އަދުލް އިންސާފަކީ ވަކި އާއިލާއަކަށް ވަކި ބަޔަކަށް އޮތް އެއްޗެއް ނޫންކަމަށްވިދާލުވެ، އެއްވެސް މީހަކާމެދު ތަފާތު ނުކުރުމަށް ނާއިބު ރައީސް ފައިސަލް ނަސީމް ގޮވާލައްވައިފިއެވެ.
ފުލުހުންގެ ޚިދުމަތުގެ މުވައްޒަފުންގެ އަގުވަޒަންކުރުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުން ނާއިބު ރައީސް ވިދާޅުވީ، ފުލުހުންގެ މުއައްސަސާއަށް ބަދަލު ގެނައުމަށް ސަރުކާރުންގިނަ މަސައްކަތްތަކެއް ކުރަމުން އަންނަކަމަށާއި، އެގޮތުން ރަށްރަށުގައި ފުލުހުންގެ މަރުކަޒުތައް ބިނާކުރުމާއި ވަސީލަތްތައް ހޯދުމަށާއި، ތަމްރީންގެ ފުރުޞަތުތައް އިތުރުކޮށް، ތަމްރީން ލިބިފައިވާބައެއްގެ ގޮތުގައި ފުލުހުންގެ ސަފުތައް ތައްޔާރުކުރުމަށް ވަރަށް ގިނަ މަސައްކަތް ކުރެވެމުން އަންނަކަމަަށެވެ.
Vice President @FaisalNasym attends the ceremony held to mark Police Service Day. At the ceremony, he presented commemorative plaques to long-serving staff. pic.twitter.com/D29cPQ04DZ
— The President's Office (@presidencymv) September 1, 2022
ނާއިބު ރައީސްގެ ވާހަކަފުޅުގައި ދިވެހިންގެ ވެށީގައި ހުރި ކުށްތަކުގެ %90 ގުޅެނީ މަސްތުވާތަކެތީގެ ވަބާއާކަން ފާހަގަކުރައްވާ، މިއީ ޤައުމީ މައްސަލައެއްގެ ގޮތުގައި ސިފަކުރެއްވިއެވެ. މިއީ ހުރިހާ އާއިލާތަކެއްވެސް ކަންބޮޑުވުން އޮތްކަމެއްކަމަށް ޤަބޫލުކޮށް ހުރިހާ އެންމެން އިތުރަށް މަސައްކަތްކުރެއްވުމަށް ނާއިބު ރައީސް ގޮވާލެއްވިއެވެ. އެއީ ވަކި މުއައްސަސާއަކުން ކުރާ މަސައްކަތަކުން ހައްލުކުރެވޭނެ މައްސަލައެއް ނޫންކަމަށާއި، މި މައްސަލައިގެ ބޮޑުކަމުން ހުރިހާ އެންމެންގެ މައްސަލައެއްގެ ގޮތުގައި ދެކިގެން އެންމެން ގުޅިގެން މި މައްސަލައަށް ހައްލު ގެނައުމަށް މަސައްކަތްކުރުމަށް އެމަނިކުފާނު އިލްތިމާސްކުރެއްވިއެވެ.
އަޅުގަނޑު ޒުވާނުންނަށް ދަންނަވަން އޮތީ މިއަދު މި ގައުމުގައި ތަރައްޤީއާއި މިގައުމުގެ ކުރިއެރުމުގައި އަޅުގަނޑުމެން ޒުވާނުންގެ ބައިވެރިވުން ބޭނުންވޭ. ޒުވާނުން އެމީހުންގެ ބޭނުން އެންމެ ބޭނުންވާ ދުވަހު އަދި އާއިލާއެއް ބިނާކޮށް ދަރިންނާއެކު ވަގުތު ހޭދަކޮށް އަމިއްލަ ފައިމައްޗަށް ތެދުވާންޖެހޭ ދުވަހު ނިކަމެތި ގޮތަކަށް ޖަލުގެ ތޭރިތަކުގައި ނޫނީ މަސްތުވާތަކެތީގެ ވަބާގައި ޖެހިފައި ތިބުމަކީ ވަރަށް ބޮޑު ނިކަމެތިކަމެއް. އެއީ ލިބިގަންނަ ވަރަށް ދެރަކަމެއް.
– ނާއިބު ރައީސް ވިދާޅުވިއެވެ.
ނާއިބު ރައީސްގެ ވާހަކަފުޅުގައި ވަނީ އަދުލް އިންސާފަކީ ވަކި އާއިލާއަކަށް ވަކި ބަޔަކަށް އޮތް އެއްޗެއް ނޫންކަމަށާއި، އެންމެންގެ މެދުގައި އިންސާފުކަންކުރުމަށް ދީނުގައި ގޮވާލައްވާކަން ފާހަގަކުރައްވާ، ކުރާ ކޮންމެ ކަމެއްގައި ޒާތީ ކަމެއް ނުބާއްވާ، ޚާއްޞަކޮށް ހުވައިކޮށްގެން ތިބޭ ފަރާތްތަކުން އެކަން ހަނދާނުގައި ބަހައްޓާ ތަފާތުކުރުން އެއްވެސް މީހަކާމެދު ނުގެންގުޅުމަށް ނަސޭހަތްތެރިވެވަޑައިގެންފައެވެ.
ފުލުހުންކުރާ މަސައްކަތުން ރާއްޖޭގެ ހުރިހާ ރައްޔިތުންނަށް އަމާން ހެޔޮ ބަދަލެެއް ގެނެވޭނެކަމަށް އުއްމީދުކުރައްވާކަމަށް ވިދާޅުވެ، ނާއިބު ރައީސް ވަނީ މުޅި މުޖުތަމައުގެ އެއްބާރުލުން ފުލުހުންނަށް ދިނުމަށްވެސް ގޮވާލައްވާފައެވެ.
