ކޮންމެ ގައުމަކަށްވެސް ޚާރިޖީ ސިޔާސަތަކީ އަދުގެ ބަވަނަ ވެފައިވާ ދުނިޔޭގައި، ހަރުދަނާ ޚާރިޖީ ސިޔާސަތަކާއެކީ މެނުވީ ކުރިޔަށް ނުދެވޭހާ މުހިންމު، ދައުލަތެއްގެ އެންމެ މުހިންމު އެއް އަސާސްކަމުގައި މިއަދު މިވަނީ ވެގެން ގޮސްފައެވެ.
މިގޮތުން، އަމުންދުން ރާއްޖެފަދަ، ދުނިޔޭގެ ކުދި ޖަޒީރާ ގައުމުތަކަކީ އަމިއްލަ ގައުމުގައި އުފެއްދުންތެރިކަން މަދު، މައިގަޑު ގޮތެއްގައި އިމްޕޯޓަށް ބަރޯސާވެފައިވާ ގައުމުތަކަކަށް ވުމުގެ ނަތީޖާއެއްގެ ގޮތުން، ބޭނުންވާ އަސާސީ ބައެއް ވަސީލަތްތައްވެސް މެދު ނުކެނޑި ލިބިދެވޭނޭ މަގުތައް ފަހި ކުރުމުގައި، ދުނިޔޭގެ އެހެން ގައުމުތަކާއެކީ ބާއްވާންޖެހޭ ގުޅުންތަކުގެ މުހިންމުކަން އޮންނަނީ ވަރަށްވެސް ބޮޑުވެފައެވެ.
މިސާލެއްގެ ގޮތުން، ދުނިޔެއަށް އަދިވެސް އެ ކާރިސާއަކުން އަރައިގަނެވިފައިނުވާ ކޯވިޑް ކާރިސާއިން އަރައިގަތުމަށް، އެކާރިސާގެ ތެރޭގައި ރާއްޖެއިން ހޯދާންޖެހުން ބޭރުގެ ދުނިޔޭގެ އެހީތެރިކަން ފަސޭހަކަމާއެކު ރާއްޖެއަށް ލިބިގެން ދިޔައީ، ގިނަ ގައުމުތަކަކާއެކީ ރާއްޖެއިން ބާއްވަމުންދިޔަ ގާތް ގުޅުންތަކާއި، އޮތް ސިޔާސީ ގުޅުންތަކުގެ ބަދަހިކަމުން ކަމުގައި ދެންނެވިދާނެއެވެ.
ކޯވިޑް ކާރިސާގެ ސަބަބުން ރާއްޖޭގެ ފަތުރުވެރިކަމުގެ ސިނާއަތު އިނދަޖެހި، ބޭރުފައިސާ ލިބޭނެ މަގުތައް ބަންދުވެ، ކޯވިޑް ކާރިސާއިން ވުޖޫދުކުރި އިގްތިސާދީ ކާރިސާގެ ނަތީޖާއެއްގެ ގޮތުން، ރާއްޖެ އޭރު ހިމެނިގެންދިޔައީ، އެކާރިސާގެ ސަބަބުން، އިގްތިސާދުތައް ނިސްބަތުން އެންމެ ބޮޑަށް އިދަޖެހިގެން ދިޔަ ގައުމުތަކުގެ ތެރޭގައެވެ.
އެހެންނަމަވެސް، ގައުމަށް ކުރިމަތިވި މި ބޮޑު ގޮންޖެހުމުން އަރައިގަނެ، ނުހަނު ބޮޑަށް ބޭނުންވެފައިވާ ބޭރުގެ އެހީތެރިކަން، ދައުލަތާއި ސަރުކާރަށް ފޯރުކޮށްދިނުމުގެ މައި ބަދަކަމުގައި، މިކާރިސާގެ ތެރޭގައި ވެގެން ދިޔައީ ދިވެހި ޚާރިޖިއްޔާކަން މި ފުރުސަތުގައި ފާހަގަ ކުރާން ޖެހެއެވެ.
ދުނިޔޭގެ ކުޑައެއް ބޮޑެއް ތަފާތު ކުރުމެއް ނެތި، ހުރިހާ ގައުމަކަށްވެސް އިގްތިސާދީ އަދި ސިއްޙީ ބޮޑު ގޮންޖެހުމަކާއި ކުރިމަތިލާން ޖެހިފައި އޮތް ދަނޑިވަޅެއްގައި، ރާއްޖެއަށް ބޭރުގެ ގައުމުތަކުންނާއި އަދި ޖަމިއްޔާ ޖަމާއަތްތަކުން ހޯދާންޖެހިފައި އޮތް، ފައިސާއާއި ތަކެތީގެ އެހީތެރިކަން ހޯދައި ދިނުމުގައި އެންމު މުހިންމު ދައުރެއް އަދާކޮށްފައިވަނީ ފޮރިން ސާވިސްއެވެ. އެއީ ދުނިޔޭގެ އެކި ކަންކޮޅުތަކުގައި ގާއިމް ވެފައިހުރި ދިވެހިރާއްޖޭގެ މިޝަންތަކުންނާއި ފޮރިން މިނިސްޓްރީން ކޮށްފައިވާ މިންނެތް މަސައްކަތްތަކުގެ ނަތީޖާއެވެ.
އެހެންކަމުން، މިފަދަ ގިނަގުނަ ސަބަބުތަކެއް މި ގޮތުގައި ހުރުމާއި ގުޅިގެން، ދުނިޔޭގެ ކޮންމެ ގައުމަކަށްވެސް ސަފުން ބާކީނުވެ، ބައިނަލް އަގުވާމީ މުޖަތަމައުގައި ކުރިޔަށް ދެވެން އޮތީ އެގައުމަކަށް ހަރުދަނާ ޚާރިޖީ ސިޔާސަތެއް ގެންގުޅެވިގެންނެވެ. ކުރިމަތިވެގެން އަންނަ ތަފާޒު ނުފޫތަކާއި ކުރިމަތިލާ، ތިލަފަތްހަމަ، ފޮރިން ޕޮލިސީއެއް ތަންފީޒު ކޮށްގެންނެވެ.
ޚާރިޖީ ސިޔާސަތައް ގެއްލުން ދިނުން، ސިޔާސީ ހަތިޔާރަކަށް!
ދިވެހިރާއްޖޭގަ އޮތް ހަލަބޮލި ސިޔާސީ މަސްރަހުން ފާހަގަވާން އޮތް އެއް ކަމަކީ، ސިޔާސީ ގޮތުން އިނދިކޮޅު ފަރާތްތަކާއި އޭރަކު އޮންނަ ސަރުކާރާކާ ދެމެދު ހިނގާ ދެބަސްވުންތަކާއި، ކޯޅުންތަކުގައި ގައުމު ގުރުބާން ވެގެން ދިއުމެވެ. އަދި މި ކޯޅުންތަކުގައި ގައުމީ މަސްލަހަތު އިސް ނުކުރެވި، ހުރިހާ ކަމެއްވެސް ސިޔާސީ ވެގެންދާ ދިއުމެވެ.
ރައީސް އިބުރާހިމް މުހައްމަދު ސާލިހުގެ ވެރިކަމުގައި ފާއިތުވެދިޔަތަނުގައި، މި ބީދައިން އެންމެ ބޮޑަށް ގުރުބާންވެގެން ދިޔަ އެއް ސާރވިސްއެއްގެ ގޮތުގައި ބެލެވެން އޮތީ ރާއްޖޭގެ ފޮރިންގ ސާވިސްއެވެ. މިވެރިކަމުގައި އިދިކޮޅު ޕާޓީއެއްގެ ގޮތުގައި އޮތް ޕީޕީއެމްގެ ސިޔާސީ ހަރަކާތްތަކަށް ބަލާއިރު، ފާއިތުވެދިޔަ ތަނުގައި ފެންނާއޮތް އެއް ހަގީގަތަކީ، ރާއްޖޭގެ ޚާރިޖީ ސިޔާސަތަށް ފާޑު ކިއުމުގައި އެޕާޓީން ގެންގުޅެފައިވާ ސިޔާސަތުތަކާއި ހިންގާފައިވާ ހަރަކާތްތަކެވެ.
މިގޮތުން، ރާއްޖެއަށް ސިއްޙީ ބޮޑު ކާރިސާއަކާއި ކުރިމަތިލާންޖެހި، އަދި އިގުތިސާދީ ގޮތުންވެސް ގައުމު ފުން އަނދަވަޅަކަށް ވެއްޓިފައި އޮތް ވަގުތުގައިވެސް، އިދިކޮޅު ޕާޓީން ކުރިޔަށް ކުރިޔަށް ގެންގޮސްފައިވަނީ "އިންޑިއާ އައުޓު"ގެ ނަމުގައި ކުރިޔަށް ގެންދިޔަ ސިޔާސީ ހަރަކާތްތަކެވެ.
ތެކެތީ އަގު އުފުލި، ބައެއް އަސާސީ ޚިދުމަތްތަކުގެ އަގުތަކަށްވެސް ބަދަލު އައިސް، އޭގެ ނޭދެވޭ އަސަރު އާންމު ރައްޔިތުންނާއި ހަމައަށް ފޯރަމުން ދިޔައިރުވެސް، ފާއިތުވެދިޔަ 4 އަހަރެއްހާ ދުވަހުގެ ތެރޭގައިވެސް އިދިކޮޅު ފަރާތްތަކުން މިކަންކަމުގެ ކަންބޮޑުވުން ފާޅުކޮށް، ސަރުކާރު ޒިންމާ ދާރު ކުރުވުމަށް އަޑު އުުފުލި މަންޒަރު ފެނިގެން ގޮސްފައެއް ނުވެއެވެ.
މި ހުރިހާ ހާލަތެއްގައިވެސް އިދިކޮޅު ސިޔާސީ ފަރާތްތަކުން ހަމައެކަނި އަޑު އުފުލި މަންޒަރު ފެނިގެންދިޔައީ ރާއްޖޭގައި އޮތްކަމަށް އެ ފަރާތްތަކުން ދެކެމުންއައި އިންޑިއާގެ ނުފޫޒުން ގައުމު މިންޖު ކުރުމަށެވެ. ކުރެވިގެން ދިޔަ މުޒާހިރާތަކުގައި އަޑު އުފުލާފައިވަނީ، ރާއްޖެއޮތީ އިންޑިއާގެ އަޅުވެތިކަމުގައި ކަމަށްބުނެ، އެ މޭރުމުންނެވެ. މި އަޑު އުފުލުންތަކުގެ ނަތީޖާއެއްގެ ގޮތުން ބޭރުގެ ދައުލަތްތަކާއެކީ ރާއްޖެއިން ބާއްވަމުން ގެންދާ ޚާރިޖީ ގުޅުންތަކަށް އޭގެ ނޭދެވޭ އަސަރުކޮށް، ރާއްޖޭގައި ހުންނަ ޑިޕްލޮމެޓިކް މިޝަންތަކަށް ނުރައްކަލަށް ހުށެހެޅިގެންދިޔަ ތަންވެސް ފެނިގެން ދިޔައެވެ.
ނަތީޖާއެއްގެ ގޮތުން، ބައިނަލްއަގުވާމީ މުވާހަދާތަކުން ސަރުކާރަށް ލާޒިމްކޮށްފައިވާ ގޮތުގެމަތިން، ދިވެހިރާއްޖޭގެ ތިބި ޑިޕޮމޭޓުންގެ ހިމާޔަތުގައި ފިޔަވަޅު އެޅުއްވުމަށް ސަރުކާރަށް މަޖުބޫރުވެ، ޚާރިޖީ ސިޔާސަތަށް ކަނޑައެޅިގެން ގެއްލުންދިނުމުގެ މަގުސަދުގައި ކުރެވޭ މިފަދަ ކެމްޕޭނުތައް ހުއްޓުވުމަށްޓަކާ، "އިންޑިއާ އައުޓު"ގެ ނަމުގައި ހިންގަމުން އައި ސިޔާސީ ހަރަކާތް މަނާކުރުމަށް ސަރުކާރަށް މަޖުބޫރު ވެގެން ދިއުމެވެ.
ޚާރިޖީ ސިޔާސަތަށް ގެއްލުންދީ، ރާއްޖެއިން ދަމަހައްޓަމުންދާ ޚާރިޖީ ގުޅުންތަކަކީ ސިޔާސީ ހަތިޔާރަކަށް ވެގެން ދިއުމުގެ ނަތީޖާއަކަށް ވެގެން ދިޔައީ، ޚާރިޖީ މަސްލަހަތައް ގެއްލުން ދިނުން މަނާކުރުމުގެ ނަމުގައި އެންމެފަހުން ރައްޔިތުންގެ މަޖިލީހަށް ބިލެއް ހުށަހެޅިގެން ދިއުމެވެ.
އެއީ ޖިނާއީ ކުށެއްގެ ގޮތުގައި ހެދުމަށް މިހާރު މަޖިލީހުގެ ކުރެވެމުންދާ މަސައްކަތްތަކުގެ ހަގީގީ އަސްލަކީ، ފާއިތުވެދިޔަ ތަނުގައި، ޚާރިޖީ ގުޅުންތައް ސިޔާސީ ހަތިޔާރަކަށް ވެގެންދިއުމުގެ ހަގީގީ ނަތީޖާކަމުގައި މިފުރުސަތުގައި ދަންނަވާން ޖެހެއެވެ.
ޚާރިޖީ މަސްލަހަތަށް ގަސްތުގައި ގެއްލުން ދިނުމަކީ ކުށެއް!
ރާއްޖޭގެ ހާރިޖީ މަސްލަހަތަށް ގެއްލުންވާ އަމަލުތައް ޖިނާއީ ކުށަކަށް ހަދަން ގާނޫނުލް އުގޫބާތަށް ބަދަލު ގެންނަން ސަރުކާރުން ރައްޔިތުންގެ މަޖިލީހަށް ހުށަހަޅާފައިވާ ބިލާމެދު މިހާރު މަޖިލިހުގައި ވަނީ ބަހުސް ކުރާން ފަށާފައެވެ.
މި ބިލާމެދު ކުރެވެމުންދާ ބަހުސްގައި، މަޖިލީހުގައި ތިއްބެވި އިދިކޮޅު މެމްބަރުންގެ އެންމެ ބޮޑު ކަންބޮޑުވުމަކަށް ވެގެން ދަނީ، މި ބިލުން ޚިޔާލުފާޅުކުރުމުގެ މިނިވަންކަމަށް ހުރަސްއެޅި، އެ މިނިވަންކަން ހަނިވެގެން ދާތީއެވެ.
ނޫސް މީޑިއާތަކުން ސަރުކާރަށް ފާޑުކިޔުން ޖިނާއީ ކުށަކަށް ހަދާ، އަބުރުގެ ބިލް މަޖިލީހަށް ހުށަހަޅާ، އެ ބިލު މަޖިލީހުން ފާސްވެސް ކުރުމަށް ރައީސް ޔާމިންގެ ދައުރުގައި ވޯޓުވެސް ދެއްވާފައި، މިހާރުގެ އިދިކޮޅު މެމްބަރުންގެ ގޮތުގައި ތިއްބެވި ބައެއް މެމްބަރުންނަށް، މިއަދު ޚިޔާލު ފާޅުކުރުމުގެ މުހިންމުކަން ނުހަނު މުހިންމުވެ، ރާއްޖޭގެ ހާރިޖީ މަސްލަހަތަށް ގެއްލުންވާ އަމަލުތައް ޖިނާއީ ކުށަކަށް ހަދަން މަޖިލިހަށް ހުށަހަޅާފައިވާ ބިލުގެ ސަބަބުން ޚިޔާލު ފާޅުކުރުމުގެ މިނިވަންކަން އެކީ ގެއްލިގެންދާތަންވެސް ވަރަށްވެސް ސާފުކޮށް މިހާރު ދަނީ ފެންނަމުންނެވެ.
މިކަން ބޮޑު ވެގެންވާ އަރައްތެެއްގެ ގޮތުގައި ފެންނާން އޮވެމެ، އޭގެ ބަދަލުގައި ޚާރިޖީ ސިޔާސަތު ގުރުބާންވެ، ސާބިތު ނުހިފޭ ވާހަކަތަކާއި، ކުރެވޭ މުޒާހިރާތަކުން ރާއްޖޭގެ ޚާރިޖީ ގުޅުންތައް ޚަރާބުވެ، ގައުމަށް އެހީތެރިކަމެއް މަދަދެއް ލިބޭނޭ މަގެއް ފަހިނުވެ، އޭގެ ނަތީޖާއެއްގެ ގޮތުގައި، ގައުމު ފުން އަދަވަަޅަކަށް ވެއްޓިގެން ދިޔަޔަސް ވަރިހަމަވުން މިއީ މިއަދުގެ ރާއްޖޭގެ ސިޔާސީ ހަގީގަތްކަމުގައި މިވަނީ ވެގެން ގޮސްފައެވެ.
އެހެންނަމަވެސް ގަބޫލުކުރާންޖެހޭ އެއް ހަގީގަތަކީ، ކޮންމެ ގައުމެއްގެވެސް ޚާރިޖީ ސިޔާސަތަކީވެސް ގާނޫނީ ހިމާޔަތާއި ރައްކާތެރިކަން ލިބިދެނިވި ސިޔާސަތަކަށްވެ، އެ ސިޔާސަތަށް ގަސްތުގައި ގެއްލުން ދިނުމުގެ ފުރުސަތު އެއްވެސް ގައުމެއްގައި މިބީދައިން ލިބިދެވިފައި ނޯންނަކަމެވެ. އަދި އެފުރުސަތު އެގޮތުގައި ތަނަވަސް ވެފައި އޮވެގެން ނުވާނެވެސް މެއެވެ.
ގައުމުގެ އެތެރޭގައި އޮންނަ ސިޔާސީ ވާދަވެރިކަމާއި ހަސަދައިގެން ކައްފާރާއަކަށް ޚާރިޖީ ސިޔާސަތު ހަދަން ފުރުސަތުވެސް ދެވިގެން ނުވާނެއެވެ. އަދި ދޭދޭ ގައުމުތަކާއެކީ ރާއްޖެއިން ބާއްވާ އެކުވެރި ރަހުމަތްތެރިކަމުގެ ގުޅުން މިއުސޫލުން ބަރުބާދުކޮށް، އޭގެ ސިޔާސީ ފައިދާއާއި މަންފާ ހާސިލްކުރަން ބަޔަކު މީހުން މަސައްކަތް ކުރާނަމަ، އެއީ ހަގީގަތުގައިވެސް ކުށަކަށް ނުވެ ނުދާނޭކަމީވެސް ކަށަވަރުވެ ޔަގީންވާން އޮތް ކަމެކެވެ.
