ރަޝިއާގެ އެންމެ ބޮޑު އެއް ތެޔޮ ކުންފުނި ކަމުގައިވާ ލުކްއޮއިލް ކުންފުނީގެ ޗެއަރމަން ރަވިލް މަގަނޯވް، އޭނާ ފަރުވާ ހޯދަމުންދިޔަ ހޮސްޕިޓަލުގެ ކުޑަ ދޮރަކުން ވެއްޓި މަރުވެއްޖެ ކަމަށް ރިޕޯޓުތައް ބުނެފިއެވެ.

ލުކްއޮއިލް ކުންފުނިން މިއަދު އެ ކުންފުނީގެ ޗެއަރމަން މަރުވެފައިވާކަން ޔަގީން ކޮށްދީފައިވި ނަމަވެސް، ބުނެފައިވަނީ އުމުރުން 67 އަހަރުގެ މަގަނޯވް މަރުވެފައިވަނީ، "ވަރަށް ބޮޑަށް ބަލިވުމުގެ ސަބަބުން" ކަމުގައެވެ.

ރަޝިއާގެ މީޑިއާތަކުން ރިޕޯޓު ކޮށްފައިވަނީ އޭނާއަށް ފަރުވާ ދީފައިވަނީ މޮސްކޯގެ ސެންޓްރަލް ކުލިނިކަލް ހޮސްޕިޓަލުން ކަމަށާއި، އޭނާ މަރުވެފައިވަނީ، ލިބުނު އަނިޔާތަކަށް ފަރުވާ ދެމުން ދަނިކޮށް ކަމަށެވެ.

ރަޝިއާގެ ތަހުގީގީ މުވައްސަސާތަކުން ބުނެފައިވަނީ، ހާދިސާ ހިގި ސަރަހައްދުގައި އޮފިޝަލުން ހަރަކާތްތެރިވަމުން ދާ ކަމަށާއި، އޭނާ މަރުވި ސަބަބު ދެނެގަތުމުގެ މަސައްކަތް ކުރިޔަށް ދާކަމުގައެވެ.

ރަޝިއާގެ ޓާސް ނިއުސް އޭޖެންސީ، ބައެއް ފަރާތްތަކާއި ހަވާލާދީ ރިޕޯޓު ކޮށްފައިވާ ގޮތުގައި މަގަނޯވް ވެއްޓިފައިވަނީ ހަވަނަ ފަންގިފިލާގެ ކުޑަދޮރަކުންނެވެ. އަދި ފަހުން ރިޕޯޓު ކޮށްފައިވާ ގޮތުގައި އޭނާ މަރުވީ އަމިއްލައަށެވެ.

މިއަހަރުގެ ފެބްރުއަރީމަހު ރަޝިއާއިން ޔޫކުރެއިންއަށް އުދުވާނީ ހަމަލާ ދޭން ފެށުމާއެކު، ލުކްއޮއިލް ކުންފުނީގެ ބޯޑުންވަނީ، މި ހަނގުރާމާއިގެ ޝިކާރައަކަށްވެފައިވާ މީހުންނަށް ހަމްދަރުދީ ފާޅުކޮށް، މި މައްސަލައަށް އަވަސް ހައްލެއް ހޯދުމަށް ގޮވާލާފައެވެ. އޭގެ އިތުރުން، ލުކްއޮއިލް ކުންފުނީގެ ރައީސް، އަދި ބިލިއަނަރއެއް ކަމުގައިވާ ވެގިޓް އަލެކްޕެރޯވްނަނީ، ރަޝިއާއިން ޔޫކުރެއިންއަށް ދޭންފެށި އުދުވާނީ ހަމަލާތަކާއި ގުޅިގެން އޭނާއާއި ދެކޮޅަށް އިނގިރޭސިވިލާތުން ދަތިކުރުމުގެ ފިޔަވަޅު އެޅުމާއި ގުޅިގެން ކުންފުނީގެ ރައީސްކަމުން އިސްތިއުފާ ދެއްވާފައެވެ.

ފާއިތުވެދިޔަ މަސްތަކުގައި، ރަޝިއާގެ ބައެއް މަހުޖަނުންވަނީ ސުވާލު އުފެދޭ ގޮތަކަށް މަރުވެފައެވެ.

އޭގެތެރޭގައި ހިމެނެނީ:

• ރަޝިއާގެ ގޭސް ކުންފުނި ނޯވަޓެކްގެ ކުރީގެ ޑެޕިއުޓީ ޗެއަރމަން އަދި މިލިއަނަރެއް ކަމުގައިވާ ސާގޭ ޕްރޮޓޮސެންޔާގެ ހަށިގަޑު ފެނިފައިވަނީ އޭނާގެ އަންހެނުންނާއި އަންހެން ދަރިފުޅުގާއެކީ، ސްޕެއިންގެ ވިލާއެއްގައި މިއަހަރުގެ އެޕްރިލްމަހު މަރުވެފައި އޮއްވައެވެ.
• ރަޝިއާގެ ގަސްޕްރޯންބޭންކުގެ ކުރީގެ ނާއިބުރައީސް ވިލަޑިޝްލާވް އަވަޔޭވް އާއި އޭނާގެ އަންހެނުން އަދި އަންހެން ދަރިފުޅު އެމީހުން ރަޝިއާގެ ވެރިރަށް މޮސްކޯގައި ދިރިއުޅެމުންދިޔަ އެޕާރޓްމަންޓުގައި މަރުވެފައި ވަނިކޮށް ފެނިފައިވަނީ މިއަހަރުގެ އެޕްރިލްމަހުއެވެ.
• މިއަހަރުގެ މޭމަހު، ލުކްއޮއިލް ކުންފުނީގެ ކުރީގެ ވެރިޔާ އެލެގްޒެންޑާ ސަބޮޓިން ވަނީ ހިތް ހުއްޓިގެން މަރުވެފައެވެ. އޭނާ މަރުވެފައި ވާކަމަށް ބެލެވެނީ، ރޫހާނީ ބޭސްވެރިކަން ކޮށްދޭ މީހެއްގެ ކައިރިން  ތަކުރާރުކޮށް ފަރުވާ ހޯދާފައި ވަނިކޮށެވެ.

ލުކްއޮއިލްއަކީ ރަޝިއާގެ އެންމެ ބޮޑު އަމިއްލަ ވިޔަފާރި އެއް ކުންފުންޏެވެ. މި ކުންފުނިން ނެރުނު ބަޔާނެއްގައި ބުނެފައިވަނީ، މަގަނޯވްގެ ހިންގުމުގެ ހުނަރުވެރިކަމުގެ ސަބަބުން އެކުންފުނި ހަކަތައާއި ގުޅުންހުރި، ދުނިޔޭގެ އެންމެ ވަރުގަދަ އެއް ކުންފުންޏަށް ވެެގެން ގޮސްފައި ވާކަމުގައެވެ.

މަގަނޯވް ލުކްއޮއިލް ކުންފުނީގައި މަސައްކަތް ކުރާން ފަށާފައިވަނީ 1993 ވަނަ އަހަރުއެވެ. ކުންފުނީގެ ޗެއަރމަންކަމާއި އޭނާ ހަވާލު ވެފައިވަނީ މީގެ ދެއަހަރު ކުރިންނެވެ.