ރައީސް ޔާމީން ވެރިކަމަށް ގެނައުމަށްޓަކައި މަސައްކަތް ކުރަމުންދަނީ ކެރިހުރެ ވަރަށް ސާބިތު ކަމާއި އެކުގައިކަމަށް އިދިކޮޅު ޕީއެންސީގެ ރައީސް އަބްދުއްރަހީމް ވިދާޅުވެއްޖެއެވެ.

2023ވަނަ އަހަރުގެ ރިޔާސީ އިންތިޚާބުގައި އިދިކޮޅު ޕީޕީއެމް، ޕީއެންސީ ހިމެނޭ ކޯލިޝަނުގެ ފަރާތުން ވާދަކުރައްވާނެ ކެންޑިޑޭޓަކީ ކުރީގެ ރައީސް ޔާމިން އަބްދުލް ޤައްޔޫމުކަމަށް ޕީޕީއެމްގެ ސެނެޓުން ނިންމާފައިވާތީ، ރިޔާސީ ޓިކެޓް ރައީސް ޔާމީނަށް ރަސްމީކޮށް އަރުވައިފައިވަނީ މިމަހުގެ 19 ވަނަ ދުވަހުރޭ ބޭއްވި ޚާއްސަ ބޮޑު ޖަލްސާގައެވެ.

ރައީސް ޔާމީން ވެރިކަމަށް ގެނައުމަށް ކުރަމުންދާ މަސައްކަތުގައި ހުރި ގޮންޖެހުންތަކާއި ގުޅިގެން އަދުރޭ ވިދާޅުވީ މިމަސައްކަތަކީ ބުރަ އަދި ހުރަސްތައް ގިނަ މަސައްކަތެއްކަން އެގޭކަމަށެވެ. ނަމަވެސް މިމަސައްކަތާއި ކުރިމަތި ލަނީ ދިމާވާ ކޮންމެ ހުރަހެއް ގިރާކޮށް ދިމާވާ ކޮންމެ ގޮންޖެހުމަކާއި ކުރިމަތިލައި ވަރަށް ސާބިތު ކަމާއިއެކުގައިކަމަށް އަދުރޭ ވިދާޅުވިއެވެ.

2023ގައި މި ރާއްޖޭގެ ވެރިކަމަށް ރައީސްޔާމީން ގެނައުމަށްޓަކައި މަަސައްކަތްކުރާއިރު ދިމާވާ ކޮންމެ ގޮންޖެހުމަކާ ކުރިމަތިލާ ގިރާކުރަންޖެހުނު ކޮންމެ ހުރަހެއް ގިރާކުރާނީ ޙަސަދަވެރިންނަށް ބެލުމެއްނެތި ވަރަށް ކެރިހުރެ ސާބިތުކަމާއެކު. މި މަސައްކަތް ކާމިޔާބުވާނެ.

– އަދުރޭ ވިދާޅުވިއެވެ.

ރައީސް ޔާމީން ވެރިކަމަށް ގެނައުމަށް މަސައްކަތް އިދިކޮޅު ޕްރޮގްރެސިވް ކޯލިޝަނުން ކުރަމުންދާއިރު، ރައީސް ޔާމީނަކީ ސަރުކާރަށްވެސް އަދި މިއިންތިޚާބުގައި ވާދަކުރާ އެހެން ކެނޑިޑޭޓުންވެސް އެންމެ ޖެހިލުންވާ ކެނޑިޑޭޓެވެ. ރައީސް ޔާމީނާއި ޓިކެޓް ހަވާލުކުރުމަށް ބޭއްވި ޖަލްސާގައިވެސް އެތައް ސަތޭކަ ބަޔަކު ބައިވެރިވެފައިވާއިރު، ރައީސް ޔާމީނަށް އޮތް ތާއީދަކީ ރާއްޖޭގެ ތަރައްޤީއަށް އެމަނިކުފާނު ކޮށްދެއްވާފައިވާ މަސައްކަތްތަކުގެ ސަބަބުން އޮތް ތާއީދެއްކަަށް އިދިކޮޅު ކޯލިޝަނުން ދަނީ ބުނަމުންނެވެ.

ދެންވެސް ރާއްޖެ ތަރައްޤީ ކުރެވޭނީ ރައީސް ޔާމީނަށް ކަމަށާއި، އެމަނިކުފާނު 2023ގައި ވެރިކަމަށް ގެނައުމަކީ ރާއްޖޭގެ ތަރައްޤީއަށް ކުރަންޖެހޭ އެންމެ މުހިންމު މަސައްކަތްކަމަށް އިދިކޮޅު ކޯލިޝަނުން ދަނީ ބުނަމުންނެވެ.