ރާއްޖޭގެ މިނިވަންކަން އޮތް އެންމެ ބޮޑު ނުރައްކަލަކީ އިންޑިޔާގެ ނުފޫޒު އިމެއް މިނެއްނެތި އޮތުން ކަމުގައި އިދިކޮޅު ޕީޕީއެމްގެ ނައިބް ރައީސް އަހުމަދު ޝިޔާމް ވިދާޅުވެއްޖެއެެވެ.
ޝިޔާމް މިހެން ވިދާޅުވީ ނުރައްސްމީ ދަތުރުފުޅެއްގައި ރައީސް ނަޝީދު އިންޑިއާއަށް ކުރައްވާ ދަތުރުފުޅަށް އަމާޒުކޮށް ކުރެއްވި ޓުވީޓެއްގައެވެ. ރައްޔިތުންގެ މަޖިލީހުގެ އިދާރާއިން ރައީސް ނަޝީދު ނުރަސްމީ ދަތުރުފުޅެއްގައި ފުރާވަޑައިގަންނަވާކަމަށް ބުނެފައި ވީ ނަމަވެސް އެމަނިކުފާނުގެ ދަތުރާ ގުޅިގެން އިތުރު ތަފްސީލެއް ދީފައެއް ނުވެއެވެ.
ޝިޔާމް ވިދާޅުވީ ރާއްޖޭގެ މިނިވަންކަމާ ޤައުމީ ސަލާމަތަށް މިއަދުއޮތް އެންމެބޮޑު ނުރައްކަލަކީ ޤައުމުގެ ދާޚިލީ އަދި ޚާރިޖީ ކަންކަމަށް އަވަށްޓެރި އިންޑިޔާގެ ނުފޫޒު އިމެއް މިނެއްނެތި ވަދެފައިވާ މިންވަރު ކަމަށެވެ.
ދިވެހިރާއްޖޭގެ މިނިވަންކަމާ ޤައުމީ ސަލާމަތަށް މިއަދުއޮތް އެންމެބޮޑު ނުރައްކަލަކީ ޤައުމުގެ ދާޚިލީ އަދި ޚާރިޖީ ކަންކަމަށް އަވަށްޓެރި އިންޑިޔާގެ ނުފޫޒު އިމެއް މިނެއްނެތި ވަދެފައިވާ މިންވަރު. އަދި މިކަމާ ބަހެއްބުނަން ސަރުކާރު ނުކުޅެދި ހުރިހާގޮތަކުން ކަސްތޮޅު އެޅިފައިވާ މިންވަރު.
– ޝިޔާމް ވިދާޅުވިއެވެ.
ނުރަސްމީ ދަތުރުފުޅެއްގައި، އެމްޑީޕީގެ ރައީސް މުހައްމަދު ނަޝީދު އިއްޔެ އިންޑިއާއަށް ވަޑައިގެންފައި ވަނިކޮށް، ޔޫއެންގެ ޖެނެރަލް އެސެމްބްލީގެ ރައީސް ޝާހިދުވެސް މިއަދު އިންޑިއާއަށް ވަޑައިގަތުމަށް ވަނީ ހަމަޖެހިފައެވެ. އިންޑިއާގައި ހުންނަ ޔޫއެން މިޝަންއިން ހާމަކޮށްފައިވާ ގޮތުގައި ޝާހިދު އިންޑިއާއަށް ވަޑައިގަތުމަށް ހަމެޖެހިފައިވަނީ މިމަހުގެ 28 އިން 29އަށެވެ. މި ދަތުރުފުޅުގައި އިންޑިއާގެ ނާއިބު ރައީސް ޖަގްދީޕް ދަންކަރުއާއި ފޮރިންގ ސެކެޓްރީ ވިނޭ މޯހަން ކަވަޓްރާއައި ބައްދަލުކޮށް، ޖެނެރަލް އެސެމްބްލީގައި ކުރިޔަށްދާ މައްސަލަތަކުގެ އިތުރުން، އިންޑިއާއިން ޔޫއެންއެންގައި ކުރަމުންދާ މަސައްކަތްތަކާއި ގުޅޭގޮތުން މަޝްވަރާ ކުރައްވާނޭކަމަށް އިންޑިއާގައި ހުންނަ ޔޫއެން މިޝަންއިން ވިދާޅުވެފައި ވެއެވެ.
ޝާހިދު މިއަދު އިންޑިއާއަށް ވަޑައިގަން ނަވާއިރު، އިއްޔެ އެމްޑީޕީގެ ރައީސް މުހައްމަދު ނަޝީދުވެސް ވަނީ އިންޑިއާއަށް ވަޑައިގެންފައެވެ. މަޖިލިސް އިދާރާއިން ބުނެފައިވަނީ ރައީސް ނަޝީދުގެ މިދަތުރުފުޅަކީ ނުރަސްމީ ދަތުރުފުޅެއްކަމަށެވެ. އޭގެ އިތުރުން ނަޝީދުގެ މިދަތުރުގެ މާބޮޑު ތަފްސީލެއް މަޖިލިސް އިންދާރާއިން ހާމަކޮށްފައި ނުވެއެވެ. ނަޝީދު އިންޑިއާއަށް ފުރާ ވަޑައިގެންފައިވާއިރު އެމަނިކުފާނު ވަނީ މިއަހަރުގެ އޭޕްރީލް މަހުގެ ތެރޭގައިވެސް އިންޑިއާއަށް ވަޑައިގެންފައެވެ. ޝާހިދުއާއި ނަޝީދުއާއި ދެ ބޭފުޅުން އިންޑިއާއަށް ވަޑައިގަންނަވާއިރު، ރައީސް ސާލިހުވެސް ވަނީ މީގެ 3 ހަފްތާކުރިން އިންޑިއާއަށް ވަޑައިގެންފައެވެ.
ރައީސް ސާލިހުއާއި، ނަޝީދުގެ އިތުރުން ޝާހިދުވެސް އިންޑިއާއަށް ވަޑައިގަންނަވާއިރު، ކުރިޔަށް އޮތް 2023ގެ ރިޔާސީ އިންތިޚާބުގެ އެމްޑީޕީގެ ރިޔާސީ ޓިކެޓް ހޯއްދެވުމަށް ނަޝީދު އާއި ރައީސް ސާލިހެ ގެންދަވަނީ މަސައްކަތް ކުރައްވަމުންނެވެ. އަދި ރައީސް ސާލިހުއާއި ނަޝީދުގެ ސިޔާސީ ވާދަވެރިކަން ބޮޑުވެ، ޕާޓީވަނީ ދެ ބަޔަކަށް ބެހިފައެވެ. މައުލޫމާތު ލިބިފައިވާ ގޮތުގައި، ދެބޭފުޅުންވެސް ގެންދަވަނީ ކުރިޔަށް އޮތް ރިޔާސީ އިންތިޚާބަށް އިންޑިއާ ސަރުކާރުގެ ތާއީދު ހޯއްދެވުމަށް މަސައްކަތް ކުރައްވަމުންނެވެ.
