ޗެލްސީގެ ލެޖެންޑް ޓެރީ އާއެކު ތުލުސްދޫގައި ޚާއްސަ ހަރަކާތެއް!

ޗެލްސީގެ ފުޓްބޯޅަ ލެޖެންޑް ޖޯން ޓެރީ އާއެކު ކ.ތުލުސްދޫގައި ޚާއްސަ ހަރަކާތެއް ކުރިއަށްގެންގޮސްފިއެވެ.

ޗެލްސީގެ އެންމެ ކާމިޔާބު ކެޕްޓަނުގެ ގޮތުގައި ފާހަގަކޮށްލެވޭ އިންގްލަނޑުގެ ކުރީގެ ޑިފެންޑަރު ޓެރީ އަންނަނީ އޭނާގެ އާއިލާއާއެކު ކުޑަ ވިލިނގިލި ރިސޯޓުގައި ޗުއްޓީ ހޭދަކުރަމުންނެވެ. އެއާއެކު ކުޑަ ވިލިނގިލި ރިސޯޓުގެ މެނޭޖުމަންޓާއި ތުލުސްދޫ ކައުންސިލް ގުޅިގެން އާދީއްތަ ދުވަހުގެ ހަވީރު ވަނީ ތުލުސްދޫގައި ޚާއްސަ ހަރަކާތެއް ކުރިއަށް ގެންގޮސްފައެވެ.

ތުލުސްދޫއިން ޓެރީއަށް ހޫނު މަރުހަބާއެއް ކީއިރު، މި ހަރަކާތުގައި މާލެ އަތޮޅު ކައުންސިލް ރައީސް މުހައްމަދު ނިމާލްއާއި، ފަތުރުވެރިކަމާ ބެހޭ ވަޒީރު ޑރ. މައުސޫމުވެސް ވަނީ ބައިވެރިވެވަޑައިގެންފައެވެ. މި ހަރަކާތުގެ ތެރެއިން ތުލުސްދޫ ފުޓްސަލް ދަނޑުގައި ވަނީ ޚާއްސަ މެޗެއް ކުޅެފައެވެ. އެ މެޗުގައި ބައްދަލުކުރީ ތުލުސްދޫ ޓީމާއި ކުޑަ ވިލިނގިލި ރިސޯޓުގެ ފުޓްސަލް ޓީމެވެ. މި މެޗު 6-2 ގެ ނަތީޖާއަކުން ކާމިޔާބުކުރީ ކުޑަ ވިލިނގިލި ރިސޯޓުގެ ޓީމުންނެވެ.

މި މެޗުގެ މޮޅު ކުޅުންތެރިޔާގެ މަގާމު ހޮވީ މެޗުގެ ޝަރަފުވެރި މެހުމާނު ޓެރީއެވެ. އެގޮތުން މެޗުގެ މޮޅު ކުޅުންތެރިއަކަށް ޓެރީ ހޮވާފައިވަނީ މެޗުގައި ކުޑަ ވިލިނގިލި ޓީމަށް ހަތަރު ލަނޑު ކާމިޔާބުކޮށްދިން މުޙައްމަދު ނަބީލެވެ. އަދި އޭނާއަށް ޓެރީ ވަނީ ޗެލްސީގެ ޖާޒީއެއް ހަދިޔާކޮށްފައެވެ.

ޗެލްސީގެ އެކެޑަމީގެ ކޮންސަލްޓަންޓެއްގެ ގޮތުގައި މިހާރު ހަރަކާތްތެރިވަމުން އަންނަ އުމުރުން 41 އަހަރުގެ ޓެރީ ވަނީ ކުޅުން ހުއްޓާލުމަށް ފަހު އެސްޓަން ވިލާގެ އެސިސްޓަންޓް ކޯޗެއްގެ ގޮތުގައި 2018 އިން 2021 އަށް މަސައްކަތްކޮށްފައެވެ. އަދި ޗެލްސީއާ އެކު ކުޅުންތެރިއެއްގެ ގޮތުގައި ހޭދަކުރި 15 އަހަރުގެ ތެރޭގައި ޓެރީ ވަނީ 15 ތަށި ހޯދާފައެވެ. ޗެލްސީ ދޫކޮށް ޓެރީ އޭނާގެ ކެރިއަރުގެ ފަހު އަހަރު ކުޅުނީ އެސްޓަން ވިލާއަށެވެ.