މެންޗެސްޓާ ޔުނައިޓެޑުން ރަށުން ބޭރުގައި ސައުތެމްޓަން އާ ދެކޮޅަށް ކުޅުނު މެޗު 1-0 އިން ކާމިޔާބު ކޮށްފިއެވެ.
މި މެޗުގައިވެސް ޔުނައިޓެޑުގެ ޕޯޗުގަލް ކެޕްޓަން ކްރިސްޓިއާނޯ ރޮނާލްޑޯއަށް ފުރަތަމަ 11 އިން ޖާގަ ދީފައި ނުވާއިރު، އެންމެ ފަހުން ލިވަޕޫލް އަތުން 1-2 ގެ ނަތީޖާއަކުން ޔުނައިޓެޑު މޮޅުވި މެޗުންވެސް އޭނާއަށް ފުރަތަމަ 11 އިން ފުރުސަތު ނުދެއެވެ.
ސައުތުހެމްޕްޓަން ދަނޑުގައި ކުޅުނު މި މެޗު ފެށިގެން ޔުނައިޓެޑުން ބޯޅަ ކޮންޓްރޯލްކޮށް ރަނގަޅަށް ކުޅެމުން ގޮސްފައިވާއިރު، އެޓީމުން ދިޔައީ ސައުތުހެމްޕްޓަންގެ ގޯލަށް ނުރައްކާކޮށް ހަމަލާ އުފައްދަމުންނެވެ. ފުރަތަމަ ހާފްގައި ސައުތުހެމްޕްޓަން އިން ވެސް ވަނީ ޔުނައިޓެޑުގެ ގޯލަށް ނުރައްކާކޮށް ހަމަލާ ފޮނުވާލާފައެވެ. ނަމަވެސް ފުރަތަމަ ހާފް ނިމިފައި ވަނީ ދެޓީމުންކުރެ ޓީމަކަށް ވެސް ލަނޑެއް ނުޖެހި އެއްވަރުވެގެންނެވެ.
ދެވަނަ ހާފްގައި ޔުނައިޓެޑުން އެޓީމުގެ އެޓޭކްތައް ވަރުގަދަ ކޮށްފައިވާއިރު، އެޓީމުން ވަނީ 55 ވަނަ މިނެޓުގައި ބްރޫނޯ ފެނާންޑޭޒް ކާމިޔާބުކުރި ލަނޑުން މެޗުގެ ލީޑު ނަގާފައެވެ. މިއާއެކު އެޓީމުން ކުޅެމުން ދިޔައީ ފަހަތަށް ޖެހިގެންނެވެ. ސައުތުހެމްޕްޓަންއަށް މުޅި މެޗުގައިވެސް ލަނޑު ޖެހުމަށް ގިނަ ފުރުސަތުތައް ވަނީ ލިބިގެން ގޮސްފައެވެ. ނަމަވެސް އެ ފުރުސަތުތަކުގެ ބޭނުން އެޓީމަށް އެންމެ އެދެވޭ ގޮތެއްގައި ހިފިފައެއް ނުވެއެވެ.
މި މެޗުގައި ދެވަނަ ހާފުން ކްރިސްޓިއާނޯ ރޮނާލްޑޯއަށް ފުރުސަތު ދީފައިވާއިރު، އެޓީމަށް އަލަށް ސޮއިކުރި ކަސެމީރޯވެސް ވަނީ ދެވަނަ ހާފްގައި ބަދަލު ކުޅުންތެރިޔެއްގެ ގޮތުގައި ކުޅެން އަރާފައެވެ.
ސައުތުހެމްޓަންގެ ދަނޑުގައި ކުޅުނު މެޗު ހަމައެކަނި ލަނޑު ދެ ވަނަ ހާފުގެ ކުރީކޮޅު ޖެހީ ޔުނައިޓެޑްގެ ކެޕްޓަން ބޭންޑް އަޅައިގެން ކުޅުނު ފެނާންޑޭޒެވެ. މި ނަތީޖާއާ އެކު، ޔުނައިޓެޑް ވަނީ ތާވަލްގެ ހަ ވަނަ އަށް ޖެހިލައިފައެވެ.
