައުމީ ޖިހާދަށް" ފަނޑުކަން އަންނާން ފެށި މަންޒަރެވެ.

އެއަށްފަހު، އިދިކޮޅު ޕީޕީއެމްއިން ބާއްވާ މުޒާހިރާތަކުގައި އިންޑިއާ އައުޓު ބެނާރަތައް ބޭނުން ކުރުމާއި، އިންޑިއާއައުޓު ޓީޝާޓުގައި މަގުމައްޗަށް ނިކުތުމަށް ޕާޓީގެ ލީޑަރޝިޕުން ފަސްޖެހެންފެށިތަން ފެނިގެން ދިޔައެވެ.

މިގޮތުން ފާއިތުވެދިޔަ ތަނުގައި އިދިކޮޅު ޕީޕީއެމްއިން ކުރިޔަށް ގެންދިޔަ މުޒާހިރާރަތަކުގައި "އިންޑިއާ އައުޓު" މި ޝިއާރު ބޭނުން ކުރުމުގެ ބަދަލުގައި ބޭނުންކޮށްފައިވަނީ "މިނިވަންކަމުގެ ދިފާޢުގައި" މި ޝިއާރެވެ. އެހާތަނުންވެސް އިދިކޮޅު ޕީޕީއެމްއިން ރަސްމީ ސިފައެއްގައި އިންޑިއާ އައުޓު ހަރަކާތް ނިމުމަކަށް ގެނެސްފައިވާކަން މީޑިއާތަކަށްވެސް އަދި އާންމު ރައްޔިތުންނަށްވެސް ސާފުވެގެން ގޮސްފައެއް ނުވެއެވެ.

އެހެންނަމަވެސް، ރައީސް ސާލިހުގެ ގަރާރާއެކު، އިދިކޮޅު ޕީޕީއެމްގެ ލީޑަރޝިޕުން "އިންޑިއާ އައުޓު" ހަރަކާތް ހުޓުމަކަށް ގެނެސްފައިވާކަން ޔަގީންވެގެން ދިޔައީ މިހަފްތާގައި ރައީސް ޔާމިން މިހަރަކާތަށް ދެން ނުނިކުންނަވާނޭކަން އިއުލާން ކުރެއްވި ހިސާބުންނެވެ.

ސަންގު ޓީވީގައި ވާހަކަ ދައްކަވަމުން ޔާމިން ވިދާޅުވެފައިވަނީ، ޕީޕީއެމްއިން ފާއިތުވި ދެ އަހަރު ކުރިޔަށް ގެންގޮސްފައިވާ އިންޑިއާ އައުޓު ހަރަކާތް ހުއްޓުމަކަށް އައީ، އެ ހަރަކާތް ހުއްޓުވުމަށް ރައީސް އިބުރާހިމް މުހައްމަދު ސާލިހު ނެރުއްވި ރިޔާސީ ގަރާރާއި ގުޅިގެން ކަމަށާއި، އަދި އެ ގަރާރު އެގޮތުގައި އޮއްވާ ދެން އިންޑިއާ އައުޓު ހަރަކާތަށް އަމިއްލަފުޅަށް ނިކުންނަވަން ބޭނުންފުޅު ނުވާކަމުގައެވެ.

ސަންގު ޓީވީން ދެއްވި ޚާއްސަ ބަސްދީ ގަތުމުގައި ޔާމިން ވިދާޅުވީ، އިންޑިއާ އައުޓު ހަރަކާތް ހުއްޓުވަން ނެރެފައިވަނީ ގާނޫނާއި ޚިލާފް ގަރާރެއް ކަމަށާއި، އެހެންނަމަވެސް އެ ގަރާރަކީ ގާނޫނާއި ޚިލާފް ގަރާރަކަށް ވިނަމަވެސް، ޕާޓީން ރިޔާސީ ޓިކެޓް ލިބެފަ ހުރި މީހަކު، ގާނޫނާ ޚިލާފަށް މަސައްކަތް ކުރަން ނިކުތުމަކީ ހަމަޖެހޭ ކަމަށް ނުވާ ކަމުގައެވެ.

ރައީސުލްޖުމްހޫރިއްޔާކަމަށް ކުރިމަތިލާފަހުރި މީހަކު، އަދި އަޅުގަޑުމެންގެ ޕާޓީން ރިޔާސީ ޓިކެޓް ލިބިފަ ހުރި މީހަކު ކަނޑައެޅިގެން އެކަހަލަ ގަރާރެއް، އަދި އެއީ ގާނޫނާ ޚިލާފް ރަރާރެއް ނަމަވެސް، އަޅުގަޑުމެން ގަބޫލުކުރާ ގޮތުގަ ގާނޫނާ ޚިލާފް ވިނަމަވެސް، އެއާއި ދެކޮޅަށް މަސައްކަތް ކުރަން، ގާނޫނާއި ޚިލާފަށް މަސައްކަތް ކުރަން ނުކުތުމަކީ ހަމަޖެހޭ ކަމަކަށް ނުވާތީ އަޅުގަޑު އެކަމުގަ ނޫޅެނީ.

އިންޑިއާ އައުޓު ހަރާކާތުގައި މިހާރު އަމިއްލަފުޅަށް ނޫޅުއްވާ ސަބަބުން ހާމަ ކޮށްދެއްވަމުން ރައީސް ޔާމިން ވިދާޅުވެފައި ވެއެވެ.

ޔާމިން އިތުރަށް ވިދާޅުވެފައިވަނީ، ރައީސް ސާލިހުގެ ގަރާރަކީ އައިރު ގާނޫނީ ގަރާރަކަށްވި ނަމަވެސް، އެގަރާރު އެގޮތަށް އޮތްހާ ހިދަކު ފުލުހުން އެގަރާރު ތަންފީޒު ކުރާނޭކަމަށާއި، އެހެންކަމުން އިތުރު ހަމަނުޖެހުމަކަށް، ގޮސް ޕާޓީގެ އާއްމު މެމްބަރުންނަށް ގެއްލުން ލިބެމުންދާން ބޭނުންފުޅު ނުވާކަމުގައެވެ.

އިންޑިއާ ސިފައިން ނުވެސް ބޭލުނު، ގައުމު "އަޅުވެތި ކަމުގައި"، އިންޑިއާ އިދިކޮޅުގެ ހަތުރަކަށް!

ޚުދު ރައީސް ޔާމިން އިސްވެ ހުންނަވައިގެން ކުރިޔަށް ގެންދިޔަ "އިންޑިއާ އައުޓު ހަރަކާތް މެދު ނުކުނޑި ރައްޖޭގެ އެކި ކަންކޮޅުތަކުގައި 2 އަހަރެއްހާ ދުވަހު އިދިކޮޅު ޕީޕީއެމް "ބޮޑު ޚަރަދެއް" ކޮށްގެން ކުރިޔަށް ގެންދިޔައިރު، ރާއްޖޭގެ ހިނގަމުންއައި ސިޔާސީ އެހެން ހުރިހާ ކަމެއްގެ މަތިން އެޕާޓީގެ ފޯކަސް ގެއްލިގެން ދިޔަތަން ވަނީ ފެނިގެން ގޮސްފައެވެ.

އިދިކޮޅު އެމްޑީޕީގެ އެތެރޭގައި ހިގަމުންދިޔަ ސިޔާސީ ކޯޅުންތަކާއި، ރާއްޖޭގެ އިގްތިސާދީ ހާލަތު ދަށްވެ، ރައްޔިތުންގެ އަތްމަތި ދަތިވެ، އަސާސީ ޚިދުމަތްތަކުގެ އަގު އިންތިހާއަށް އުފުލިގެން ދިޔައިރުވެސް، މިއިން އެއްވެސް ކަމަކަށް އިދިކޮޅު ޕީޕީއެއަށް ސަމާލުކަމެއް ނުދެވިދިޔަ ހަގީގީ ސަބަބަކީވެސް އިންޑިއާ އައުޓު ހަރަކާތް ކަމުގައި ދެންނެވިދާނެއެވެ.

އެހެންނަމަވެސް، މި ހަރާކާތް، ބުރަ މަސައްކަތަތާއެކު ދެ އަހަރެއްހާ ދުވަހު ކުރިޔަށް ގެންދެވުމަށްފަހު، ހުއްޓަވާލެއްވިކަން ރައީސް ޔާމިން އިއުލާން ކުރެއްވިއިރު، މި ހަރަކާތުން އިދިކޮޅު ޕީޕީއެމްއަށް ހާސިލްކުރެވުނު ސިޔާސީ މަންފާއަކީ ކޮބައިތޯ މިއީ ހަގީގަތުގައިވެސް މިއަދު ގިނަބަޔަކު އުފައްދާ ސުވާލަކަށް މިވަނީ ވެގެން ގޮސްފައެވެ.

ސަބަބީ ހަރަކާތަށް ދެން ނުނިކަންކަވާނޭކަމަށް ރައީސް ޔާމިން ވިދާޅުވިއިރު، މި ހަރަކާތް ސަރުކާރުން މަނާކޮށްގެން އުޅެނީ އިދިކޮޅު ފަރާތްތަކުން މާނަކުރާ ގޮތުންނަމަ އައިރު ގާނޫނީ ގަރާރަކުންކަމަށް ވުމުގެ އިތުރުން، އިދިކޮޅުން ފެށުނީއްސުގެ ސިފަކުރަމުން އައި "އިންޑިއާގެ އަޅުވެތިކަން" ހަމަ އެބީދައިން އަދިވެސް ދެމި އޮތުމެވެ. ރައީސް ސާލިހުގެ ސަރުކާރުން އިންޑިއާއާ ދެމެދު ވެފައިވާ ސިއްރު އެއްބަސްވުން ހާމަ ކޮށްފައެއްވެސް ނުމެ ވޭމެއެވެ.

އޭގެ ބަދަލުގައި، ރައީސް ސާލިހުގެ ސަރުކާރުގައި އިންޑިއާއާއެކީ ބާއްވަމުން އައި ގާތްގުޅުން އިތުރަށް އޭގެ އިންތިއާއަށް ވަރުގަދަވެގެން ދިޔަ އެއް ސަބަބަކީވެސް އިދިކޮޅު ޕާޓީން ކުރިޔަށް ގެންދިޔަ އިންޑިއާ އައުޓު ހަރަކާތްކަމުގައިވެސް މިއަދު ދެންނެވެން އެބައޮތެވެ.

އޭގެ އިތުންވެސް، އިންޑިއާ އައުޓު ހަރަކާތައް ޕީޕީއެމްގެ އިސް ބައެއް ބޭފުޅުން ނިކުންނެވިއިރު، ލީޑަރޝިޕްގައި ހިމެނިވަޑައިގަންނަވާ ބައެއް ބޭފުޅުން އިންޑިއާ އައުޓު ޓީޝާޓުގައި މަގުމައްޗަށް ނިކުންނެވުމަށް ފަސްޖެހި، ޕާޓީގެ ލީޑަރޝިޕުން ބައެެއް ބޭފުޅުން އިންޑިއާގެ ހަތުރުންގެ ގޮތުގައި ލޭބަލް ވެގެންދިޔައިރު، އަނެއްބައި ބޭފުޅުން މި ލޭބަލްއިން "ބޯ ދަމައިގެންފައި" ވާކަންވެސް މިފުރުސަތުގައި ފާހަގަ ކޮށްލާން ޖެހެއެވެ.

އެހެންކަމުން، ރައީސް ސާލިހު އިންޑިއާ އައުޓު ހަރަކާތް ހުއްޓުވުމަށް ނެރުއްވި ގަރާރުން، ސަރުކާރަށް ބޮޑު ބޮލުގެ ރުހުމަކަށްވި، އިންޑިއާ އައުޓު ސިޔާސީ ހަރަކާތް ހުއްޓުމަކަށް އައި އައުން އެއީ ސަރުކާރަށް ލިބުނު ބޮޑު ކާމިޔާބީއެއްގެ ގޮތުގައި މިއަދު ސިފަކުރެވެން އޮތްއިރު، އިދިކޮޅު ސިޔާސީ ފަރާތްތަކަށް މިހަރަކާތުން ހާސިލްވީ ފައިދާއަކީ ކޮބައިތޯ، ނުވަތަ ވާސިލްވެވުނު ހަގީގީ އަމާޒަކީ ކޮބައިތޯ މިއީ ކިޔުންތެރިންނަށްވެސް ވަޒަން ކޮށްލެވެން އޮތް، އިތުރަށް އެހަގީގަތް ސާފުކޮށްދިނުމުގެ ބޭނުމެއް ނެތްފަދައިން ސާފުކޮށް ފެންނާން އޮތް ހަގީގަތެއް ކަމުގައި ދަންނަވާން ޖެހެއެވެ.