ބަރުލަމާނީގެ ނިޒާމަކަށް ރާއްޖޭގެ ވެރިކަމުގެ ނިޒާމު ބަދަލުކޮށް، ބޮޑުވަޒީރަކަށް ވެވަޑައިގަތުމަށް އެމްޑީޕީގެ ރައީސް މުހައްމަދު ނަޝީދު މިއަށްވުރެ ވަރުގަދައަށް ކަމަރު ބެންވި އިރެއް، ނުވަތަ ޒަމާނެއް ނަޝީދުގެ ސިޔާސީ ހަޔާތްޕުޅުން ފެނިގެން ގޮސްފައި ނުވާކަމަށް ގިނަ ބަޔަކު ބުނަމުންދަނީ ސަބަބުތަކެއް ނެތިއެއް ނޫނެވެ.

ފާއިތިވެދިޔަ 2 އަހަރެއްހާ ދުވަހުގެ ތެރޭގައި ނަޝީދުވަނީ ރާއްޖޭގެ ވެރިކަން ބަރުލަމާނީ ނިޒާމަކަށް ބަދަލު ކުރުމަށް ބޭނުންފުޅުވެ އެކި ގޮތްގޮތުން އެމަގަށް މަސައްކަތް ކުރައްވާފައެވެ.

މިގޮތުން އެންމެ ފުރަތަމަ މަސައްކަތް ކުރެއްވީ، ރައްޔިތުންގެ ފެންނަ ނުފެންނަ ވޯޓަކަށްވެސް ނުގޮސް، މަޖިލިހުގައި އޮތް ސުޕަރ މެޖޯރިޓީގެ ބޭނުން ކުރައްވައިގެން މިހާރު ރާއްޖޭގައި ވެރިކަން ކުރަމުންދާ ރިޔާސީ ނިޒާމު ބަރުލަމާނީ ނިޒާމަކަށް ބަދަލު ކޮށްލުމަށެވެ. އެހެންނަމަވެސް، އެމަގަށް އެކަން ކުރުމަށް ޖާގަ ނުދެއްވާނޭ ކަމަށް ވިދާޅުވެ ރައީސް ސާލިހު އޭރު ވިދާޅުވެފައިވަނީ، ވެރިކަމުގެ ނިޒާމު ބަދަލު ކުރެވޭނީ އާންމު ރައްޔިތުންގެ ފެންނަ ނުފެންނަ ވޯޓަކުން ކަމުގައެވެ.

އެއަށްފަހު ދެން ނަޝީދު މަސައްކަތް ކުރައްވާފައިވަނީ، ނިޒާމު ބަދަލު ކުރުމަށްޓަކާ އާންމު ރައްޔިތުންގެ ފެންނަ ނުފެންނަ ވޯޓަކަށް ދިއުމަށް މަގުފަހި ކުރުވުމަށެވެ.

މިގޮތުން، 6 މޭގެ ޓެރަރިސްޓު ހަމަލާއަށް ފަރުވާ ހޯއްދެވުމަށް، ރާއްޖެއިން ބޭރުގައި ހުންނަވައިގެން، މަޖިލިސް ބައެއް މެމްބަރުންނާއި އަދި އެމްޑީޕީގެ ބައެއް މެމްބަރުން އަމަލީ މަސައްކަތަށް ނެރުއްވައިގެން، ނިޒާމު ބަދަލު ކުރުމަށް ޕެޓިޝަނެއްގައި ސޮއިކުރުމުގެ މަސައްކަތް ކުރިޔަށް ގެންދަވާފައި ވެއެވެ. އަދި ކަންމަތީ ބައްދަލުވުންތައް ބޭވުންފަދަ ހަރަަކާތްތައްވެސް އޭރު ކުރިޔަށް ގެންދަވާފައި ވެއެވެ.

އެހެންނަމަވެސް އޭގެ ދުވަސްކޮޅެއް ފަހުން މިހަރަކާތްތަކަށް މަޑު ޖެހުން އައިސް، އޭގެ ފަހުން މިހަރަކާތްތަކަށް ވީނުވީއެއް ވަނީ ނޭގިފައެވެ.

އެއަށްފަހު ނަޝީދުގެ އެންމެ އިސް އަމާޒަކަށް ވެގެން ދިޔައީ ނިމިދިޔަ އެމްޑީޕީގެ ކޮންގްރެސްއެވެ. ވެރިކަމުގެ ނިޒާމު ބަދަލު ކުރުމަށް، އާންމު ރައްޔިތުންގެ ފެންނަ ނުފެންނަ ވޯޓަކަށް ދިއުމަށް އެމްޑީޕީގެ ކޮންގްރެސްގެ ތާއީދު ހޯއްދެވުމެވެ. ދުރާލާ އެމަސައްކަތް ފައްޓާވާ، އެންމެފަހުން މިކަމަށް ޚާއްސަ ގަރާރެއް ކޮންގްރެސްއަށް ހުށަހަޅުއްވާ، އެގަރާރަށް ތާއީދު ހޯއްދެވުމަށް ނަޝީދުވަނީ ގިނަގުނަ މަސައްކަތްތަކެއް ކުރައްވާފައެވެ.

އޭގެތެރޭގައި، ބަރުލަމާނީއަށް ތާއީދު ހޯއްދެވުމުގެ ގޮތުން، ކޮންގްރެސް ގާތްވެގެން ދިޔައިރު، ހަރުގޭގެ ބައްދަލުވުންތައް ބޭއްވުމުގެ އިތުރުން، ބަރުލަމާނީ ނިޒާމަށް ނުގޮސްފިނަމަ، 2023ގެ ރިޔާސީ އިންތިޚާބު ރައީސް ސާލިހަށް ކާމިޔާބު ނުވާނޭކަމަށް ވިދާޅުވެ، ކުރިޔަށް އޮތް ރިޔާސީ އިންތިޚާބުގައި އެމްޑީޕީއާއެކު ނުހުންނަވާނޭ ކަމުގެ އިންޒާރުވެސް ނަޝީދުވަނީ އެންމެ ފަހުން ދެއްވާފައެވެ.

ގަރާރު ކޮންގްރެސްއިން ފާސްވާނޭ އެއްވެސް ގޮތެއް ނެތް!

ކޮންގްރެސް ފެށުމުގެ ރަސްމިއްޔާތުގައި ވާހަކަ ދައްކަވަމުން ނަޝީދު ވިދާޅުވެފައިވަނީ "މިއަދާއި މާދަމާއަކީ އެމްޑީޕީ އަށް ފަސޭހަ ދުވަސްތަކަކަށް ނުވާނެ" ކަމުގައެވެ. އަދި ކޮންގްރެސްގެ ދެވަނަ ދުވަހުގެ ހެނދުނުގެ ދަންފަޅީގައި ވާހަކަ ދައްކަވަމުން ވިދާޅުވެފައި ވަނީ ހުށަހަޅުއްވާފައިވާ ގަރާރަށް ވޯޓަށް އެހީމާ ވާނެގޮތް އެނގިވަޑައިގަންނަވާ ކަމަށެވެ.

އަޅުގަޑަށް އެނގޭ ވޯޓު މި ކޮންގްރެސްގައި ނެގީމަ އޭގެ ނަތީޖާ އޮންނާނެ ގޮތް. އަޅުގަޑު ނޭދެން އެ ހައިޖާނުގެ މަންޒަރެއް.

އަމިއްލަފުޅަށް ހުށަހަޅުއްވާފައިވާ ގަރާރު ކޮންގްރެސްގައި ފާސްނުވާނެކަން އެނގިވަޑައިގަންނަވާކަމަށް އިޝާރާތް ކުރައްވަމުން ނަޝީދު ވިދާޅުވެފައި ވެއެވެ.

އަދި އޭގެ އިތުރުން ރައީސް ސާލިހުވަނީ ކޮންގްރެސްގެ ހަވާސާގައި ވާހަކަ ދައްކަވަމުންވެސް، ވަރަށް ސަރީހަ އިބާރާތުން، ކުރިއެކޭވެސް އެއްފަދައިން، ނަޝީދުގެ ގަރާރަށް ތާއީދު ނުކުރައްވާނޭކަމަށް ވިދާޅުވާ ވިދާޅުވުން ތަކުރާރު ކުރައްވާފައެވެ.

ހަމަ އެއާއެކު، ނަޝީދު ހުށަހަޅުއްވާފައިވާ ގަރާރަށް، ކުރިޔަށްދިޔަ އެމްޑީޕީގެ ކޮންރެސްގެ ތާއީދު އެއްވެސް މިންވަރަކަށް ނެތްކަން ޔަގީންވެގެން ދިޔަ އެއް ހާދިސާއަކަށް ވެގެން ދިޔައީ، ކޮންގްރެސްއަށް ހާޒިރުވެ ތިބި ބައެއް ގޮފިތަކަކީ ސައްޙަ ގޮފިތަކެއް ނޫންކަމަށް ވިދާޅުވެ، ކޮންގްރެސްގެ ދެވަނަ ދުވަހު ނަޝީދު ވާހަކަ ދައްކަވަން ފެއްޓެވުމާއެކު ކޮންގްރެސްގައި ބައިވެރިވެރިންގެ އަޑުގަދަވެ، ހޯލު ތެރޭގައި ނަޝީދަށް އަމާޒުވެގެން ދިޔަ ނުރުހުންތަކެވެ.

މިގޮތުން ކުރިމަތިވި ފުރައްސާރައާއި، އަދި މުޅި ކޮންގްރެސްގެ ރޫހު ހުރިގޮތުން، ވެރިކަމުގެ ނިޒާމު ބަދަލު ކުރުމަށް ނަޝީދު ހުށަހެޅުއްވި ގަރާރަށް ކޮންގްރެސްގައި ވޯޓަށް އެހި ނަމަވެސް، ބޮޑުތަނުން އެ ގަރާރަށް ކޮންގްރެސްގެ ބައިވެރިން ނޫނެކޭ ބުނާނޭކަން އޮތީ ވަރަށް ގިނަ ގޮތްގޮތުން ކަށަވަރުވެ ޔަގީން ކުރެވިފައެވެ.

އެހެންކަމުން، ވެރިކަމުގެ ނިޒާމު ބަދަލު ކުރުމަށް ރުހުން ހޯދާ ގަރާރު ކޮންގްރެސްގައި އިތުރަށް ކުރިޔަށް ނުގެންދިއުމަށް ނަޝީދު ނިންމަވާ އަދި، ކުރިޔަށް އޮތްތަނުގައި ގަރާރާމެދު އިތުރަށް މަޝްވަރާ ކުރައްވާނޭ ކަމަށް ވިދާޅުވިއެއްކަމަކު، ސާފުކޮށް ފެންނާން އޮތް އެއް ހަގީގަތަކަށް ވެގެންދިޔައީ، މިގަރާރު ކޮންގްރެސްއަށް ހުށަހަޅުއްވައިގެން ވޯޓަށް އެހިނަމަވެސް، އެއިން ނިކުންނާނޭ އިތުރު އެހެން އެއްވެސް ނަތީޖާއެއް ނެތްކަމެވެ.

އަދި އޭގެ ބަދަލުގައި، ބޮޑުތަނުން ކޮންގްރެސްއިން ގަރާރަށް ނޫނެކޭ ބުނެ، އެކަން މިމަސައްކަތުގައި ނަޝީދަށް ކުރިމަތިވެގެންދާނޭ އިތުރު ގޮންޖެހުމަކަށްވެ، މި ގަރާރުގެ ސަބަބުން ބޮޑު ހައިޖާނެއް އުފެދިގެން ދިއުމުގެ ފުރުސަތު ފަހިވަމުން ދިޔަތަންވެސް ދިޔައީ ފާޅުކަން ބޮޑު ގޮތެއްގައި ފެންނަމުންނެވެ.

އެހެންކަމުން، ކުރިޔަށް އޮތްތަނުގައި އިތުރަށް މަޝްވަރާ ކުރައްވާނޭކަމަށް ވިދާޅުވަމުން، ނަޝީދުގެ ގަރާރަށް ވޯޓަށް ނޭހުމަށް ނިންމި ކަމުގައިވި ނަމަވެސް، ނިޒާމު ބަދަލު ކުރުމާއި ގުޅޭގޮތުން އިތުރަށް ކުރާނޭ މަޝްވަރާއެއް އޮތްކަމުގައި ގަބޫލު ކުރެވެން ނެތް ސަބަބަކީ، ނިޒާމު ބަދަލުކުރުމަށް ޚުދު އެމްޑީޕީގެ އެތެރޭގައި ތާއީދު ނެތްކަން ހިގައިދިޔަ ހުރިހާ ކަމަކުންވެސް ޔަގީންވާން އޮތުމެވެ.

ސިޔާސީ ލީޑަރެއް، ސިޔާސީ ޕާޓީއެއް، އަދި ސިޔާސީ ގޮތުން އެމްޑީޕީގެ އިސް ސަފުގައި ތިބި ގިނަ ފަރާތްތަކުންވެސް މި ގަރާރަށް ތާއީދު ކޮށްފައި ނުވުމެވެ.

އެންމެ ފަހު ފުރުސަތު ގެއްލުނީތަ؟

ވެރިކަމުގެ ނިޒާމު ބަދަލު ކުރުމަށް އެމްޑީޕީގެ ކޮންގްރެސްގެ ތާއީދު ހޯދުމަށް ނަޝީދު ކުރެއްވި މަސައްކަތްތައް ފަނުފުލުން ގޮސް، މިމަސައްކަތުގައި މިހާރު ފަހު ސިއްޖެހިގެން ހިގައްޖެކަމަށް، ނިމިދިޔަ ކޮންގްރެސްއަށްފަހު ގިނަ ބަޔަކު ދެކެން ފަށާފައިވާކަން މިފުރުސަތުގައި ފާހަގަ ކޮށްލާން ޖެހެއެވެ.

ސަބަބަކީ، ކޮންގްރެސްގެ ނަތީޖާއިން މޭރުންކުރެވޭ އެއްކަމަށް، ނިޒާމް ބަދަލުކުރުމަށް އެމްޑީޕީގެ ތާއީދު ނެތްކަން ޔަގީންކުރެވިގެން ގޮސްފައި ވުމެވެ. އަނެއް ކަމަކީ، ކޮންގްރެސްގެ ތާއީދު ކަށަވަރުކުރެއްވުމަށް ނަޝީދު ކުރެއްވި މަސައްކަތްތަކުގެ ނަތީޖާއެއްގެ ގޮތުން، ބަރުލަމާނީ ނިޒާމެއް ރާއްޖެއަށް ގެނައުމަށް ދެކޮޅު ހަދާކަން އާންމުކޮށް އިއުލާން ކުރި ސިޔާސީ ފަރާތްތަކަށް ބަލާއިރު، ރާއްޖޭގައި އުފެދިފައިވާ ސިޔާސީ ޕާޓީތަކާއި، ޕާޓީތަކުގެ ލީޑަރުން ހިމެނިގެން ދިޔައިމުގެ އިތުރުން، މީގެ ތެރޭގައި ރައީސް ސޯލިހާއި، އެމްޑީޕީގެ އިސް ގިނަ ފަރާތައްވެސް ހިމެނި، މި ހުރިހާ ފަރާތްތަކުންވެސް މިކަމަށް ތާއީދު ނުކުރާކަން ފާޅުގައި ހާމަ ކޮށްފައި ވުމެވެ.

އެހެންކަމުން މި ހުރިހާ ފަރާތްތަކެއްގެ ދެކޮޅު ހެދުންތަކާއެކު، އަދި އަމުދުން އެމްޑީޕީގެ ކޮންގްރެސްގެ ތާއީދެއް ނެތި، އަދި ދެން އެތާއީދު ހޯދޭނެ އިތުރު ފުރުސަތެއް ނެތި، ދެން އެންމެ ކުޑަމިނުން މި މައްސަލާގައި އާންމުންގެ ފެންނަ ނުފެންނަ ވޯޓަކަށް ދިއުންވެސް ވެގެންދާނީ އިހުނަށް ވުރެ ގޮންޖެހުން ބޮޑު، ނުވަތަ މުސްތަހީލު ކަމެއް ކަމުގައި މިއަދު މިވަނީ ގަބޫލު ކުރަން މަޖުބޫރު ވެފައެވެ.

މިއުސޫލުން ބަލާއިރު، ކުރެވޭ މަޝްވަރާތަކެއްގެ އަލީގައި ނަމަވެސް، މި ދައުރުގައި ބަރުލަމާނީ ނިޒާމަކަށް ވެރިކަމުގެ ނިޒާމު ބަދަލު ކޮށްލުން އެއީ ވުމަށްވުރެ ނުވުން ގާތްކަމެއްކަން، ހުރިހާ ގޮތަކުންވެސް މިވަނީ ކަށަވަރުވެ ޔަގީން ކުރެވިފައެވެ.