މޯލްޑިވިއަންގެ ފްލައިޓް އޮޕަރޭޝަންސްގެ ކުރީގެ ޑިރެކްޓަރު މުހައްމަދު އަމީނަށް އަލުން ވަޒީފާ ދިނުން މަޑުޖައްސައިލަން ހައި ކޯޓުން އިއްޔެ އަމުރުކޮށްފިއެވެ.
އަމީނަށް އަލުން ވަޒީފާ ދިނުމަށް ސިވިލް ކޯޓުން ހުކުމް ކުރީ މިދިޔަ ޖޫން 28 ވަނަ ދުވަހުއެވެ. އައިއޭއެސްގެ ޑިރެކްޓާ އޮފް ފްލައިޓް އޮޕަރޭޝަންސްގެ މަގާމުން އަމީން ވަކިކޮށް، އޭނާގެ މަގާމު ދަށްކޮށްފައިވަނީ 2019 ވަނަ އަހަރުގެ ޖޫން މަހުއެވެ. އޭރު އެ ކުންފުނިން ބުނެފައިވަނީ އަމީން އެ މަގާމުން ވަކިކުރީ ކުންފުނި ރިސްޓްރަކްޗާ ކުރުމުގެ ތެރެއިން ކަމަށެވެ.
ނަމަވެސް، އެ ހުކުމް ތަންފީޒުކުރުން ފަސްކުރުމުގެ އަމުރަކަށް މޯލްޑިވިއަންގެ ފަރާތުން ކޯޓުގައި އެދުމުން، ފަނޑިޔާރު މުހައްމަދު ނިޔާޒު ރިޔާސަތު ބެލެހެއްޓެވި ބެންޗުން ނެރުނު އަމުރުގައި ބުނީ، އެ އެ ކުންފުނިން ހުށަހެޅި ކަންތައްތަކަށް ބަލާއިރު، ގާނޫނީ ރަނގަޅު ބަހުސެއް އޮތް ކަމަށް ފެންނަ ކަމަށެވެ.
ފަނޑިޔާރު މުހައްމަދު ނިޔާޒު ރިޔާސަތު ބެލެހެއްޓެވި ބެންޗުން ނެރެފައިވާ އަމުރުގައި ބުނެފައިވަނީ ދަށު ކޯޓުގެ ހުކުމް ތަންފީޒުކުރުން ވަގުތީގޮތުން މަޑުޖައްސާނުލައިފިނަމަ އައިއޭއެސްގެ މަސްލަހަތަށް އުނިކަން ލިބިދާނެ ކަންތައްތަކެއް ހުރި ކަމަށް ބެލެވޭ ކަމަށެވެ. އެހެންކަމުން މިމައްސަލައިގައި ކޯޓުން ވަކި ގޮތެއް ކަނޑައަޅަންދެން ދަށު ކޯޓުގެ ހުކުމް ތަންފީޒުކުރުމުގެ ގޮތުން އެއްވެސް ފިޔަވަޅެއް ނޭޅުމަށްވެސް އެދިފައިވެއެވެ.
ސިވިލް ކޯޓުން މައްސަލަ ބެލުމަށްފަހު ނިންމީ އޭރު އޭނާ ހުރި މަގާމުން ވަކިކުރުމަށްފަހު މަގާމު ދަށްކުރީ ގޯސްކޮށް ކަމަށެވެ. އެހެންކަމުން އަލުން އެ މަގާމު ނުވަތަ އެ ފެންވަރުގެ އެހެން މަގާމެއް 15 ދުވަސް ތެރޭގައި އަމީންއަށް ދިނުމަށް ސިވިލް ކޯޓުގެ ހުކުމުގައި ބުނެފައިވެއެވެ.
ވަޒީފާއިން ވަކިކުރި ދުވަހުން ފެށިގެން އަނބުރާ ވަޒީފާ ދިނުމާ ހަމައަށް ލިބެންޖެހޭ މުސާރަ އާއި އިނާޔަތްތައް ދިނުމަށްވެސް ހުކުމުގައި އަމުރުކޮށްފައިވެ އެވެ. އެއީ އަށް މިލިއަނެއްހާ ރުފިޔާއެވެ. އެކަމަކު އެ މުއްދަތުގައި އަމީން އެހެން ވަޒީފާއެއް އަދާކުރިނަމަ އެ ފައިސާ އުނިކުރަން ޖެހޭނެ ކަމަށްވެސް ކަނޑައަޅާފައިވެއެވެ.
