ލިވާތު ކުރިކަން ސާބިތުވެއްޖެނަމަ އިސްލާމީ ޝަރީއާގައި އަދަބަކީ މަރު ކަމުގައި ދީނީ އިލްމުވެރިޔާ ޝައިޚު އަލީ ޒައިދު ވިދާޅުވެއްޖެއެވެ.
ޒައިދު މިހެން ވިދާޅުވީ އެއް ޖިންސުން ގުޅުން ހިންގިިކަމުގެ ތުހުމަތުގައި ދައުވާއުފުލި، ބަންގްލަދޭޝްގެ ރައްޔިތެއްކަމަށްވާ އެމްޑީ އަލަމްގިރު ޝަރީއަތުގެ މަޖިލީހުގައި އިއުތިރާފުވުމުން, އޭނާގެ މައްޗަށް ކުށް ސާބިތުވާކަމަށް ކްރިމިނަލް ކޯޓުން ކަޑައެޅުމާއި ގުޅިގެންނެވެ.
ޝައިޚު ޒައިދު ވިދާޅުވީ އިސްލާމް ދީނުގައި އޮންނީ ލިވާތު ކުރާ މީހާއަށް މަރުގެ އަދަބު ދިނުންކަމަށެވެ. ދުނިޔެ މަތީގައި އެމީހަކު ކުރާ ކުށަކަށް ދުނިޔެ މަތީގައި އޭނާއަށް އަދަބު ލިބިއްޖެނަމަ އެމީހަކަށް އާޚިރަތް އަމާން ވާނެކަމަށް ބަޔާން ކޮށްފައިވާކަމަށް ޒައިދު ވިދާޅުވިއެވެ. އަދި ކުރެވޭ ކުށަށް ދުނިޔެ މަތީގައި އަދަބު ލިބުމަކީ އޭނާ އެކުށުން ތޯހިރުވެ އެހެން މީހުންނަށް އެކަމުން އިބުރަތަށް ވާނެކަމަށް ޒައިދު ވިދާޅުވިއެވެ.
ލިވާތު ކުރިކަން ސާބިތުވެއްޖެނަމަ އިސްލާމީ ޝަރީއާގައި އަދަބަކީ މަރު! ދީނުގައިވަނީ ދުނިޔެމަތީގެ އަދަބު ލިބިއްޖެ މީހާއަށް އާޚިރަތުގައި އަމާންވާނެކަމަށް! ކުށަކަށް ދުނިޔޭގައި އަދަބު ލިބުމަކީ އޭނާއެ ކުށުން ތޯހިރު ކޮށްދޭކަމެއް! އަދި އެހެން މީހުންނަށް ހުރި އިބްރަތެއް.
– އަލީ ޒައިދު ވިދާޅުވިއެވެ.
އަލަމްގިރްގެ އިއުތިރާފްވެފައިވަނީ އޭނާގެ މައްޗަށް އުފުލި އެއްޖިންސުން ގުޅުން ހިންގުމުގެ ތިން ދައުވާއަށެވެ. އަލަމްގީރްގެ ޝަރީއަތް ކްރިމިނަލް ކޯޓުގައި ފެށީ އިއްޔެ ހަވީރުއެވެ. މައްސަލަ ކުރިއަށްގެންދަނީ ސިއްރުކޮށްގެނެވެ.
އިއްޔެ ބޭއްވި އެ ދައުވާތަކުގެ އަޑު އެހުމުގައި އިއުތިރާފުވެ އޭނާ ޝަރީއަތުގެ މަޖިލީހުގައި އިއުތިރާފު ދެމެހެއްޓުމުން މައްސަލަ ބައްލަވާ ޤާޟީ ވަނީ އާލަމްގީރްގެ އިއުތިރާފު ބަލައިގެންފައެވެ. އަދި އޭނާ ކުށަށް އިއުތިރާފުވެފައިވާތީ, މައްސަލަ ބައްލަވާ ޤާޟީ ޢަލީ އާދަމް ނިންމެވީ އެމައްސަލަ އަވަސް ނިޔާގެ މައްސަލައެއްގެ ގޮތުގައި ނިންމެވުމަށެވެ. އޭގެފަހުން އަދަބާ ގުޅޭ ގޮތުން ވާހަކަ ދެއްކުމުގެ އަޑުއެހުމެއް ކުރިއަށް ގެންދިޔައެވެ. ކުރިމިނަލް ކޯޓުން ވިދާޅުވީ، މި މައްސަލާގައި އަދަބު ކަނޑައެޅުމަށާއި، ހުކުމް އިއްވުމަށް ވަރަށް އަވަހަށް އިތުރު އަޑުއެހުމެއް ބާއްވާނެކަމަށެވެ.
އެއްޖިންސުން ގުޅުން ހިންގި މައްސަލައިގައި މިހާތަނަށް 4 މީހެއްގެ މައްޗަށް ދައުވާ އުފުލިއެވެ. އެއީ އާލަމްގީރުގެ އިތުރުން ޤާނޫނީ ވަކީލް ނާޒިމް ސައްޠާރާއި، ނޮޅިވަރަމް ދާއިރާގެ ކުރީގެ މެންބަރު މުޙައްމަދު ނަޝީދާއި، ފުލުހެއްކަމަށްވާ ޢަބްދުއްރަހީމް ރާފިއުގެ މައްޗަށެވެ. އެމީހުންގެ މައްޗަށްވެސް ދައުވާ އުފުލީ ގާނޫނޫލްއުގޫބާތުގެ ދަށުންނެވެ.
ގާނޫނުލްއުގޫބާތުން ދައުވާ އުފުލުމުން މިމައްސަލައިގައި ހިމެނޭ މީހުންނަށް އެންމެ ބޮޑު އަދަބަކަށްވެސް އަންނާނީ ނުވަ މަހާއި 18 ދުވަހުގެ ޖަލު ޙުކުމެކެވެ.
