އަދާލަތު ޕާޓީގެ 17 ވަނަ އަހަރީ ދުވަހުގެ ތަހުނިޔާ ރައީސް ސާލިހު އެޕާޓީއަށް ފޮނުއްވައިފިއެވެ. 17 ވަނަ އަހަރީ ދުވަހުގެ ތަހުނިޔާ އަދާލަތު ޕާޓީއަށް ފޮނުއްވުމަށް ރައީސް ސާލިހު ކުރެއްވި ޓުވީޓުގައިވަނީ، ރައްޔިތުންނަށް ޚިދުމަތް ކުރުމުގައި އެޕާޓީ ސަރުކާރާއެކު ކުރަމުންދާ މަސައްކަތްތަކަށް ޝުކުރު އަދާ ކުރައްވާފައެވެ.
އަދާލަތު ޕާޓީގެ 17 ވަނަ އަހަރީ ދުވަހުގެ ތަހުނިޔާއާއި މުބާރިކުބާދީ ޕާޓީގެ ވެރިންނާއި ޢާންމު މެންބަރުންނަށް އަރިސް ކުރަން. އަދި ރައްޔިތުންނަށް ޚިދުމަތް ކުރުމުގައި ސަރުކާރާއެކު ކުރައްވާ މަސައްކަތަށް @adhaalathoffice އަށް ޝުކުރު ދަންނަވަން.
— Ibrahim Mohamed Solih (@ibusolih) August 18, 2022
އަދާލަތު ޕާޓީއަކީ ދެހާހުގެ މެދުތެރޭގައި ގިނަ ޕާޓީތައް އެކުލެވޭ ވެރިކަމުގެ ނިޒާމަކަށް ޖާގަ ދިނުމާއެކު އުފެދިގެން ޕާޓީތަކުގެ ތެރޭގައި ހިމެނޭ ޕާޓީއެކެވެ. މި ގޮތުން އެޕާޓީ ރަޖިސްޓްރީ ކޮށްފައިވަނީ 18 އޮގަސްޓް 2005ގައެވެ.
އަދާލަތު ޕާޓީގެ ކުރިން ރަޖިސްޓްރީ ކުރި ޕާޓީތަކަކީ އެމްޑީޕީއާއި ޑީއާރުޕީއެވެ. އެމްޑީޕީ ރަޖިސްޓްރި ކޮށްފައިވަނީ 26 ޖޫން 2005 ގައެވެ. އަދި ޑީއާރުޕީ ރަޖިސްޓްރީ ކޮށްފައިވަނީ 21 ޖުލައި 2005އެވެ.
އަދާލަތު ޕާޓީ އުފެދިގެން އައީ ދީނީ އިލްވެރިންތަކެއްގެ މައްޗަށް ނަމަވެސް، އެޕާޓިީ އުފެއްދުމުގައި ހަރަކާތްތެރިވީ ގިނަ ދީނީ އިލްމުވެރިންތަކެއް ފަހުންވަނީ އެޕާޓީ ދޫކޮށް އެހެން ޕާޓީތަކާއި ގުޅިވަޑައިގެންފައެވެ.
