އިރާގުގައި ހުންނެވި އެންމެ ނުފޫޒުގަދަ ދީނީ އިލްމުވެރިޔާ، މުއްތަގާ އައްސަދުރު ސިޔާސީ ކަންކަންމުން ރިޓަޔަރ ކުރެއްވިކަން އިއުލާން ކުރައްވައިފިއެވެ.
އޭނާ މިއަދު ސިޔާސީ ކަންކަމުން ރިޓަޔަރ ކުރެއްވިކަން އިއުލާން ކުރެއްވިއިރު، ސަރުކާރެއް އެކުލަވާލުމުގައި ސިޔާސީ ޕާޓީތަކަށް އެއްގަލަކަށް އެރުމުގައި އުފެދިފައިވާ ޚިޔާލުތަތާތު ވުންތަކުގެ އެންމެ އިސް ފަރާތަކީ އޭނާއެވެ.
އެތައް މިލިއަން ޝީއައީންގެ ތާއީދު އޮތް، އަދި ނުފޫޒުގަދަ ސަދުރު ސިޔާސީ ކަންކަމުން ރިޓަޔަރ ކުރެއްވިކަން އިއުލާން ކުރައްވާފައިވަނީ ޓުވިޓަރ މެދުވެރި ކޮށެވެ.
މިއަދު އޭނާ ސިޔާސީ ކަންކަމުން ރިޓަރ ކުރެއްވިއިރު، އޭނާއަށް ތާއީދުކުރާ އެތައް ސަތޭކަ ބަޔަކު، އިރާގުގެ ގާނޫނުހަދާ މަޖިލިސް ބޭރުގައި ކޭމްޕްޖަހައިގެން ތިބޭތާ އެތައް ހަފްތާއެއް ވަނީ ފާއިތުވެގެން ގޮސްފައެވެ. އަދި ޕާޓީތަކުގެ މެދުގައި ޚިޔާލުތަފާތުވުން އުފެދި މަރުތަޅު އެޅިފައި ވަނިކޮށް، ސަދުރަށް ތާއީދުކުރާ ފަރާތްތަކުން ވަނީ ދެފަހަރެއްގެމަތިން ގާނޫނުހަދާ މަޖިލިހަށް ވަދެގަނެ އެތަނަށް ހަމަލާވެސް ދީފައެވެ.
އެމެރިކާ ސިފައިން 2003 ވަނަ އިރާގަށް އެރުމަށްފަހު، އެގައުމުގައި އެމެރިކާ ސިފައިންނާ ހަގުރާމަ ކުރުމުގައި އެންމެ އިސް ދައުރެއް އަދާކޮށްފައިވަނީ އޭނާއަށް ތަބާވާ ހަގުރާމަވެރިންނެވެ.
ސަދަރު އިސްތިއުފާ ދެއްވިކަން އިއުލާން ކުރައްވާފައިވަނީ، އެމެރިކާއިން އިރާގަށް އެރުމަށްފަހު ސިޔާސީ މަސްރަހަށް ނުކުތް ފަރާތްތަކުން ސިޔާސީ މަސައްކަތުން ދުރަށް ދިއުމަަށް އޭނާ ގޮވާލެއްވިތާ ދެ ދުވަސް ފަހުންނެވެ.
އިރާގުގައި އެންމެ ފަހުން ބޭއްވި ގާނޫނުހަދާ މަޖިލިހުގެ އިންތިޚާބުގައި އެންމެ ގިނަ ގޮނޑިވެސް ކާމިޔާބު ކޮށްފައިވަނީ ސަދުރު އެކުލަވާލެއްވި ކޯލިޝަނުންނެވެ. އެހެންނަމަވެސް، އާ ބޮޑުވަޒީރަކު އައްޔަން ކުރުމުގައި ވާދަވެރި ޝިޢައީންގެ ބްލޮކާއާއި ދެމެދު އުފެެދުނު ޚިޔާލުތަފާޓުވުންތަކަށް ހައްލު ނުލިބި، ސަދުރުގެ ގިނަ މެމްބަރުންވަނީ ގާނޫނުހަދާ މަޖިލިހުން އިސްތިއުފާ ދެއްވާފައެވެ.
"ސިޔާސީ ކަންކަމުގެ ތެރެއަށް ނުވަނުމަށް އަހަރެން ނިންމައިފިން. އަދި ސިޔާސީ ކަންކަމުން ރިޓަޔަރ ކުރާކަމާއި، ސަދުރުގެ ހުރިހާ މުވައްސަސާތަކެއްވެސް ބަންދު ކުރުމަށް ނިންމިކަން އިއުލާން ކުރަން،" ސަދުރު ނެރުއްވި ބަޔާނުގައި ވިދާޅުވެފައި ވެއެވެ. އެހެންނަމަވެސް އޭނާގެ ހަރަކާތްތަތާއި ގުޅުންހުރި ބައެއް ސައިޓުތައް އަދި ބަންދު ނުކުރާނެކަމަށް ވެއެވެ.
އުމުރުން 48 އަހަރުގެ ސަދުރަކީ ފާއިތުވީ 20 އަހަރުގައިވެސް، އިރާގުގައި މަޝްހޫރު، ސިޔާސީ ގޮތުން ނުފޫޒުގަދަ ފަރާތެކެވެ.
އެމެރިކާ ސިފައިން، އިރާގަށް އަރާ، ސައްދާމް ހުސެއިންގެ ސަރުކާރު ބަދަލު ކުރުމަށްފަހު، އިރާގުގައި އެމެރިކާ ސިފައިނާއި، އަދި އެމެރިކާ ސިފައިންގެ އެހީއާއެކު އުފެއްދި ގުޅިފައިވާ ސަރުކާރާ ދެކޮޅަށް ހަގުރާމަ ކުރުމުގައި އެންމެ އިސްދައުރެއް އަދާކޮށްފައިވަނީ އޭނާގެ މެހްދީ އާރމީއެވެ.
ފަހުން މި އަސްކަރީ ޖަމާއަތް އޭނާވަނީ ރީ ބްރޭންޑްކޮށް ޕީސް ބްރިގޭޑްގެ ނަމުން ނަން ދީފައެވެ. އަދި މިއީ މިއަދުވެސް އިރާގުގައި އޮތް އެންމެ ބޮޑު އެއް ހަނގުރާމަވެރި ޖަމާއަތެވެ. އަދި މި ޖަމާއަތުގެ ބޮޑުބައިވަނީ އިރާގުގެ އަސްކަރިއްޔާގައި ހިމެނިގެން ގޮސްފައެވެ.
