ޔުނައިޓްޑް ނޭޝަންސް ކޮންފަރެންސް އޮން ނިއުކުލިއަރ ޑިސްއާމަމެންޓުގެ ގުޅިފައިވާ ޑެކްލަރޭޝަންގެ މުއްދަތު އިތުރުކުރުން ރަޝިއާއިން ހުއްޓުވައިފިއެވެ.
މި ޓްރީޓީގެ މުއްދަތު އިތުރުކުރުމަށް އެކުލަވާލާފައިވާ ޑްރާފްޓްއާއި ރަޝިއާއިން ދެކޮޅު ހަދާފައިވަނީ، ޔޫކުރެއިން ނިއުކުލިއަރ ޕްލާންޓްތަކުގައި، އަދި ވަކީން ޚާއްސަކޮށް، އެގައުމުގެ ޒެޕޮރިޒްހިއާގައި ހުންނަ ނިއުކުލިއަރ ޕްލާންޓްތައް ހިމެނޭ ސަރަހައްދުތަކުގައި ހިނގަމުންދާ އަސްކަރީ ހަރަކާތްތަކާއި ގުޅޭގޮތުން "ބޮޑެތި ކަންބޮޑުވުންތަކެއް" ހުރިކަމަށް ބުނެއެވެ.
"ދަ ނިއުކުލިއަރ ނޮން ޕްރޯލިފެރޭޝަން ޓްރީޓީ"އަކީ، ކޮންމެ 5 އަހަރަކުން ދުނިޔޭގެ 191 ގައުމަކުން ސޮއިކޮށް، ބަލައިގަންނަމުންދާ މުވާއަހަދާއެކެވެ.
2020ވަނަ އަހަރު ބޭއްވުމަށް ހަމަޖެހުނު މި ބައްދަލުވުން ކޯވިޑް19ގެ ސަބަބުން ލަސްކުރެވި، އެންމެފަހުން ބޭއްވިފައިވަނީ މިއަހަރުއެވެ.
އެމެރިކާގެ ނިއު ޔޯކުގައި 4 ހަފްތާގެ މުއްދަތަށް ކުރިޔަށްދިޔަ މި ބައްދަލުވުމަށްފަހު ގުޅިގައިވާ ނިންމުމަކާއި ހަމައަށް ދިއުމަށް މި ބައްދަލުވުމުގައި ގައުމުތަކަށް ވަނީ އެއްބަސް ނުވެވިފައެވެ.
މި ބައްދަލުވުމަށްފަހު، އޮސްޓްރޭލިއާގެ ފޮރިންގ މިނިސްޓަރ ޕެނީ ވޮންގ ވިދާޅުވެފައިވަނީ ބައްދަލުވުމުގައި އެއްބަސްވުމަކާއި ހަމައަށް އާދެވިފައި ނުވާތީ އޭނާ އިންތިހާއަށް ހިތާމަކުރާ ކަމުގައެވެ. އަދި އެމެރިކާގެ މަންދޫބު ބެނީ ކެންކިންސް ވިދާޅުވެފައިވަނީ، "މި ބައްދަލުވުމުގެ ނަތީޖާއާއި ގުޅޭގޮތުން އިންތިހާއަށް ހިތާމަކުރައްވާކަމަށާއި، މި ނަތީޖާއާއިހަމައަށް ވާސިލްވާ ޖެހުނީ ރަޝިއާގެ ސަބަބުން" ކަމުގައެވެ.
ޒެޕޮރިޒްހިއާގައި ހުންނަ ނިއުކުލިއަރ ޕްލާންޓް ރަޝިއާއިންވަނީ ޔޫކުރެއިން ހަނގުރާމައިގެ ވަރަށް ކުރީކޮޅު ހިފާފައެވެ. އަދި މި ޕްލާންޓުން ރޭޑިއޭޝަން ލީކްވެދާނެ ކަމުގެ ބިރު ހީވެފައިވާއިރު، ދެފަރާތުންވެސް ދަނީ ި ޕްލާންޓް ސަރަހައްދަށް ހަމަލާ ދޭކަމުގެ ތުހުމަތު އަނެއް ފަރާތުގެ ބޮލުގައި އަޅުވަމުންނެވެ.
