ދުނިޔޭގެ، 5 ވަނައަށް އެންމެ ވަރުގަދަ އިގްތިސާދުގެ މަގާމުގައި އޮތް އިނރޭސިވިލާތް ފަހަތައް ޖައްސާލުމަށްފަހު، ދުނިޔޭގެ 5 ވަނައަށް އެންމެ ވަރުގަދަ އިގްތިސާދުގެ މަގާމަށް އިންޑިއާ އަތުވެއްޖެއެވެ.
ދުނިޔޭގެ 6 ވަނަ އިގްތިސާދުގެ މަގަމާށް އިނގިރޭސިވިލާތް ވެއްޓިގެން ދިޔައިރު، އެގައުމުގައި މިހާރުވެސް ދިރިއުޅުމުގެ އަގު އާދަޔާއި ޚިލާފަށް މަތިވަމުން ދިއުމުގެ ސަބަބުން، އިނގިރޭސި ސަރުކާރަށްވަނީ ބޮޑެތި ގޮންޖެހުންތަކާއި ކުރިމަތިލާން ޖެހިފައެވެ.
އިނގިރޭސިވިލާތުގެ އިސްތިއުމާރުން މިނިވަންކަން ލިބުނު އިންޑިއާގެ އިގްތިސާދުވަނީ، 2021ވަނަ އަހަރުގެ ފަހު 3 މަސްދުވަހު، އިނގިރޭސި އިގްތިސާދުގެ މައްޗަށް ކުރި ހޯދާ، ދުނިޔޭގެ 5 ވަނައަށް އެންމެ ބޮޑު އިގްތިސާދުގެ މަގާމަށް ވާސިލް ވެފައެވެ.
އިންޓަރނޭޝަނަލް މަނިޓަރީ ފަންޑުގެ، ޔޫއެސް ޑޮލަރު ދައުރުވެފައިވާ މިންވަރުގެ މައްޗަށް ބިނާކޮށް ހަދާފައިވާ މި ހިސާބުތަކުން ދައްކާ ގޮތުގައި، މި އަހަރުގެ ފުރަތަމަ ކުއާޓަރުގައި އިންޑިއާއިންވަނީ މި ތަފާތު އިތުރަށް ފުޅާ ކޮށްފައެވެ.
ބައިނަލްއަގުވާމީ ރޭންކިންގައި އިނގިރޭސިވިލާތް ފަހަތައް ދިޔަދިއުން ވެގެންދާނީ މި ހަފްތާފައި އަލަށް އައްޔަން ކުރެވޭ އެގައުމުގެ އާ ބޮޑުވަޒީރަށްވެސް ކުރިމަތިވާނެ ވަރަށްބޮޑު މައްސަލައަކަށެވެ.
މިހާރު އިނގިރޭސިވިލާތުގައި ކުރިޔަށްދާ، އާ ބޮޑުވަޒީރު އައްޔަން ކުރުމުގެ އިންތިޚާބުގައި، ކުރީގެ ޗާންޒެލަރ ރިޝީ ސުނަކް ބަލިކޮށް ބޮޑުވަޒީރުކަމުގެ މަގާމް ކާމިޔާބު ކުރައްވާނެކަމަށް ބެލެވެނީ މިހާރުގެ ފޮރިން ސެކެޓްރީ ލިޒް ޓްރަސްއެވެ.
މިއަހަރު އިންޑިއާގެ އިގްތިސާދު %7ގެ ކުރިއެރުމެއް ހޯދާނެކަމަށް ވަނީ ބެލެވިފައެވެ. އައިއެމްއެފްގެ ހިސާބުތަކުން ދައްކާ ގޮތުގައި ޑޮލަރ ޓާމްއިން މުޅި އަހަރުގެ ހިސާބުތަކަށް ބަލާއިރު އިންޑިއާ އިނގިރޭސިވިލާތަށްވުރެ ކުރިއަށް ޖެހިލާފައިވާއިރު، އޭޝިއާގެ އެންމެ ވަރުގަދަ އެއް އިގްތިސާދުގެ ގޮތުގައި އޮތް އިންޑިއާއަށްވުރެ ކުރީގައި މިހާރު އޮތް އިގްތިސާދުތަކަކީ، އެމެރިކާ، ޗައިނާ، ޖަޕާން އަދި ޖާމަނީއެވެ.
މީގެ 10 އަހަރު ކުރިއަށް ބަލާއިރު، އިންޑިއާއަކީ އޭރު ދުނިޔޭގަ 11 ވަނައަށް އެންމެ ބޮޑު އިގްތިސާދެވެ. އޭރުވެސް އިނގިރޭސިވިލާތް އޮތީ ދުނިޔޭގެ 5 ވަނައިގައެވެ.
