މާލޭގައި މިނީ ބަހުގެ ޚިދުމަތް އަންނަ ހޯމަ ދުވަހު ފަށާނެކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ އެމްޓީސީސީން ބުނެފިއެވެ.
ހޯމަ ދުވަހު މި ދަތުރުތައް ފެށުމަށް ތައްޔާރުވެފައިވާއިރު، ފުރަތަމަ ދެ ހަފްތާގައި މި ދަތުރުތަކަށް އަގެއް ނުނަގާނެއެވެ. އޭގެ ފަހުން ދަތުރަކަސް ނަގާނީ ހަތް ރުފިޔާ ކަމަށް ސަރުކާރުން ވަނީ ކަނޑައަޅާފައެވެ. ނަމަވެސް ބަހުގެ ހިދުމަތް ހޯދާ ތިން އަހަރުގެ ދަށުގެ ކުދިންނާއި، އުމުރުން ދުވަސްވީ މީހުންނާއި، ސްކޫލް ކުދިން ޔުނީފޯމްގައި ކުރާއިރު، ދަތުރުތައް ހިލޭ ކުރެވޭނެއެވެ.
މާލޭގައި މިނި ބަހުގެ ހިދުމަތް ފެށުމުގެ ގޮތުން ބޮޑެތި ތައްޔާރީތަކެއް، އެމްޓީސީސީންނާއި، ޕްލޭނިންގ މިނިސްޓްރީގެ އިތުރުން، މާލެ ސިޓީ ކައުންސިލުން ވަނީ ވެފައެވެ. އެގޮތުން މާލޭގައި ފަސޭހަކަމާއެކު ބަސް ދުއްވޭނެ ގޮތަށް ވަނީ ފުރިހަމަކޮށްފައެވެ.
މިނީ ބަސްތަކަކީ 20 މީހުންގެ ޖާގައިގެ ބަސްތަކެކެވެ. 18 ބަހުގެ ތެރެއިން 8 ބަހަކީ، ފުރޮޅުލީ ގޮނޑީގައި އުޅޭ މީހުންނަށްވެސް ފަސޭހައިން ބޭނުންކުރެވޭނެ ބަސްތަކެކެވެ. ބަހުގެ ޖާގައަކީ 20ނަމަވެސް، ކޮންމެ ބަހެއްގައި ކޮޅަށް ތިބެވޭގޮތަށް އިތުރަށް 10 ހޭންޑަލް ލާފަ ހުންނާނެއެވެ.
ބަސް ދަތުރުތަކުގައި ސްކޫލް ކުދިންނާ 65 އަހަރުން މަތީގެ މީހުން، 3 އަހަރުން ދަށުގެ ކުދިން އަދި ޚާއްސަ އެހީއަށް ބޭނުންވާ މީހުންނަށް މުޅިން ހިލޭ ދަތުރުކުރެވޭނެއެވެ. ބަސް ދަތުރު މައިިގަނޑު 3 ރޫޓަކުން ބާއްވާނެއެވެ. އެއީ ސޯސަން ރޫޓް، އަމީނީ ރޫޓް އަދި އޯކިޑް ރޫޓްއެވެ. ސޯސަން ރޫޓްގައި 8 ސަރަޙައްދަކަށް ބަސް މަޑުކުރާނެއެވެ. އަމީނީ ރޫޓް އަދި އޯކިޑް ރޫޓްގައި 18 ސަރަޙައްދަކަށް ބަސް މަޑުކުރާނެއެވެ.
ބަސް ދަތުރު އޮންނާނީ ފަތިހު 5:45އިން ފެށިގެން، ދަންވަރު 12:15އަށް ކަމަށާއި، އަދި ކޮންމެ 10 މިނެޓަކުން ސްޓޮޕަށް ބަސް މަޑުކުރާނެ ކަމަށް އެމްޓީސީސީން ވަނީ ބުނެފައެވެ.
